¹ Ọhiọni, vba zuan robọ vbọ eba sẹnẹ mama vbi ẹwẹn owewe Ikiristi, era kha zọ oẹ yodao yi iohiami, akhi che kha fi igbotọ oghọ ioẹkẹ deluẹẹn da vbọ obia lian ulo re bi oghọ adiuduan Oisẹlẹbua, ² da igbotọ imami oghọ afio vbamẹn, arobọ hi uan vbu uhọnmọn, ashọ kpare da vbu uu re, bi ighaẹzọ itẹtẹbitẹ. ³ Eri ma gbo wọna ọkhau khọ Oisẹlẹbua yanma. ⁴ Ọhiọ ọwe ebọ mianmi ni elian mian ata, lian bia ọẹghẹn oghọ okhumu eimi ghe, lian mọi ikẹmi vbi Eti Lọfuẹn, ⁵ lian gbo runu suọ egbegbe ta Oisẹlẹbua bi itotomi agbọn lọ che dẹ, ⁶ lian che de fia---ọwe ebọ mianmi lada che wiẹn dọ ioẹkẹ deluẹẹn re. Erumu erian che dobọ iẹn deli ovbi Oisẹlẹbua lọ ọmọhe che so yẹn vbọ oran ọgbiyẹn, che rọ kiẹn eba agbọn ria gbe eghẹẹ. ⁷ Ọhiọ otọ lọ ki mi amẹn lọ rọ kuọ, lọ họnmọn ebae nọ ọlọ win ime vbọ, erọ mi iyanba me vbo obọ Oisẹlẹbua. ⁸ Sokpẹn ọkhau igbẹn bi ishako ọ mọn, ai mie eba rọu ọri okhena afiunu ni ikpemi ghọ afi erẹn hiọ. ⁹ Ma kha rẹ kha gu iyẹnmi ina, elogho mẹn, ọmu ma ẹo kuere vbi egbegbe mi lọ ri uẹẹn vba gbo khọ emi amiefe. ¹⁰ Ọhiọ Oisẹlẹbua mọi ata sẹ ọkhi ee obia li vba biai a, bi ihọnmẹkẹ li vba rẹma ni eii ghọ, vbọ ikpabọ li vba rẹ nọ eli miehọn lọu vba kpẹ wọ niẹn bọna. ¹¹ Ọgbo wọ aoo ma li vba da mọi aoo ọkpa li vba rudu hi sẹ vbi irẹso. ¹² Mai hoo li vba kiẹn elọ kha si okhoo, sokpẹn etini li vba kiẹn elọ regbe oo elian uku iruọmi rẹ shan adiuduan bi oziẹn. ¹³ Ọhiọ ẹghẹ lọ Oisẹlẹbua rẹ wi iruọmi ni Ebrahamu, egbe ghọ ọrẹ gbile, lọ rẹ kiẹn khọ ọkhi mati we uan ọvbee. ¹⁴ Ọrẹi, "Vbata Iro ri iyanba na, Erio gbo zọ uanmi wẹ bu hiọ." ¹⁵ Vbi ina, Ebrahamu mi eba gbi iruọmi ghọi nọ me, ẹghẹlọ rẹ mọi oziẹn khẹ ọ. ¹⁶ Ọhiọ agbọn rọ emi lọ gbalẹ iẹn eọ, vbi itua unu iẹn erian rọ eọ foọ. ¹⁷ Ẹghẹ lọ Oisẹlẹbua rẹ ta khiọn rọma elian uku, lọsẹn, ẹgbẹ la khi da mati dele iruọmi lọ ruọ, erọ rọ eọ ra aẹn hiọ. ¹⁸ Erọ wọina lada miẹn khọ rẹ shan emi eva la ya dele, lọu khọ ọmiami lo Oisẹlẹbua da ro era, mama li ma lẹ hee nọ okhena, lima da mọọ iria khaa lọ toto kuobọ shan ebi ma rudu hi lọ ri ma vbo dao ¹⁹ Udu ma sotọ vbọ na ẹgbẹ emi lọ ya reghe gbo kuọ eti egbe ma shan i, arudu hi lọ riọ ira ukhuẹdẹ. ²⁰ Eri Ijesu ovbọ ima ẹgbẹ ọlọ Kpodao, ẹgbẹlọ da kiẹn ohẹẹn lekhua oghi itẹtẹbitẹ vbi ehe Imẹnchizẹdẹki