¹ I kun səkur na təlam kuru təlam gu aɗagayi na Səku, kuru təlam ke Səku. ² Tun səkur aɗa gayi na Səku. ³ Nda dlam be tawanke da ri gəri kuru na aci bai na be bai, ko be nda dlamu go aci. ⁴ I kun gəri na aro, aro payan ki ndawa gəd. ⁵ Payan gu tifi kun ɗa ayiwa, da ayiwa bata da chimi bai. ⁶ Na nən dagai nda wane aci da ri Səku. ba ci dlugun Yahai. ⁷ A ci dew gaɗa da bari labar i dak payan gu gada tike da bar jirewa da ri gəri. ⁸ Yahai aci ne payan gu bai amman dew gaɗa aci da bar labar payan gu. ⁹ Jire payan gu wara a bar payan i ndawa mak a ye ni ikun duniya. ¹⁰ A ci a kun duniyau, nda dlam duniyau da ri gəri amman duniyau ziga ci bai. ¹¹ Dew i ri nda gəri amman nda gəri ngənaci bai. ¹² Amman ka ki gawa ngəna ci wara bar na jirewa na dlugun gəri, bar dikshi dəvo dlamanakshi kutli Səku, ¹³ Sutuku nda yawakshi da dəvo dədəm na təka na da nen gaiwa bai amman dari Səku. ¹⁴ Kuru təlam gu da dlamungara nən da mbashi i gadava wa. Weka na kərmai gəri, kərmai wara a kaki ki nən wara vərew da ri Afak. ganiyak na herr na jirewa. ¹⁵ Yahai bar labar gəri na ndokta wura maya, "So nən mi wara na rame kun ma, 'Nən ba ci ni da kuga, aci a riwu damba na nai.'" ¹⁶ Gaɗa da kun baci gəri wa gwid wa gən herr iɗak herr. ¹⁷ A təro nda ba dumaya da ri Musa amman herr na jirewa dew dari Yeso məgənyi. ¹⁸ Go nən wara ngalte ika Səku. wara aci ne rugeri Seku, wara a jampel Afək aci ne tatki nda ziga ci. ¹⁹ Sutuku saida adak Yahai lakwtu wara yahudauccin wanak parisauccin na leviyauccin iri gəri da Urshalima da jaya ci, "Ci tai?" ²⁰ A ci da urikshi go gamdaya da rama, "I yu məgənyi bai." ²¹ Zam akshi da ja ya ci wam, "Kile ci tai? Ci Iliya bi?" A ci ma, "I bai", akshi ma, "Ci nabi bi?" aci ma, "o o." ²² Se akshi da rami ci, par ci tai, a rami ja gaɗa ja bi be wara ja rame ndak wanaya ja? ka ram tam i aɗa ci?" ²³ A ci ma, "I yu wura mi a ndokta a kun pata: 'A dəmina dəvu məgənyi tərr,' ka ki mi wara nabi Ishaya ramu." ²⁴ Ndawa wara nda wana gu vire dari parrisauccin akshi nda ja ya ci da rami ci maya to, ²⁵ "Ɗawun tam ka dlama Baptisma, ci məgənyi bai ci Iliya bai ci nabi bai?" ²⁶ Se Yahai dan gumikshi maya, "Iyu na dlam baptisma na am amman a gadava kun na nən darɗi wara kwazga ci bai. ²⁷ A ci nən mi dew da kuga wara na bata fitka zayi sono zəgər gəri bai." ²⁸ Jandu tuku mak dna dlamu i kun Bataniya da baka gadəra Urdun ri wara Yahai dlam baptisma. ²⁹ Da tlanu Yahai daki Yeso a ni ri gəri da rama, "A kina gwomak Səku mi wara amana aibuk duniya mak! ³⁰ Su ne nən wara na dlam ramau 'Nən wara a ni da kuga rima na iyu gaɗa a ci a səkur ga.' ³¹ Na ziga ci bai amman dlamin gara ka sunu, ada nda tatika du i Israila, Na dew na dlama baptisma na am." ³² Yahai tatika ma na Nənwa Səku a fuwayi ka ki tataru da dəsku da ni darɗi aɗa geri. ³³ Na sanutaci bai, ba ci wanai ga na dlam baptisima na am ramanai ma i da gəri na wanai Nənwa da fuwai nda dlampu na aci, aci ne ba ci dlama baptisma na Nənwa Səku go aibu. ³⁴ I yu ne ka na aci katanasa su tuku wun Səku." ³⁵ Zam wam da tlanu lakwtu Yahai darɗi na pakurauccin gəri shirin, ³⁶ akshi da ki Yeso a ni rikshi, Yahai daram ma, "A kina Gwomak Kakasəku!" ³⁷ Se pakurauccin gəri shirin gu da kina ci da rami sau. Se akshi nda dəgina Yeso. ³⁸ Se Yeso da pimi da kakshi a dəga gəri da ramikshi ma, "Kwan cu tam?" Akshi dauri ma, "Rabbi (wato malum) ci na mbasu a rawan?" ³⁹ Da ramikshi ma, "Anna kwa ki riwara aci dam mbasu." Akshi dam mbasu na aci gafugu gaɗa lakwtu damtu na awa goma. ⁴⁰ Gayi da kun ndawa shirin wara kərəmtu Yahai a rama, da dəgina Yesu a ci ne Andrawus, Yagana Siman Bitrus. ⁴¹ Səkur ba yagana Saminu da rami ci ma, "Wa bana masihu" ⁴² Dan na aci i ri Yeso. se Yeso daka ci da ramma, "Ci ne Saminu wun Yahai da ye rauraci ma Kefas" (wato 'Bitrus') ⁴³ Da tlanu, lakwtu wara Yeso tlau an ci nyan gəri i Galili, Se da bi Filibus da ramici ma "adgen Iyu" ⁴⁴ Filibus vire da Baitaiza marən da Andirawus na Bitrus. ⁴⁵ Filibus da bi Natinal da ramici ma, "Nən mi wara Musa tarnu i kun dumaya na nabauccin ja bana aci Yeso wun Isibu da Nazarayi." ⁴⁶ Natinal da ramici ma, "Anya be bəlan Seram a viriyan gara da Nazariya?" Filibus da ramici ma, "Ayan ka ki." ⁴⁷ Yeso ike Natinal a ni ri gəri tunu da rami i da gəri ma, "Aiki na nən Israila ki jirewa wara kunu gəri go aibu" ⁴⁸ Natinal da rami ci ma, "Ka zigayu na na?" Yeso dauri ci ma, "Kabin Filibus da raure ci lakwtu wara ka diɗa waka ayau, ne kana ci." ⁴⁹ Natinal darami ci ma, "Rabbi (wato malum) ci wun Kakasəku, ci dəgəm Israila" ⁵⁰ Yeso da rami ci ma, "Gaɗa na ramici ma ne ka na ci tun ka diɗa waka ayau kabar na jirewa? ⁵¹ A ci daram ma, "Jirewa jirewa na rame ci ka ye lawan dəsku a rəpta kuru malaikawaccin Səku a gaya na fuwayi iɗak wun gi nən.