¹ Ne 'e Bulus, a ronok ka Masihu Yeso, ki yagena Timoti ki Hilmon, zafmu bunga a rutamu. ² Namik ba'anomu Afiya, ki Akibus zafmu a kesi, ki ban donsha Ndeyiy a ngala banotko. ³ Eri deinok lahiyak gem Ndeyi bomu ki Bomu abano Yeso Kiristi to dom ki deinok nguni. ⁴ Lei tamiyan kunna Ndeyi.Ne dibshe nguni tong donshuno. ⁵ Ne kolkok shida ndaltu ki ona jire song anandi tong Yeso Bomu abano shaf ki ana ona jire. ⁶ Ne donshu ka ona jire wonses gomta muniy 'e tong Bomu abano deyi so zina so mantu hotommu tong Kiristi. ⁷ Ne kolko zei ki kuyu ki sunshe tilik ka ndaltungku, tili ana ona jire ito hoyok katko, yagena. ⁸ Kika ka'a, lei tan gedok tili tong Yeso zof nguni 'e ei ngu ina, ⁹ Shafki ka'ak ka ndaltu, ne donsha nguni, ne'e Bulus, jero, a ronok ka Masihu Yeso ¹⁰ Ne dolshe ngunik ka lano Unisimas, yon bobi tong rono. ¹¹ Onzi ka ngoi disa gemku, kauso me deyinni ngoi zina gemku shafki ne 'e. ¹² Ne mateng kuni, si yon ndalo kit tilino. ¹³ Ka ne ndalon ngahini gemno, do si ino ruta bo yoko, jajum yon tong rono kika eni Ndeyi. ¹⁴ Men ndalon 'e 'ya wara bongku bu. Ne ndalo 'ei zinai ko ishei deyik yabta tili bu kabak ona katko. ¹⁵ Kika woi tikangko sik nguni yo sommodi shim, ki bei a mateni gemangku a nza'adi bu. ¹⁶ A sauwidi deishe ngaru bu, me wallak ngaru, yagenai ne ndalo, siy 'yak ndaltu gemno, nguni ke ka 'a tong zugo ki tong Bomu abano shaf 'i. ¹⁷ Ka 'a ke 'e nako namko ne 'e zafko a ruta, biski si kit ne 'e. ¹⁸ Na si iku leihi domana ngu dafshe si gudu matatiti kanno. ¹⁹ Ne 'e Bulus, ne ture woi ki saranno, ne tuhekuti. ko damtek zauko son waltantas bu. ²⁰ Wo'o yagena, erin we hetrek tili gem Bomu abano; onno sunnok tili tong Masihu. ²¹ Ne an gedok tili katko, ne turengko. Ne manoti ko gitik ina 'ya shei wallitik 'ei ne dolko. ²² Shafki ka'a, ramteno be is ne urdi, nen manoti ki donshungku ne gitik ndishe gemku. ²³ Abafaras, zafno a rono tong Masihu Yeso, ne lakda nguni. ²⁴ Markus ke ka'a, Aristarkus, Dimas, ki Luka shano ana ruta. ²⁵ Deinok lahiyak gem Bomu abano Yeso Masihu deyik nguni. Amina.