^{1 2} 1 ಪರುಗುಂಡು ಅಯಿಗ್ಯ ಸಮುದ್ರುತ ಅಕ್ಕಿಡಿಕಿ ಗದರೇನರ ಸಿಮೇತ್ಗು ವಂಚುನು, 2 ಆತನು ದೋಣಿಯಿಂಡು ಬೆಲಿಕಿ ವಂದಪ್ಪೋರು, ಅಶುದ್ದಾತ್ಮವಿಂದ ಒಂಡು ಮಣುಸ್ ತಕ್ಷಣ ಸಮಾದಿಲಿಂಡು ವಂದು ಅತನತ್ತೆಯ್ಯಿ ಸಂದುಸ್ಸುಸು. ^{3 4} 3 ಇತನು ಸಮಾದಿಲಿಕೊರು ವಾಸಸೇಯ್ಯಂಚು (ಇಕ್ಕ್ಯಂಚು ), ಎದೆ ಮಣುಸ್ ಅಗೋಟು ಇತ್ತ ಸಂಕೋಲೆಲಿಂಡು ಕಟ್ಟುರುಕು ಅಗಾದೆ ಹೊಸುನು, 4 ಯಂತ್ಗು ಇಂಡೆಕೆ ಶನರಾಕ ಅತ್ತತ್ತೆಯ್ಯಿ ಬೇಡಿಲಿಂಡು ಸರಪಣಿಲಿಂಡು ಕಟ್ಟಿಂದೆಕೂ ಅಸು ಸರಪಣಿಲಾ ಪಿಚ್ಚು,ಬೇಡಿಲಾ ಹೊಡಿಕ್ಕಿರತ್ಗು ಯೆದೆ ಮಣುಸ್ ಇತ್ತ ಹತೋಟಿಕಿ ಅತ್ತೆರುಕು ಹಾಗದೆಹೊಸುನು, ^{5 6} 5 ಅದು ಪಗಮಾರಿಕಿ –ನಮಾರಿಕಿ ಎಪ್ಪೋತಿಗೂ ಗಟ್ಟುಲುಕೊರು ಸಮಾದಿಲಿಕೊರು ವದ್ರುತಾ ಕೆಲ್ಲುಲಿಂಡು ತನ್ನ ತಾನೇ ಅರ್ತ್ಗಂಚು, 6 ಅನೇಕೆ ಅದು ತೂರಿಂಡು ಯೇಸು ಸ್ವಾಮಿತ್ತೆಯಿ ಪಾತಪ್ಪೋರು, ಓಡಿವಂದು ಆತನತ್ತೆಯಿ ಆರಾದಿಸಿ. ^{7 8} 7 ಮಹೋನ್ನತ ದೇವಕುಮಾರ ಅಯಿಕ್ಕಿರ ಯೇಸುವೆ , ನಟ ಗೊಡವೆ ನಿನುಕು ಯಂತ್ಗು ? ನನ್ನ ಯಾತನೆ ಪಡುಸ್ಸುಮಾನ ಇಂಡು ನಾನು ನಿನುಕು ದವ್ರ ಅಣಿ ಅಕ್ಕ್ಯರೇ ಇಂಡು ಮಹಾಶಬ್ದತಿಂಡು ವದ್ರಿ ಸೋನ್ನುಸು, 8 ಯಂತ್ಗು ಇಂಡೆಕೆ ಆತನು ಅ ಅಶುದ್ದಾತ್ಮಕು –ಆ ಮಣುಸ್ನ ಉಟ್ಟು ಬೆಲಿಕಿ ವಾ ಇಂಡು ಸೋನ್ನಿಂಚು, ^{9 10} 9 ಆತನು ಅತ್ಗು –ನಿಟ ಪೆರು ಯಂದಾದು ಇಂಡು ಕೋಟತ್ಗು ಅದು –ನಟ ಪೆರು ಲಿಜೇನ್ (ದಂಡು ); ಯಂತ್ಗು ಇಂಡೆಕೆ ನಂಗ ಶನೇರು ಇರೋ ಇಂಡಸ್, 10 ತಂಗುಲಾನತ್ತೆಯಿ ಆ ದೇಶತಿಂಡು ಬೆಲಿಕಿ ಅಂಪುರ್ದಲ್ಲ ಇಂಡು ಷನಾ ಕೋಟುಗೊಂಡುಸ್ಸುನು. ^{11 12 13} 11 ಅಪ್ಪೋರು ಅಟಿ ಗಟ್ಟುಲಾ ಕಿಟ್ಟುಕೋರು ಪಂಡ್ರಿಗ್ಯ ಮೆಯ್ಯಿತಿಂಚುನು. 12 ಅದ್ದಿ ದವ್ವಂಗ ಅತನತ್ತೆಯ್ಯಿ – ನಂಗ ಆ ಪಂಡ್ರೀಲಿಕೊಕು ಸೇರಿಗಿರ್ಕನಿ ನಂಗುಲುನಾ ಅಂಪು ಇಂಡು ಕೋಟುಗೊಂಡುಸ್ಸುನು 13 ತಕ್ಷಣ ಯೇಸು ಅಯಿಲಿಕಿ ಅಪ್ಪಣೆ ಕುಡುತ್ಸ್ಸು, ಅಪ್ಪೋರು ಅ ದವ್ವಂಗ ಬೆಲಿಕಿ ವಂದು,ಅ ಪಂಡ್ರೀಲಿಕೊಕು ಸೇರಿಗೊಂಡುಸ್ಸುನು; ಮತ್ತೆ ಅ ಪಂಡ್ರಿಲಿತಾ ಗುಂಪು ಉಗ್ರತೆಯಿಂಡು ಓಡಿ ಇಳಿಜಾರಿಂಡು ಸಮುದ್ರುವುಲ್ಲಿಕಿ ಬೂದು ಉಸುರುಗಟ್ಟಿ ಶತ್ತುಸ್ಸನು,(ಅಯ್ಯ ಸುಮಾರು ರಂಡು ಸಾವುರಾ ಪಂಡ್ರಿಗ್ಯ ಇಂಚುನು,) ^{14 15} 14 ಅಪ್ಪೋರು ಪಂಡ್ರಿಲಾ ಮೆಯ್ಯಿಸ್ಸಿತಿಂದಯ್ಯ ಓಡಿಹೊಯ್ಯಿ ಊರುಕೋರು ಮತ್ತೆ ಸುತ್ತಮುತ್ತ ಅದ್ದಿಜಾಯಿನು ಸುದ್ದಿ ಸೆಂಚುನು, (ಸೋನ್ನುಸುನು,) ಅಪ್ಪೋರು ಅಯಿಗ್ಯ ನಡದ ಸಂಗತಿ ಯಂದಾದು ಇಂಡು ಪಾಕುರುಕು ಹೊಸುನು, ಅಯಿಗ್ಯ ಯೇಸುನಂಚುಗು ವಂದಪ್ಪೋರು 15 ಅ ದವ್ವಂಗಲಾ ದಂಡು ಪುಡಿಸ್ಸಿಂದ ಮಣುಸ್ ನಲ್ಲ ಬಟ್ಟುಲಾ ಹೋಟುಗೊಂಡು ಸ್ವಸ್ಥಚಿತ್ತತಿಂಡು ಉಕ್ಕೊಂಡಿಕ್ಕಿರತ್ತ ಪಾತು ಅಯಿಗ್ಯ ಬಿತುಗೊಂಡುಸ್ಸುನು, ^{16 17} 16 ಅತ್ತ ಪಾತ್ತಾಯ್ಯ ದವ್ವು ಪುಡುಸ್ಸಾತ್ಗು ಅನ್ನತ್ತೂ ಆ ಪಂಡ್ರ್ಲಿತಾ ವಿಷಯನೂ ಸೋನ್ನುಸುನು, 17 ಅಪ್ಪೋರು ಅಯಿಗ್ಯ ತಂಗುಲಾತ ಮೇರೆಲೆತ್ತೆಯ್ಯಿ ಉಟ್ಟೋಟು ಹೋಗುರುದು ಇಂಡು ಅತನತ್ತೆಯಿ ಕೋಟುಗುತಾಲ್ಸ್ಸುನು, ^{18 19 20} 18 ಆತನು ದೋಣಿವುಲ್ಲಿಕಿ ವಂದಾಪ್ಪೋರು ಆ ದವ್ವು ಪುಡಿಸ್ಸಿಂದ ಮಣುಸ್ ತಾನು ಅತ್ತೆಂಟೆ ಇಕ್ಕ್ಯರೆ ಇಂಡು ಅತನತ್ತೆಯಿ ಕೋಟುಗೊಂಡುಸು, 19 ಅತ್ಗು ಯೇಸು ಒಪ್ಪದೇ ಅ ಮಣುಸ್ನುಕೂ –ನಿಟ ಉಟುಕೂ ಮತ್ತೆ ನಿಟ ದೋಸ್ತುಮರಂಚುಗು ಹೊಯ್ಯಿ ,ಕರ್ತನು ನಿನ್ನ ಮೆನಿ ಕರುಣೆ ಅಚ್ಚು, ನಿಕೂ ಯಾಂತ ಮಹಾತ್ಕಾರ್ಯತ ( ಉಪಾಕರತ) ಸೇಂದಿದು ಇಂಡು ಅಯಿಲಿಕಿ ಸೋನ್ನು ಇಂಡಸ್, 20 ಅದು ಹೊಯ್ಯಿ ಯೇಸು ತಾನುಕು ಯಂತಾ ಮಹಾತ್ಕರ್ಯಲಾ ಸೇಂದಿದು ಇಂಡು ದೇಕೆಪೋಲಿಯತ್ಗೊರು ಪ್ರಕಟಿಸಲಾರಂಬುಸ್ಸುಸು,ಅಪ್ಪೋರು ಅದ್ದಿನೂ ಆಶ್ಚರ್ಯ ಪಟ್ಟುಸ್ಸುನು, ^{21 22 23 24} 21 ಯೇಸು ತಿರ್ಗಿ ದೋಣಿಕೊರು ಅಕ್ಕಿಡಿ ದಂಡಿಕಿ ವಂದಾಪ್ಪೋರು ಶಾನಾಳು ಅತನಂಚುಗು ಕೂಡಿ ವಂಚುನು ; ಅಪ್ಪೋರು ಆತನು ಸಮುದ್ರುತಾಂಚಿಲಿ ಇಂಚು, 22 ಅಪ್ಪೋರು ಇದೋ,ಸಭಾಮಂದಿರತ ಅದಿಕಾರಿಲಿಕೊರು ಯಾಯಿರ ಇಂಗ್ರಾ ಒಂಡು ಮಣುಸ್ ವಂದು ಅತನತ್ತೆಯ್ಯಿ ಪಾತು ಆತನತ ಕಾಲುಲೂಕು ಬೂದು. 23 ನನ್ನ ಚಿನ್ ಮಗಾ ಸಾಗುರಾ ಸ್ಥಿತಿಕೋರು ಬೂದುಗೊಂಡಿದು, ಅದು ನಲ್ಲಾಗು ಅಗುರುಕನಿ, ನೀನು ವಂದು ನಿಟ ಕೈಲಾ ಅತ್ತಮೆನಿ ಅಯ್ಯಿ ; ಅಪ್ಪೋರು ಅದು ಪಾಕ್ಯಾದು ಇಂಡು ಅತನತ್ತೆಯಿ ಶನ ಕೋಟುಗೊಂಡುಸು, 24 ಅಪ್ಪೋರು ಯೇಸು ಅತ್ತಂಟಿ ಹೊಸು;ಮತ್ತೆ ಶಾನಾಳು ನೂಕಾಡುತಾ ಆತನ ಪಾರುಗೋಟೆ ಹೊಸುನು. ^{25 26 27} 25 ಅಪ್ಪೋರು ಪನ್ನೆಂಡು ವಾಟುಕಾಲಿಂಡು ರಕ್ತ ಸ್ರಾವವಿಂದ ಒಂಡು ಪಂಬುಳಾದು. 26 ಶನ ವೈದ್ಯರುಕು(ಡಾಕ್ಟುರುಲುಕು ) ಕಾಟಿ ಶನ ಕಷ್ಟು ಅನುಭವಿಸಿ, ತಾನುಕು ಇಕ್ಕಿರಾತ್ತದ್ದಿ ಕರ್ಚು ಸೆಂದೆಕೂ ಅರಾಮಗಾದೆ ಇನ್ನು ಹೆಚ್ಚಾಸು, 27 ಅಪ್ಪೋರು ಅ ಪಂಬುಳಾದು ಯೇಸುಬಗ್ಗೆ ಕೋಟು ಜನುರತಾ ಗುಂಪುತಾ ಪರುಗೋಟೆ ವಂದು ಯೇಸು ಸ್ವಾಮಿತಾ ಬಟ್ಟು ಲಾ ತುದಿಗೊಂಡೆತಾ ಮುಟ್ಟುಸು. ^{28 29} 28 ಯಂತ್ಗು ಇಂಡೆಕೆ ಅದು ---ನಾನು ಅತನತಾ ಬಟ್ಟುಲಾ ತುದಿ ಗೊಂಡೆತಾ ಮುಟ್ಟುನೇಕೆ ಶನ , ತಾನು ಆರಾಮು ಅಕ್ಕುರೆ ಇಂಡುಗೊಂಡಿ೦ಚ್ಚು, ತಕ್ಷಣ, 29 ಅತ್ಗು ರಾಗೂ ಹೋಗುರಾದು ನಿಂಡ್ರೋಸು, ಅಪ್ಪೋರು ಆ ಜಾಡ್ಯತಿಂಡು ತಾನುಕು ಅರಾಮಸು ಇಂಡು ಅತ್ಗು ಗೊತ್ತಸು, ^{30 31 32} 30 ತಕ್ಷಣ ಯೇಸು ತಾನ್ನಿಂಡು ಶಕ್ತಿ ಹೊರುಟುಸ್ಸು ಇಂಡು ತನ್ನೂಲ್ಲೆ ತಿಲ್ಜುಗೊಂದು ಪರುಕೂ ತಿರ್ಗಿ, --ನಟ ಬಟ್ಟಲಾ ಮುಟ್ಟುನಯ್ಯ ಯಾರು ? ಇಂಡು ಕೋಟಾತ್ಗೂ. 31 ಆತನ ಶಿಷ್ಯರು ಅತಾನುಕೂ – ಜನು ಸಮೂಹ ನಿನ್ನ ನೂಕಾರತ್ತ ಪಾತೂ , --ನನ್ನ ಮುಟ್ಟುನಯ್ಯ ಯಾರು ?ಇಂಡು ನೀನು ಕೊಕಾರಯೇ ಇಂಡಸ್ನು, 32 ಅನೇಕೆ ಆತನು ಇತ್ತ ಸೇಂದತ್ತ ತಾನು ಪಾಕುರುದು ಇಂಡು ಸುತ್ತಾ ಪಾತುಸು. ^{33 34} 33 ಅಪ್ಪೋರು ಅ ಪಂಬುಳಾದು ತನ್ನುಕೊರು ಅನ್ನತ್ತಾ ಪಾತು,ಬಿತುಗೊಂಡು ನಡುಗುತಾ ವಂದು ಆತನ ಮುನ್ನುಕು ಅಡ್ಡಬೂದು ಸತ್ಯಾತದ್ದಿ ಅತನುಕು ಸೋನ್ನುಸು, 34 ಅಪ್ಪೋರು ಆತನು ಅತ್ಗು –ಮಗಲೇ , ನಿಟ ನಂಬಿಕೆನೆ ನಿನ್ನ ಆರಾಮುಸೆಂಚು; ಸಮಾದಾನ ತಿಂಡು ಹೋ; ನಿಟ ಜಾಡ್ಯತಿಂಡು ನೀನು ಅರಾಮಾಗು ಇಂಡಸ್. ³⁵ 35 ಆತನು ಇನ್ನು ವಸ್ಸೇತನೆ ಇಂದಾಪ್ಪೋರು ಸಭಾಮಂದಿರತ ಅದಿಕಾರಿತಾ ಉಟಿಂಡು ಕೆಲವುರು ಆಟಗು ವಂದು,--ನಿಮ್ ಮಗ ಶತ್ತೊಯಿದು; ಬೋದಕನುಕು ಇನ್ನು ತೊಂದರೆ ಪಾಡುಸ್ಸುರಾದು ಯಂತ್ಗು ? ಇಂಡಸ್, ^{36 37 38} 36 ಇತ್ತ ಕೋಟು ತಕ್ಷಣ ಯೇಸು ಆ ಸಭಾಮಂದಿರತ ಆದಿಕಾರಿಕಿ –ಬಿತ್ಗು ಮಾನ , ನಂಬಿಕೆ ಮಾತ್ರ ಇಕ್ಕೆಟು, 37 ಆತನು ಪೇತ್ರ,ಯಾಕೊಬ,ಯಾಕೊಬನ ಸಹೋದರನಯಿಕ್ಕಿರ ಯೋಹಾನ ಇಯ್ಯಿಲಾ ಉಟ್ಟು ಬೇರೆ ಎತ್ಗು ತಟ ಪಾರುಗೋಟೆ ವರ್ರುಕು ವುಡುಲ್ಲಾ , 38 ಆತನು ಸಭಾಮಂದಿರತ ಅಧಿಕಾರಿತಾ ಉಟುಕೂ ವಂದು,ಗೊಂದಾಲಾತ ಶನ ಗೋಳಾಡುತ್ತಾ ಅಗುರತ್ತಾ ಪಾತುಸು, ^{39 40} 39 ಆತನು ವುಲ್ಲಿಕಿ ವಂದಾಪ್ಪೋರು ಅಯಿಲಿಕಿ –ನಿಂಗ ಗೊಂದಲಾ ಸೇಯ್ಯಿರಾದು ಅಗುರಾದು ಯಂತ್ಗು ? ಸಿನ್ನಾದು ಸಗುಲ್ಲ; ವರ್ಕು ಸೇಯ್ಯಿತಿದು ಇಂಡಸ್, 40 ಅಪ್ಪೋರು ಅಯಿಗ್ಯ ಅತನತ್ತೆಯ್ಯಿ ಹಾಸ್ಯ ಸೆಂದು ಸಿರ್ಸ್ಸುಸುನು,ಅನೇಕೆ ಆತನು ಅಯಿಲಾದ್ದಿನು ಬೆಲಿಕಿ ವೋಟು ಅ ಸಿನ್ನಾತ್ರ ತಾಯಿ –ದೋಪು ಮತ್ತೆ ಅತ್ತಂಟಿ ಇಂದಯ್ಯಲಾ ಅಗುಸ್ಸುಗೊಂಡು ವುಲ್ಲಿಕಿ ಸಿನ್ನಾದು ಬೂದುಗೊಂಡಿಕ್ಕಿರಜಾಯಿಕಿ ಹೊಸುನು, ^{41 42 43} 41 ಮತ್ತೆ ಆತನು ಅ ಸಿನ್ನಾತ್ರ ಕೈ ಪುಡುಸ್ಸು ಅತ್ಗು ---ತಲಿಥಾ ಕೂಮ್ ಇಂಡಸ್,ಸಿನ್ನಾವಲೇ ಅದ್ದಿಮೇಕು ಇಂಡು ನಾನು ನಿನುಕು ಸೋನ್ನರೆ ಇಂಡು ಅರ್ಥು, 42 ತಕ್ಷಣ ಪನ್ನೆಂಡು ವಾಟುಕಾಲುತಾ ಆ ಸಿನ್ನಾದು ಅದ್ದಿಂದ್ದು ನಾಡುದಾಡುಸು; ಅಪ್ಪೋರು ಅಯಿಗ್ಯ ಅತ್ಯಾಶ್ಚರ್ಯತಿಂಡು ಬೆರಗಾಸುನು, 43 ಇದು ಎತ್ಗು ಗೊತ್ತಾಗುರುದಲ್ಲ ಇಂಡು ಆತನು ಖಂಡಿತವಾಯ್ಯಿ ಸೋನ್ನಿ ಅತ್ಗು ತಿಂಗಿರುಕು ಯಂತಾಗಟು ಕುಡುಕುಬೋದು ಇಂಡು ಅಪ್ಪಣೆ ಕೂಡುತ್ಸ್ಸು.