¹ Da vbai iẹn imiọn mẹn li imọhe (ọhiọ agbọn ya gu iyẹnmi ma lian ẹn emi ẹwẹn uhi), khọ uhi erọ ru uanha shan ẹgbẹ da ri agbọn? ² Ọhiọ ọkhuoo la rie, uhi ta erọ kha ri efẹn ọdọ ghọ ọkha da kha ri agbọn, sokpẹn ọdọ ghọ kha uu, erọ ki da ee obọ uhi ọkhuoo bi ọdọ re. ³ Ọhiọni, vbẹkẹ khi ọdọ ghọ ri agbọn, ọkha ọdọ deha kpẹn ọmọhe ọvbee, ọkhuoo lọ zọlọ yọin akio chọi. Sokpẹn ọkhau khi ọdọ ghọ uu, uhi ọi wọn, ọi wọ ọkhuoo ozọlọ ọkha deha kpẹn ọmọhe ọvbee. ⁴ Ọhiọna, imiọn mẹn li imọhe, eri vba gbo uu jọ uhi rẹ shan egbe oghọ Ikiristi. Erọ wi na lada miẹn khi vba kugbe, ọni wọ, yọin la shọ kpare vbu uu, lima da mọi imọnmi nọ Oisẹlẹbua. ⁵ Ọhiọ ẹghẹ lima rẹ ri oghe egbe, eti ọkhọọ ọbia vbi egbe ma rẹ shan uhi lọda mọi imọnmi oghọ lọ si uu re. ⁶ Sokpẹn bọna era ki mu ma da obọ uhi re. Emi lọ mu ma mọi eri ma ki uu jọ. Erọ wi na lima da kha ga vbi ọgbọn oghe Eti, bi ọi wọ vbi utẹ oghe ebe la vii. ⁷ Emi bi ma kio tẹ si yọ? Uhi dobọghọ ọkhọọ ọ? Ọkhi mati degbe wi iyọ. Ọrẹkpẹ re iyọ, I khai mati ẹn ebọ wọ ọkhọọ, ọkhau khọi wọ uhi. Ọhiọ I khai mati ẹn ebọ wọ arẹo hi emi, sọi wọ uhi ta, ''U khu gbudu rẹo hi emi ẹvboo.'' ⁸ Sokpẹn ọkhọọ mi ehe muzẹ rẹ shan eba tai, ọrẹ wọn arẹo hi emi ọdọdan re vbegbe mẹn. Ọhiọ sọ uhi ziọ, ọkhọọ erọ uu. ⁹ Ọmọi ẹghẹ li rẹ ria agbọn, li rẹ ẹn uhi, sokpẹn ẹghẹ lọ eba tai kirẹ vae, ọkhọọ rẹ che ra agbọn, I rẹ uu vbe eeni. ¹⁰ Ọlọ eba tai lọ kha wọn ẹdẹ agbọn re, ọrẹ che kiẹn uu ji mẹn. ¹¹ Ọhiọ uu wọn ehe lọ miẹn rẹ shan eba tai, ọrẹ tẹẹ mẹn. Rẹ shan eba tai ọrẹ gbe mẹn vbu ubi. ¹² Ọhiọni, ọlọ uhi ọfuẹn, bi eba tai ọfuẹn, mọọ ata, bi ọhọnmọn. ¹³ Ọhiọni, ebọ họnmọn ọki che kiẹn uu ji mẹn? Ọkhi degbe mati wi iyọ. Sokpẹn ọkhọọ, lọda rọi ma khọ ọkhọọ yọin u rẹ shan ebọ họnmọn, ọrẹ wọn uu imẹn. Ọna we aba miẹn rẹ shan eba ta, lọ ọkhọọ da kiẹn ọkhọọ lọsẹn. ¹⁴ Ọhiọ ma ẹn khọ uhi eti ọ, sokpẹn mẹmẹn oghe egbe. Era ki shẹn mẹn vbọ oghumu jọ ọkhọọ. ¹⁵ Ọhiọ emi lia u, Ọi zemi mu mẹn ẹo kuere. Ọhiọ emi lia hoo li mẹn u, yọin kia che u, bi ebi khọẹkẹ ghọ, yọin ya che u. ¹⁶ Sokpẹn ọkhau khi ya che wọ emi li hoo li khaa u, I kpa uhi yanma khọ ọlọ uhi ọhọnmọn. ¹⁷ Sokpẹn bọna ọi ki che wi mẹmẹn lọ wọ, sokpẹn ọkhọọ lọ ri mẹn vbegbe. ¹⁸ Ọhiọ I ẹn khọ vbi egbe mẹn ọni wọ vbi ohian egbe mẹn, egbegbe mi ziọ. Ọhiọ lida wọ ebọ họnmọn ọri mẹn vbi egbe, sokpẹn I khi mati wọ. ¹⁹ Ọhiọ egbegbemi li hoo, I mati wọ, sokpẹn emi ọbe lọu khi I hoo, ọni ya che u. ²⁰ Bọna ọkhau khi ebi hoo li mẹn u yọin kia che u, vbi eeni ọi che wọ mẹmẹn lọ wọ, sokpẹn etini ọkhọọ lọ ri mẹn vbegbe. ²¹ I ki miọn, khọ eria hoo li mẹn wọ ebọ họnmọn, sokpẹn ọli eti ọbe ni vbata ri mẹn vbegbe. ²² Ọhiọ Eria ghọnghọn vbi uhi Oisẹlẹbua vbẹkẹ egbe mẹn. ²³ Sokpẹn Eria che mi uẹẹn ọdan vbi egbe mẹn. Erọ kpa uẹẹn ọgbọn ni gbegbe vbi udu mẹn. Erọ rẹ mẹn kiọn oghumu rẹ shan uẹẹn ọkhọọ lọ ri mẹn vbegbe. ²⁴ Ọna rẹ mẹn kiẹn ọla tuegbe ni! Da ọlọ fan mẹn vbegbe oghọ uu? ²⁵ Sokpẹn ekhuẹnmi lọbu yọin ọn rẹ jọ Oisẹlẹbua rẹ shan obọ Ijesu Ikiristi Ọlọmọima! Ọhiọni, Mẹmẹn legbe mẹn ọga uhi Oisẹlẹbua vbẹkẹ udu mẹn. Ọrẹkpẹ wi iyọ, vbegbe mẹn uẹẹn ọkhọọ yọin ya ga.