^{1 2 3 4} 1 ಸಬೆತ ಬೇರಾದು ತಾನು ಸತ್ಯವಾಯಿ ಪ್ರೀತಿಸ್ರ ಪ್ರಿಯ ಗಾಯನ್ಕು ವರಿರಾದು ಎ೦ದ ಇಂಡೆಕ್ಯ – 2 ಪ್ರಿಯನೇ ನೀನು ಆತ್ಮ ವಿಷಯತ್ಗೊರು ಅಭಿವೃದ್ದಿ ಹೊಂದಿ ಸುಕ್ಷೇಮವಯಿಕ್ರುದು ಇಂಡು ಪ್ರಥನೆಸೈಯರೇ , 3 ಅನ್ನಾ ತೆಂಬಿಮಾರು ಅಪೋದಪೋದು ನನ್ನಂಚ್ಗು ವಂದು ನಿನಂಚ್ಲಿ ಇಕ್ರ ಸತ್ಯತ್ತೆಯ ಕುರಿತು ತಿಳ್ಸು ನೀನು ಸತ್ಯವಂತ ಆಯಿ ನಡ್ಕ್ರವ್ನು ಇಂಡು ಸೊ೦ಡ್ರ ಪೋದು ನಾನು ಸೇನ ಸಂತೋಷ ಪಡಾರೆ . 4 ನಟ ಮಕ್ಕಿಗ್ಯ ಸತ್ಯಾತ ಅನುಸರ್ಸಿ ನಡುಕ್ರೈಗ್ಯ ಐದ್ನು ಇಂಡು ಕೊಕ್ರುಕ್ಕಿಂತ ಹೆಚ್ಚಾನ ಸಂತೋಷ ನನ್ಕಿಲ . ^{5 6 7 8} 5 ಪ್ರಿಯರೆ ಪರಿಚಯ ಇಲ್ದೆ ಇಕ್ರ ಸಹೋದರ್ಕು ನೀನು ಸತ್ಕರತ್ತೆಯ ಸೈರತ್ಗೊರು ನಂಬ್ರತ್ಗು ಯೋಗ್ಯನಯಿ ನಡ್ಕರ. 6 ಐಗ್ಯ ಸಭೆತ್ ಮುನ್ನಿ ನಿಟ ಪ್ರಿತಿಕ್ಕು ಸಾಕ್ಷಿ ಸೋನುಸ್ನು ,ಐಲ್ಯತ್ತೆಯ ನೀನು ದವ್ರ ಸೇವಕ್ರುಕು ಯೋಗ್ಯ ಅನಾ ರೀತಿಯಿಂಡು ಅಮ್ಪ್ನೇಕೆ ನಲ್ಗಿಕ್ಯಾಕು. 7 ಯಂತ್ಗು ಇಂಡೆಕ್ಯ ಐಗ್ಯ ಕ್ರಿಸ್ತನ ಪೆರತ್ತೆಯ ಪ್ರಸಿದ್ದಿ ಸೈರುಕೋಸ್ಕರ ಹೈದ್ನು ಮತ್ತೆ ಅನ್ಯ ಮಂದಿಲಿಂಡು ಏ೦ತೂ ಅತ್ಗ್ರಾಗ್ಯ ಅಲ್ಲ. 8 ಅತಿಂಡು ನಂಗ ಸತ್ಯತ್ಗು ಸಹಕಾರಿ ಅಗ್ರುತರ ಅಂತಲತ್ತೆಯ ಸೇರಿಸಿಗ್ರ ಹಂಗುಕೊರು ಯಿರೋ. ^{9 10} 9 ಸಭೆಯಲ್ಕೊರು ಸ್ವಲ್ಪು ಒಕ್ಲತ್ತೆಯ ವರ್ಜಿಂದೆ; ಅನೇಕೆ ಸಭೆಯಲ್ಕೊರು ಪ್ರಮುಖ ಅಗ್ರುದು ಇಡ್ಗೋ೦ಡಿ ಕ್ರದು ದಿಯೊ ತ್ರೆಪನು ನಂಗ್ಲ ಒಕತ್ತೆಯ ಅಂಗಿಕರಿಸ್ದಿಲ್ನು, ಅತಿಂಡು ನಾನು ವಂದೇಕೆ ಅದು ಸೈರ ಕರ್ಯಾತ್ ವಿಷಯತ್ ಕೋರು ಅದ್ದಿಕು ನೆನ್ಪು ಸೈಯಾರೆ, 10 ಅದು ಹರಟೆ ಕೋಚ್ರದಾಯಿ ನಂಗ್ಲ ವಿಷಯತ್ಗೊರು ಕೊಟ್ಟಿ ಕೊಟ್ಟಿ ಒಕತ್ತೆಯ ಅಡಕ್ನು, ಇದು ಸಲ್ದೆ ತಾನು ಸೊಹೋದರ್ ಲತ್ತೆಯ ಅಗುಸ್ಗ್ರುದು ಇಂಡ್ಗೋ೦ಡಿಕ್ರತ್ಗು ಅಡ್ಡಿ ಸೆಂದು ಐಲತ್ತೆಯ ಸಭೆಯುಲಿಂಡು ಬಹಿಷ್ಕಾರ್ ಸಾಕು, ಪ್ರಿಯನೇ ನೀನು ಕೊಟ್ಟಿ ನಡ್ತೆಯತ್ತೆಯ ಅನುಸರ್ಸ್ದೆ ನಲ್ಲ ನಡ್ತೆಯತ್ತೆಯ ಅನುಸರ್ಸು, ^{11 12} 11 ನಲ್ಲತ್ತ ಸೈರಾದು ದವ್ರಿಂಡು ಪರ್ ದಿಕ್ರದು ,ಕೊಟ್ಟಿತ್ತ ಸೈರಾದು ದವ್ರತ್ತೇಯ ಪತಾದಲ್ಲ, 12 ದೇಮೇತ್ರಿಯನು ಸಂಭವಿತಯಿಂಡು ಅದ್ಯರಿಂಡು ಸಾಕ್ಷಾತ್ ಸತ್ಯತಿಂಡು ಸಾಕ್ಷಿಹೊಂದಿದೂ ನಂಗ ಸಹ ಅತ್ರ ವಿಷಯತ್ಗೊರು ಸಾಕ್ಷಿ ಸೊಂಡ್ರಗ್ಯ ಐರೋ ,ನಂಗ್ಲ ಸಾಕ್ಷಿ ಸತ್ಯ ಅಯಿಕ್ರದಿಂಡು ನಿನ್ಕುಗೋತು. ^{13 14 15} 13 ನಿನ್ಕು ವಾರಿರ ಸೇನ ಸಂಗತಿಯಿಂಚು ,ಅನೇಕೆ ಮಸಿ ಇಂಡು ವರಿರ್ಕು ನನ್ಕು ಇಷ್ಟಯಿಲ್ಲ , 14 ಬೇಗ ನಿನತ್ತೆಯ ಪಕಾರೆಯಿಂಡು ನಿರಿಷ್ಕಿಸಾರೆ ;ಅಪೋದು ಮೊಗೂತು ಕುಡ್ತು ವಸೇತಾರೋ , 15 ನಿನ್ಕು ಶಾಂತಿ ಇಕ್ಯೋಟು ,ಸ್ನೇಯಿತ್ರು ನಿನ್ಕು ವಂದನೆಯತ್ತೆಯ ಸೋನ್ತಾಯಿದ್ನು ,ಸ್ನೇಹಿತಲ್ಯ ಪೇರ್ ಸೋನ್ನಿ ವಂದನೇ ಸೈಯಿ .