^{1 2 3} 1ಅತಿಂಡು ಶ್ಯನ ಪ್ರಿಯರನ ಇಷ್ಟರಾಯಿಕ್ರ ನಟ್ಟು ಅನ್ನಬೇಮ್ಬಿಮಾರೆ ,ನಟ್ಟು ಸಂತೋಷ ಕಿರೀಟ ಆಯಿಕ್ರ ನಟ್ಟು ಪ್ರಿಯರೇ ಕರ್ತನ್ಕುರು ದೃಡವಾಯಿ ನಿಲ್ಲಂಗೋ . 2 ಕರ್ತಕುರು ವಂಡೆ ಮನಸ್ಸುಳ್ಳವಾರಯಿಕ್ಕುರ್ದುಯಿಂಡು ಯುವೋದ್ಯಳನ್ನೂ ಸಂತುಕೆಯನ್ನ ಬೇಡಿಗ್ಯರೆ . 3 ನಿಜ ಜೊತಿಮೆನಿಯಿಕ್ರವಾನೆ.ನೀನು ಆ ಪಂಲಾಲ್ಕಿ ಸಹಾಯಕನಾಯಿ ಇಕುರ್ದುಯಿಂಡು ನೀನ ಬೇಡಿಗ್ಯರೆ .ಆಗ್ಯ ಕ್ಲೇಮೆನ್ಸ್ ಮುಂತಾನ ನಟ್ಟು ಜೊತಿಮೆನ್ನಿ ಪಾನಿಸೈರಗ್ಯ ನಾನು ಸುವಾರ್ತೆಗೋಸ್ಕರ ಪ್ರಯಾಸಪಟ್ಟಿಕ್ರಗ್ಯ .ಆಲ್ಟ ಪೇರು ಜೀವಗ್ರಂಥತ್ಕುರು ವರ್ಜಿದು. ^{4 5 6 7} 4 ಎಪೋದು ಕರ್ತನ್ಕುರು ಸಂತೋಷಿಸಂಗೋ ;ಸಂತೋಷವಾಯಿರೊಂಗೋ ಇಂಡು ನಾನು ತಿರ್ಗಿ ಸೋನ್ನರೆ . 5 ನಿಗ್ಟ ಸೈರಣೆಯು ಆದಿ ಮನುಷ್ಯರ್ಕು ಗೊತ್ತಾಗೊಟ್ಟು ;ಕರ್ತನು ಹತ್ತಿರವಾಯಿದು . 6 ಎದ್ದೇ ವಿಷಯತ್ಕುರು ಚಿಂತಿಸೈದೇ ಸರ್ವಾವಿಷಯತ್ಕುರು ದೌರ್ ಮುನ್ಕು ಕೃತಜ್ಞತ ಸುತ್ತಿ ಪ್ರಾರ್ಥನೆ ವಿಜ್ಞಾಪಾನೇ ಸೈತ ನಿಂಗುಲ್ಕು ಬೇಕಾಯಿಕ್ರತ ತಿಳ್ಸಂಗೋ . 7 ಅಪೋದು ಆದಿ ಗ್ರಹಿಕೇನು ಮಿರೂರ ದೌರ್ತ ಶಾಂತಿ ನಿಗ್ಟ ಹೃದಯಾನ ಮನಸ್ಸುನ ಕ್ರಿಸ್ತ ಯೇಸುಕುರು ಕಾಯಕು. ^{8 9} 8 ಕಡೆತಾಯಿ ಅನ್ನಬೇಮ್ಬಿಮಾರೆ .ಸತ್ಯವಾನದು ಎದು ಪ್ರಾಮಾಣೆಕವಾನದು ಎದು ನ್ಯಾಯವಾನದು ಎದು ಶುದ್ದವಾನದೋ ಎದು ಪ್ರೀತಿಕಾರವಾನದೋ ಎದು ಮಾನ್ಯವಾನಾದೋ ಎದು ಸತ್ಯವಾನಾದೋ ಸದ್ಗುಣವಾನದೋ ಎದು ಕೀರ್ತಿಕಿ ಯೋಗ್ಯವಾನದೋ . 9 ನಿಂಗ ಎಂತ ನನ್ನಿಂಡು ಕೆಚ್ಚಿರಂಗ್ಲೋ ಹೊಂದಿರಂಗ್ಲೋ ಎಂತ ನನ್ನಿಂಡು ಕೊಟ್ಟಿರಂಗ್ಲೋ ಅತಾತೆಯ ಸೈತ ವಗೋ .ಆಪೋದು ಶಾಂತಿದಾಯಕನಾನ ದೌರು ನಿಗ್ಲೆಂಟ್ಟಿ ಇಕ್ಕಕು. ^{10 11 12 13} 10 ಇಪೋದು ನಟ್ಟು ವಿಷಯತ್ಕುರು ನಿಂಗ ಯೋಚನೆ ನಿಂಗುಲ್ಕುರು ತಿರ್ಗಿ ಚಿಗ್ರಿಕ್ರತ್ಗು ನಾನು ಕರ್ತಾನ್ಕುರು ಶ್ಯಾನ ಸಂತೋಷಪಡಾರೆ.ಈ ವಿಷಯತ್ಕುರು ನಿಂಗ ಯೋಚನೆಯುಳ್ಳವಾರಯಿಂದೇಕು ನಿಂನ್ಗುಲ್ಕು ಸಂದರ್ಭ ಸಿಕ್ಕುಲ್ಯ . 11 ಕೊರತೆಕುರು ಇರೆಯಿಂಡು ನಾನು ಇತಾತೆಯ ಸೋನ್ನುಮಾಟ್ಟೆ ;ನಾನು ಇಕ್ರ ಸ್ಧಿತಿಕುರು ಸಂತುಷ್ಟವಾಯಿಕ್ರತ ಕೆಚ್ಗೊಂಡಿರೆ . 12 ನಾನು ಬಡವನಾಯಿಕುರ್ಕು ಗೊತ್ತು .ಸಮೃದ್ದಿಯಾಯಿಕುರ್ಗು ಗೊತ್ತು .ನಾನು ತೃಪ್ತನಾಯಿಂದೆಕು ಪೆಸ್ತ್ ಗೊಂಡಿಕ್ರವನಯಿಂದೆಕು ಸಮೃರುದೀಯುಳ್ಳವನಯಿಂದೇಕು ಕೊರತೆಯುಳ್ಳವನಯಿಂದೆಕು ಎಂದ ಸ್ಥಿತಿಕುರುಯಿಂದೆಕು ಅತಾದಿನ್ನು ನಾನು ಕೇಚ್ ಗೊಂಡಿರೆ . 13 ನನ್ನ ಬಲಪಡಿಸ್ರ ಕ್ರಿಸ್ತನ ಮೂಲಕ ನಾನು ಆದಿನ್ನು ಸೈಯಾರೇ. ^{14 15 16 17} 14 ಹಿಂಗಿನ್ದೆಕು ನಿಂಗ ನಟ್ಟು ಸಂಕಟ್ಟತ್ಕುರು ಪಾಲುಗಾರರಾಯಿಕ್ರದು ನಾಲ್ಲದಾಸು . 15ಇದಲ್ಲದೇ ಪಿಲ್ಲಿಪಿತಗ್ಲೆ .ಸುವಾರ್ತೆಯ ಪ್ರಾರಂಭತ್ಕುರು ನಾನು ಮೆಕೆದೊಂಯತಿಂಡು ವರಪೋದು ಕೊಡ್ಕುರ ವಕ್ಕಿರ ವಿಷಯತ್ಕುರು ನಿಗ್ಲುಟ್ಟೆಕೇ ಬೇರೆ ಸಬೇತಗ್ಯ ನನ್ನೆಂಟಿ ಬಾಗವಾಹಿಸುಲ್ಲಯಿಂಡು ನಿಂಗುಲ್ಕು ಗೊತ್ತು . 16 ನಾನು ಧೆಸಲೋನಿಕತ್ಕುರು ಇಂದಪೋದು ನಿಂಗ ಶ್ಯಾನರಕ ನಟ್ಟು ಕೊರತೇನ ನಿಗುಸುರ್ಕು ಕೊಡ್ತು ಅಮ್ಪಿರಗ್ಲೇ . 17 ನಾನು ನಿಗ್ಲಿಂಡು ದಾನನ ಅಪೇಕ್ಷಿಸಾರೆಯಿಂಡುಲ್ಲ ಆನೇಕೆ ನಿಗ್ಟ ಲೆಕ್ಕತ್ಗು ಸಮೃದ್ದಿಯಾನ ಫಲನ ಅಪೇಕ್ಷಿಸಾರೆ ಆನೇಕೆ ಬೇಕಯಿಕ್ರದು ನಂಕುಯಿದು ,ಸಮೃದ್ದಿಯಾಯಿದು. ^{18 19 20} 18 ಎಪಪ್ರೋದಿತನ ಕೈಯಿಂಡು ನಿಂಗ ಕೊಡ್ತು ಅಮ್ಪಿಕ್ರದು ನಂಕು ತಲಿಪಿದು ನಾನು ತುಂಬಿತುಳುಕ್ರವನಾಯಿರೇ. ಅದು ದೌರ್ರ್ಕು ಮೆಚ್ಚಿಕೆಯಾನದು ;ಸುಗಂದವಾಸನೆ .ಇಷ್ಟ ಯಜ್ಞ . 19 ನಟ್ಟು ದೌರು ಕ್ರಿಸ್ತ ಯೇಸುಯಿಂಡು ತಟ್ಟು ಪ್ರಾಭಾವ ಐಶ್ವರ್ಯಕು ಸರಿಯಾಯಿ ನಿಗ್ಟ ಪ್ರತಿಯೊಂಡು ಕೊರತೇನ ನಿಗ್ಸಾಕು . 20 ನಂಗ್ಟ ಅವ್ವ ದೌರು ಆಯಿಕ್ರ ಯುಗಯುಗಾಂತರತ್ಕುರು ಮಹಿಮೆ ಇಕೊಟ್ಟು ,ಆಮೆನ್. ^{21 22 23} 21 ಕ್ರಿಸ್ತ ಯೇಸುಕುರು ಪ್ರತಿಯೊಂಡು ಪರಿಶುದ್ದರ್ಕು ವಂದನೇ .ನಟ್ಟು ಜೊತಿ ಮೇನಿಯಿಕ್ರ ಅನ್ನಬೇಮ್ಬಿಮಾರು ನಿಂಗುಲ್ಕು ವಂದನೇ ಸಲ್ಲಿಸಕ್ನು . 22 ಪರಿಶುದ್ದರದೆರು ನಿಂಗುಲ್ಕು ವಂದಿಸಾಕ್ನು .ಮುಖ್ಯವಾಯಿ ಕೈಸರನ ಉಟ್ಟಗ್ಯ ನಿಂಗುಲ್ನ ವಂದಿಸಾಕ್ನು . 23 ಕರ್ತನ ಯೇಸು ಕ್ರಿಸ್ತನ ಕೃಪೆ ನಿಗ್ಲೆಂಟ್ಟಿ ಇಕೊಟ್ಟು .ಆಮೆನ್.