¹ Vbọ ọlẹghẹ ni, agbọn eboo lian rie eheni rẹ tamai ẹgbẹ li Ipaleti da rẹ ẹre ekhẹn Igalili eboo ba vbi iwabo iẹn. ² Ijesu rẹ anjẹn, ọ rẹ tamai iẹn, ''Vba ẹgbe ele ekhẹn Igalili na, yan ọwọ ọkhọọ le ekhen Igalili elikẹ, irumu yan oya ina? ³ Eyiee, I tama vba. Sokpẹn si vbai mọi ioẹkẹ deluẹẹn vbavba eesẹn, iyọ vba da gbo khueo. ⁴ Da ele etui kẹ eva su uee ni, vbi Isiloamu lo odu de gbe, lian ulo, eri vba ẹgbe yain, yan ọwọ ọkhọọ lẹ imọhe elikẹ vbi Ijerusalẹmu? ⁵ Eyiee, I tama vba. Sokpẹn si vbai mọi ioẹkẹ deluẹẹn vbavba eesẹn ọgbo khueo.'' ⁶ Ijesu rẹ kpọ ọli itan na mai iẹn, ''Uanha mọọ oran ikpẹ ikọmi hi ime ghọ, ọ rẹ vae da hoo imọnmi ghọ, sokpẹn ọi miẹn ukpọ kpa vbọ. ⁷ Ọlọ ọmọhe lọ mọọ ọli ime kirẹ guma uan lọ rẹo hiọ, 'Kaoghọ vbẹkẹ ikpe eha, iki, da vae si mẹn mi imọnmi ọlo oran na, I miẹn. Fiọ gbe. Bọzẹ lọ ro kha fuọ ọlo otọ a?' ⁸ Ọlọ Ọmọhe lọ rẹo hiọ, kirẹ anjẹn, ọ rẹi, 'Sẹ zọo obọ ọlukpe na, li mẹn rẹo hiọ lọsẹn, bi li mẹn che ri ikhumu hiọ. ⁹ Ọkha ki mọn ukpe gbe, ọhọnmọn, sọi ki mọn, ahiain fia!''' ¹⁰ Bọna Ijesu ria ma emi vbi isinagọgu ọkpa vbẹ ẹdi Isabati. ¹¹ Ọkhuoo ọkpa riọ vbi ikpe kẹeva su uee, lọ mọe eti ebi ọẹmẹn, erọ guẹnre, ọya mati khuae egbe yo oke muzẹ lọsẹn. ¹² Ẹghẹ li Ijesu kirẹ miọn, ọ rẹ chọ, ọ rẹi, ''Ọkhuoo mọi idafan vbọ ọẹmẹn wẹ.'' ¹³ Ọ rẹ wo obọ hiọ vbegbe, agala agala ni, ọ re khuae egbe yo oke kha rọ ọkhai jo Oisẹlẹbua. ¹⁴ Sokpẹn elọ ri Isinagọgu shan, ria miohun irumu Ijesu wu uan egbe daan vbẹ ẹdi Isabati. Eeni ọlọ ri iẹn shan kirẹ tamai ela agbọn ''Ikpẹdẹ ehan riọ la ria bia. vba vae da mọi iwegbe daan vbọ ọlẹghẹ, ọi wẹ ẹdi isabati.'' ¹⁵ Ọlọmọima rẹ anjọi ta, ''Agabagede! Vba ya koo ikẹtẹ kẹtẹ da ẹmẹla vba avbọ, ọdọ rọi anmẹn vbẹ ẹdi Isabati? ¹⁶ Iyọ gboọ ọlo ovbie Ebrahamu na, le esu gba vbẹkẹ ikpe kẹ eva su uee, akhi koọ a, vbẹ ẹdi Isabati?" ¹⁷ Ẹgbẹ lọda ta elemina, ẹkhọ ria we elian suọi ẹzọ, sokpẹn elo obotu ria ghọn ghọn hie emi ọkhai eesẹn lọu. ¹⁸ Eeni Ijesu rẹi, ''Bẹ ẹghẹ ọba Oisẹlẹbua khọn, bio mati rọ oo? ¹⁹ Ọrẹ bẹ ẹgbẹ, ikpẹ imọsadi lọ ọmọhe mu rẹ kọ vbu ugba ghọ, ọrẹ zẹre kio oran lọ gba, ofiami rẹ kwẹ ẹkoo hi ikalabọ ghọ.'' ²⁰ Ọ rẹ gbo che ta ''Emi bio mati rẹ ẹghẹ ọba Oisẹlẹbua oo? ²¹ Ọrẹ bẹ ẹgbẹ ọkhuoo lọ wi iyisiti ba adana eha oghẹ ẹlubọ, sẹ ẹghẹ lọ hẹnre.'' ²² Ijesu rẹ yẹ ẹvboo ọkpa kpa bi iguee ẹgbẹ lọda yi Ijerusalẹmu, ọ ria mai iẹn emi. ²³ Uanha rẹ ọi, ''Ọlọmọima, ikpe ke eboo ọ mọọ amefe?'' Ọhiọni, ọ rẹi iẹn, ²⁴ ''Vba gba ayẹn egbe li vba da ovbo odẹ lọi vbẹ, irumu elọbu yan li izeze, yan khi mati ovbọ. ²⁵ Ọlọ mọọ oa kha da kpare fiodẹ, eeni, vba muzẹ vbo oee kha solo obọ vbu unu ukhuẹdẹ, kha ta, 'Ọlọmọima, Ọlọmọima, zima ore. 'E rọ anjẹn, ọi, 'Ii ẹn vba, da ehe li vba da vae.' ²⁶ Eeni vbada ta, 'Ma e ebae da ẹyọn vbo odao wẹ, ugbo ma agbọn emi vbu ukhuẹdo oee ma.' ²⁷ Sokpẹn erọ anjẹn, 'I tama vba, Ii ẹn ehe li vba da vae. Vba kpaa odao mẹn re, vbavba ekhẹn izẹkẹ ọbe. ²⁸ Evbiẹ bi ẹkọn ainmi mi ohe vbọ, si vba mie Ebrahamu, Aiziki, Ijekọbu bi iwọli eesẹn vbẹghẹ ọba Oisẹlẹbua, sokpẹn vbavba—akhu vba fia. ²⁹ Agbọn ọda vbi imẹre ọẹẹn re, bi ideo ọẹẹn, odao ọẹẹn bi ehimi ọẹẹn, yan fietian vbe ehe la da e ebae vbẹghẹ ọba Oisẹlẹbua. ³⁰ Vba gbo ẹn ọna, eliain mọu ukoto, yain yan ọkpodao, bie elian zemi mọu ukoto, yain yan we elian kpe ehimi.'' ³¹ Vbẹkẹ khọi tẹ gbe, ekhẹn Ifarisi rẹ buọ re, yan rẹi,''Kha shan kpaa vaan re, irumudi Ihẹrọdu ọ hoo khọ gbẹ vbu udi.'' ³² ''Vba kha shan vba tama ọlo oee ni, 'Kaghọ, I khue etiebi, gbo wan agbọn egbe daan ẹẹ bia akhuẹ, ukpẹdẹ lọ zeha, erio fo obia mẹn.' ³³ Ọrẹ kpẹ de iyọ, ọehiọ lida kha bio obia mẹn shan ẹẹ, akhuẹ, bi ukpẹdẹ lọ diain, ẹgbẹ lọda kiẹn aya yanma gbi iwọli vbe ehọ ọvbee lọi wi Ijerusalẹmu. ³⁴ Ijerusalẹmu, Ijerusalẹmu, wẹwẹ lu gboo ekhẹn iwọli gbo rudo gboo ela jerẹ. Ẹghẹ eesẹn I ria hoo li mẹn rẹ sili ivbiẹ koko, ẹgbẹ li iyọn ọkhọkhọ da sili ivbiọ koko, ra abiyẹn ghọ voo iẹn, sokpẹn u hoo ọna. ³⁵ Kaoghọ, oa wẹ era fiọ. I tama, ukhi miẹn mẹn rẹ sẹ ẹghẹ lu ro ta, 'Iyanba ọ rẹ jọ ọlọ vae vbe eii Ọlọmọima.'''