¹ Bọna ọrẹ da ruain, ẹgbẹ lagbọn da fi khii Ijesu, kha daehọ eta Oisẹlẹbua, ọ rẹ muzẹ vbe ehọ ẹdẹ Igẹnisareti. ² Ọ rẹ miẹn kho okọ ẹdẹ evba muzẹ vbe ehọ ọlẹ ẹdẹ ewa. Elọ ọgbe ehẹẹn ki da vbẹkẹ elo okọ re, yan ria kpo obiiki iẹn. ³ Ijesu rẹo ovbẹ ẹkẹn ọkpa, vbe elo okọ lọ wo oghi Isimọni, ọ rẹ guma Isimiọni lọ siọ ọlo okọ da vbe ehọ iki re, siẹ o vbamẹn. Ọ rẹ deha vbọ ọlo okọ kha ma agbọn emi. ⁴ Ẹghẹ lọ ki rẹ gui iyẹnmi fo, ọ rẹ guma Isimiọni, "Wọn lo okọ ni ye ehe lẹ ẹdẹ da imi li vba da fi obiiki vba rẹ we ehẹẹn." ⁵ Isimiọni rẹ anjẹn ọ rẹi, "Ọga, ma bia vba asọn eesẹn mai mati we emi ọso, Sokpẹn, vbẹ ẹgbẹ lu tai, mẹn fio obiiki." ⁶ Bian ki rẹ wọ na, yan rẹ hie ehẹẹn lọbu, sẹ vbo obiiki iẹn ria fanọn. ⁷ Ọhiọni yan ki rẹ ro obọ chie eli riẹ ẹkẹ okọ ọlọkẹ, lian da kpa iẹn obọ. Yan rẹ vae yan rẹ hie ehẹẹn vọn okọ eveva. Elo okọ rẹ bẹẹ khian kha yo otọ ẹdẹ. ⁸ Sokpẹn, ẹghẹ li Isimiọni Ipita kirẹ miọn na, ọ rẹ sa ẹkẹ ru vbo odao Ijesu, ọ rẹi " zi ji mẹ obọ, irumudi olọ ọkhọọ yọin u, Ọlọmọimẹn". ⁹ Ọhiọ erọ gbi iẹn unu bia agbọn eesẹn lian rie eheni, ẹgbẹ ehẹẹn lian hiẹ. ¹⁰ Ijemisi bi Ijọni deba iẹn, lian wi ivbi Izebede, li Isimiọni bi iẹn ọ kwan gbe ehẹẹn. Ijesu rẹi, Isimiọni kha ki lọ ofẹn irumudi agbọn u kwo kha hiẹ. ¹¹ Ẹghẹ lian kirẹ hio okọ ien di iki re, yan rẹ zemi eesẹn obọ kha diain. ¹² Ọki sẹ khọ riẹ ẹvboo ọkpa, vbẹkẹ ẹlẹ evboo ọmọhe ọkpa li itẹ vọn egbe, ọ rie eheni. Ẹghẹ lọ rẹ mi Ijesu, ọ re sa ẹkẹ ru vbotọ vbo odao ghọ, ọ rẹ vbabọ nọ, ọrẹi,''Ọlọmọiman, ukha yanma, ero mati mumẹn egbe dann.'' ¹³ Eeni Ijesu rẹ nio obọ a rẹ suọi, ọrẹi, I yanma mọin iwegbe daan.'' Isokpa ni, itẹ rẹ dai vbegbe re. ¹⁴ Ọ rẹ yan ukẹkẹ nọ, lọ kha guma uanso, sokpẹn ọ rẹ gumai ''Kha shan, ọdọ re egbe ma ohẹẹn luda wi iwabo vbọ ọhiọ iwegbe daan wẹ, vbẹgbẹ li Imose da tai, lọda kiẹn ọsẹi rẹ ji iẹn.'' ¹⁵ Sokpẹn usi ọhọnmọn ghọ kẹri yo dao, ogbuyọ agbọn rẹ vai gai yẹn lian he ebọ ma, bi lian da mọọn iwegbe daan. ¹⁶ Sokpen e rọ ghe siegbe yọ ọgbẹn gbẹẹn ọdọ le erọnmọn. ¹⁷ Ọrẹ da sẹ vbu ukpẹdẹ ọkpa vbe li kpẹdẹ ni, ọ ria ma agbon emi, ekhẹn Ifarisi bie elọma uhi deha vbe eheni, lian da vbi igue ọdọdan re, vba adugbo Igalili bi Ijudia, bi Ijerusalẹmu. Itotomi Oisẹlẹbua riọ vbegbe, rẹ kha wan agbọn egbe daan. ¹⁸ Imọhe eboo re vae, yan rẹ re ewa wọn ọmọhe lọ khọnmọn ọọ, yan ria hoo ẹgbẹ lian da wọn o re, mu hio odao Ijesu. ¹⁹ Bi yain ki rẹ mi ehe, rẹ wọn o re, vbẹ ẹgbẹ la agbọn da bu, yan rẹ yu uhọnmọn oa, yan rẹ wọn shan okhumu, vbe ewa la wọn hi, mu do otọ re vbo odao Ijesu. ²⁰ Ijesu ki mia adiuduan iẹn, ọ rẹi, ''Ọmọhe na aro ọkhọọ wẹ họnmẹn.'' ²¹ Eeni ekhẹn Ifarisi bie elọma ki rẹ bẹẹ yan mini emi vbọ ọleta na, ''Da ọlọ ọna u, lọ zu uroo azọhan? Da uanha lọ ọmati rọ ọkhọọ họnmọn uan, khọi wo Oisẹlẹbua ọkpa. ²² Sokpẹn bi Ijesu, ki rẹ daodẹ vba aoo iẹn, ọ rẹ anjẹn, ọ rẹi iẹn, ''Bọzẹ li vba ria oo ena vbu udu vba? ²³ Da ọlọ zuan ta lẹ, 'Arọ ọkhọọ wẹ họnmen,' da vbo, 'Kpare. kha shan?'' ²⁴ Sokpẹn li vba da ẹn kho Ovbiu uanhan mọọn ashẹ vbọ ọlagbona rẹ rọ ọkhọọ họnmọn, I kia ta ma na, 'Kpare, we ewa wẹ, kha shan vbo oa wẹ''' ²⁵ Isọkpa ni, ọ rẹ kpare muzẹ vbo odao iẹn, we ewa lọ rẹ mẹhẹn, ọ ria shan vbo oa ghọ, ọ ria rọ ọkhai jo Oisẹlẹbua. ²⁶ Ọrẹ yan agbọn eesẹn eo a, kha rọ ọkhai jo Oisẹlẹbua. Ofẹn rẹ oi iẹn vbẹkẹ, yan rẹi ''Ma miọn ọyan ẹo a ẹẹ na.'' ²⁷ Bena kirẹ ruain fo, Ijesu rẹ da vbe eheni re, ọ rẹ miọn ọlọ mele egho uhọnmọn la chọi Ilẹva, ọdeha vbehe lada mele egho uhọnmọn. Ọ rẹ tamai, ''Kha dian mẹn.'' ²⁸ Ilẹva rẹ kpare, zi je emi eesẹn obọ, ọ ria diain. ²⁹ Eeni Ilẹva rẹ yen ebae re ghai Ijesu vbo oa ghọ. Elibu lian mele egho uhọnmọn, bia agbọn ọvbee lian debai vbi itebua, kha kpai iẹn e ebae. ³⁰ Sokpẹn ekhẹn Ifarisi bie elọma yan ria zu uyọn ma ivbie ehimi ghọ, yan rẹi, ''Bọzẹ li vba ria kpa elọ 'Mele egho uhọnmọn bie elọ wọ ọkhọọ e ebae?'' ³¹ Ijesu rẹ anji iẹn ''Eliain khọnmọn ya hoọ ọbo, ọfo elọi daan yan hoo ọbo. ³² Eri ki vae da che elian mọu uẹẹn lọsẹn di ioẹkẹ deluẹẹn re.'' ³³ Yan rẹ gumai ''Ivbie ehimi Ijọni yan rẹ ẹkẹ gbo ohanmi gbo le erọnmọn ẹghẹ eesẹn, iyọ gbo ọ ivbie ehimi ekhẹn Ifarisi. Sokpẹn ivbie ehimi wẹ yan e, yan ọn. ³⁴ Ijesu rẹ gumai iẹn ''Amion ọlọ ro ohanmi gbe eli rie efẹn ọdọ ọkhuoo, vbẹkẹ ọdọ ọkhuoo sẹ deha kpẹn iẹn? ³⁵ Sokpẹn ukpẹdẹ de la wọn ọdọ ọkhuoo kpa vbe efẹn iẹn re, vbọ ọlẹghẹ erian kio rẹ ẹkẹ gbo ohanmi.'' ³⁶ Ijesu rẹ gbo re evbee mai iẹn. ''Uanha khi mati yan hian ukpọn da vbu ukpọn ọgbọn re, ọrẹ suọi ba ukpọn utẹ. Ọkha wi iyọ, ọfu ukpọn ọgbọn ni a, bi ukpọn ọgbọn la hian, ọkhi ma ukpọn ute. ³⁷ Iyọ gbọ, uanha ziọ lọ kwẹ ẹyọn ọgbọn hiu uko utẹ. Ọkha wi iyọ, ẹyọn ọgbon ni erọ gbo ọlu uko a, ọlẹ ẹyọn erọ gbe kwa, ọlu uko ọ fua. ³⁸ Sokpẹn ẹyọn ọgbọn a kwọ, hiu uko ẹyọn ọgbọn. ³⁹ Aimi uanha, lọ da ẹyọn utẹ fo, lọ che hoẹ ẹyọn ọgbọn, irumu erọ ta 'Ẹyọn utẹ ọhọmọn lẹ.'''