¹ Ijesu rẹ gbo tama ivbi eimi ghọ, ''Ọmọhe lọfe ọkpa riọ lọ mọọ ọlọ rẹo hie emi ghọi, arẹ gumai khọ ọlọ rẹo hie emi ghọ, ọ we ebọ mọin kwa. ² Ọhiọni ọmọhe lọfe na kirẹ chọ, 'Emi bia họn na khua u? Zi mẹn miẹn ẹgbẹ luda re emi eesẹn shan, ọhiọ ukhu che mati wọ ọlọ re ẹo hie emi mẹn.' ³ Ọlọ ọmọhe lọ rẹo hi emi na kirẹ tama egbe ghọ, Emi bi kio u na, ẹgbẹ lọda kiẹn ọga mẹn ọmemẹn obia? Ii mọe eti obia ime, ikhi gbo mati kha vbie emi shan shan. ⁴ I iẹn ebiou, akha ki khu mẹn vbo obia, la agbọn da kha gaobọ mumẹn vbo oa iẹn.' ⁵ Ọlọ ọmọhe na ọkirẹ chọ otuọ ọkpọ kpa lọ mọi ọga ghọ osa, ọ rẹ nọ ọlọ kpodao ghe, 'Eka lu mọọ ọga mẹn?' ⁶ Ọ rẹi, 'Egbọe ihẹẹn adana evbii.' Ọ kirẹ tamai, We ebe osa wẹ tua deha viọn egbọe eva ikpeghi igbe.' ⁷ I yọ ọda gbo tama uanha ọvbee, 'Eka osa luo? Ọ rẹi, 'Egbọe ihẹẹn adana oghẹ ẹlubọ.' Ọ kirẹ tamai, 'We ebe osa wẹ, tua viọn egbọe ẹnẹ.' ⁸ Ọga ghọi kirẹ cha obọ nọ ọlọ rẹo hie emi ghọ, irumu khọ ọzaza vbe ebọu. Ọhiọ ivbiẹ ọlagbona zaza lẹ ivbiu urukpa, si yan kpa eloghi iẹn we. ⁹ I tama vba, vba mọọn ọlogho ne egbe vba rẹ shan ẹfe oghọ ọla agbọna, lada miẹn ọkha fo, lian da gaobọ wẹn ovbe ehe lọi mọin irẹso. ¹⁰ Uanha lọ wa ata vbe emi khereẹ, yon wa ata vbe ebọ bu, iyọ gbo ọ ọlọi wa ata vbe emi khereẹ ọkhi gbo wa ata vbe ebọ bu. ¹¹ Ọkhau khu ya wa ata, vbi iwemi ẹfe oghọ ọlagbọna, dọ ọlọ wẹn ẹfe ogha ata hiẹ vbọ obọ? ¹² Iyọ gbo ọ, sọu khu u wa ata vbe emi uanha ọvbee, dọ ọlọ we egho ogho wẹ na? ¹³ Ibọi ziọ lọ mati ga ọga eva, ọhiọ elọ mati khọẹkẹ ọkpa, ọ họmẹn ẹkẹ ọzeva, da ọkha rẹ hiọ ebọ ọkpa tai, lẹ ọzeva. Ukhu mati ga Oisẹlẹbua bie ẹfe.'' ¹⁴ Bọna ekhẹn Ifarisi, lian họnmẹn ẹkẹ egho, he elemina eesẹn, yan ria ru unu gbọ. ¹⁵ Ọ rẹ tamai iẹn, ''Vba ra ase ne egbe vba vbọ odao agbọn, sokpẹn Oisẹlẹbua ẹn udu vba eesẹn. Emi lọ wọ ukoto vbo odao agbọn, alẹ ọ vbo odao Oisẹlẹbua. ¹⁶ Uhi bie ekhẹn iwọli riọ, ọkpẹ sẹ Ijọni vae. Rẹ da ọlẹghẹ re, aniyẹnlọsẹn oghi ẹghẹ ọba Oisẹlẹbua era we wọ, agbọn eesẹn ọ gba ayẹn egbe lian da ovbọ. ¹⁷ Sokpẹn, ọkea la agbọn bio okhumu eimi rẹ rare, lẹ ukpe emi ọkpa la vi oghi uhi lọ khi da sẹẹ. ¹⁸ Uan ikhuan lọ khuọ ọse ghọ, ọdọ che riọ ọkhuoo ọvbee lọ fiọ ọdọ a, wọ ọkhọọ ozọlọ. ¹⁹ Bọna ọmọhe ọkpa riọ ọlọ fe, lọ kwu ukpọn igbegbe bie elọ họnmo osẹn hiegbe, ọ ria gbo ọẹghẹn ẹfe ghọ ẹdẹ dẹ. ²⁰ Ọlọ vbie emi shan shan la chọi Ilazarọsi, awọn mẹnhẹn vbe hee la shan ovbo oa ghọ, egbe ghọi ẹmẹn mai ọvọn, ²¹ e rọ hoo, lada kha re e ebae lọ dele kwo otọ vbi itebu oghọ ọlọ ọmọhe, ni iọn e. Era awa ọ vae da kha lale elẹ ẹma ghọ. ²² Ọrẹ da ruain khọ ọmọhe lọ vbi emi rẹ da uu ekhẹn angẹli rẹ da wọn ye ehe Ebrahamu. Ọmọhe lọ fe ni rẹ gbo uu arẹ tọn, ²³ vbẹkẹ erẹn ọkhueo, ẹgbẹ lọda oya, ọ rẹ khua ẹo yo oke, ọ rẹ daghe Ebrahamu vi idale bi Ilazarọsi vbi ichobọ ghọ. ²⁴ Ọ rẹ khuee dian re, ọ rẹi, 'Era Ebrahamu, mọin ituẹkẹ imẹn, ji Ilazarọsi, lọda fiu ukpo ghọ ovba amẹn rẹ so mẹn vbu unu, lo oẹn mi ọre, ọhiọ oya I ri vbo oẹnmi erẹn na ²⁵ Sokpẹn Ebrahamu rẹ ọi, 'Ọmọn, e ree vbẹ ẹghẹ agbọn wẹ, u mie emi lọsẹn wẹ mẹ, iyọ gbo ọ Ilazarọsi emi ọbe ọ miẹn me. Sokpẹn bọna ẹkẹ ọfure ọki ri vaan, wẹwẹ u ri ioya. ²⁶ Vbi ira ena eesẹn, uoo gidigbi rie esesẹ ma, lada miẹn, elọu khian fan rare da ean re da miẹn khi mati, iyọ gbo ọ, uanso ziọ lọ mati da evbọ re, da ga ma yẹn.' ²⁷ Ọlọ ọmọhe lọ fe ni rẹi, 'I vbabọ na, Era Ebrahamu, luda jọ rẹ oa era mẹn— ²⁸ ọhiọ I miọn imiọn ihẹẹn imọhe—lọda hian ukẹkẹ ni iẹn, ọhiọ ilofẹn lian khi da vae vbe ehe ioya na.' ²⁹ Sokpẹn Ebrahamu rẹ ọi, 'Yan mọin Imose bie ekhẹn iwọli, lian daehọ iẹn.' ³⁰ Ọlọ ọmọhe lọ fe ni rẹ anjẹn, 'Eyee, Era Ebrahamu, sokpẹn akha miu uanha lọda vbu uu ọdọ ga iẹn yẹn, elian mọin ioẹkẹ deluẹẹn.' ³¹ Ebrahamu rẹ tamai, 'Si yain daehọ Imose bi ekhẹn iwọli, yan khi gbo miehọn su uanha da vbuse eliu ulo re.'''