¹ Ubulusu nu ubulusuna wọ Uyesu, nu unị́kọ yana Utimotawas gẹnẹ nu Ufilimon, unị́ liyeba, ulólò yami nu ulólò ya gatimẹ nẹ, ² nu afiya unị́kọ yeyi nu Arkifus Usoza ikíkí yeyi ni gatimẹ nu Ikilisiya umẹ iya gọ nu gami kẹnyẹ tẹ̀ nẹ. ³ Aniheli nu liyesi wayi nẹnẹ nu weze ya Usigapa Ada wayi nu Ada Unikpụkpụ Uyesu Alimasihu. ⁴ Zam zam ma mẹ ugode Usigapa. Ma tẹ́ nẹ nu Upyẹ(aduwa) yami. ⁵ N wu liyeba nu Ubangasikiya umẹ nnya nya ni ginyẹ ka Ada Unikpụkpụ Uyesu, nu gbyi banị́ gebyi nẹ tẹ̀. ⁶ Ma mẹ aduwa(upyẹ) ya lutu ga gọ ka ubangasikiya yẹnyẹ, wa nu ga kpụ ka gyẹngyẹ isesele imẹ iyi nginyẹ ka Almasihu tẹ̀. ⁷ Uvu mi liyesi tsim, uzwi mi gebo ka liyeba kẹnyẹ, gebo ka iye ya banị́ gebyi sị tịzẹ nu lutu kẹnyẹ, unị́kọ. ⁸ Gebo gụyẹ tẹ̀, ko si gẹ̀dẹ nnya ntsi nu Alimasihu gima gi ẹ ganu gi nya mẹ lika gụmẹ u gọ ginẹ tẹ̀. ⁹ Sigayi tẹ̀, gebo ka liyeba, me ye gẹ̀dẹ nimi Ubulusu, uganibo, kyékyémẹ nvu unị́ ya ubulusuna, gebo ka Alimasihu Uyesu. ¹⁰ Ma mẹẹ utsukụ-tsukụ gebo ka ubyi yami Onisimu, umẹ nvu Ada yana kẹn dẹ nu atsamgba tẹ̀. ¹¹ Akiyekiye wa nya apani ni gegu kẹnyẹ la nde kyékyémẹ, unya apani nu gegu kẹnyẹ, ni gegu kami nẹ. ¹² N néa gitẹ nu weze nyẹ, ude ni iye yami tsim. ¹³ Ngima ye gẹ̀dẹ wa dẹ nu weza mi, gi waná mẹ gatimẹ aa gimi, atá ganu kẹnyẹ, utu umẹ ndẹ ni atsamgba ya lika kọ Usigapa tẹ̀. ¹⁴ Nde me ye gẹ̀dẹ ma mẹ gyẹngyẹ baa ga kpụ kẹnyẹ la, me ye gẹ̀dẹ lika usesele ga mẹ kẹnyẹ, ukaa vu ya ntsi la, nde wavu ya liyeba. ¹⁵ Katẹ̀ ube umẹ ugigi uná mi nẹnẹ wọ utu gẹnyi tẹ̀ utẹ́, gi nya gọ gbogbo a gẹẹ. ¹⁶ Kyékyémẹ wavu gufé gala, nde u pe gufé, uvu unị́kọ ya liyeba. uvu unị́ umẹ nma baliyeba kana tsim tẹ̀, si weze yẹnyẹ dú, nu gụwụpa nu nu Ada Unị́kpụkpụ nẹ. ¹⁷ Nyẹ su mi gẹ̀dẹ ulólò ya gatimẹ, nya gua nko mẹ nnya gumi tẹ̀. ¹⁸ U mẹ ube umẹ uwa yi gyẹ la tẹ̀, ko nyẹ byia guta, ko ube dẹ̀, nyẹ sua gẹ̀dẹ uyi nimi nẹ. ¹⁹ Nimi Ubulusu, nka ibe imẹ nu gubo kami nẹ, maa gyẹẹ. Avu gẹ̀dẹ ma gẹ̀ẹ gẹ̀dẹ me byi guta nu lutu kẹnyẹ la. ²⁰ I, unị́kọ, mẹ mi gawuye ni ginye ka Ada Unị́kpụkpụ, giẹ iye ya mi ga zẹ na Alimasihu. ²¹ Nkpụ ga fuluba kẹnyẹ, nka voẹ nkpụ gẹ̀dẹ nya mẹ a pe kẹn gẹ̀ tẹ̀. ²² Kpu wa, ye nnẹ̀ki nni ibe gesine zimi. Gebo ka ya upyẹ(aduwa) yẹnẹ, a bene mi uweze nẹ. ²³ Efafarasu, ulólò yami ni ginyẹ ka Alimasihu Uyesu, nu ubulusuna, wa liẹ atsu. ²⁴ Sụ Umalikusu nu Arisitakus, nu Udimasu, nu Uluka belólò ya gatime kami. ²⁵ Nbeli aniheli ya Ada Unị́kpụkpụ wa yi nẹnẹnẹ nu gunumu kana nẹ. Wa sayi tẹ́.