Pasal 1

1 Bara Yudas, palayan Yesus Kristus tuntang pahari Yakobus, akan ewen je intih tuntang ingasih Hatala Bapa, hayak je ihaga akan Yesus Kristus. 2 Kakira ah walas asi, damai sajahtra, tuntang asi je kuntep hunjun muh. 3 Kawan pahari je ta'asi, pandehan aku gancang bausaha manyurat akam tentang kasalamat itah hayak, aku mangkeme harus manyurat akam tuntang balaku dengam mangat ikau bajuang tutu-tutu akan iman je inyampai sinde akan katatahi akan kakaren uluh je barasih. 4 Awi, kakaren uluh tatentu jadi tame benyem-benyem tanpa katawan, iye te ewen je bara huran jadi inantu akan ihukum, kakaren uluh je dia baiman je manyalaguna anugrah Hatala itah akan mamuas kahandak tuntang manulak kaije ah Panguasa tuntang Tuhan itah, Yesus Kristus. 5 Aku handak mampaingat ikau aluh ikau jadi mangatawan uras ah, bahawa Tuhan jadi manyalamat umat ah dengan mampalepah ewen je dia parcaya. 6 Tuntang, kakaren malaikat je dia taat akan kakaren batas kuasa ewen malain malihi eka melai ewen, jadi imeteng ah dengan rantai katatahi huang kakaput je paling kaput akan pahakiman akan andau hai kareh. 7 Kilau te kea Sodom tuntang Gomora hayak kakaren kota hung sakitar ah, jamamuas arep huang dosa hasawe tuntang manyasah belai je dia wajar, je jadi mananggung kukuman apu je kakatahi manjadi suntu. 8 KIlau te kea kakaren uluh tuh, ma'andal kakaren nupi ewen, mamapa biti, manulak kuasa, tuntang mahina kakaren je mulia. 9 Mikhael bewei, je panghulu malikat, katika hakalahi dengan setan tentang hantun Musa, dia bahanyi maucap kutak pander sapa aka, kabeken ah baya hamauh," Kakira Tuhan malait ikau!" 10 Tapi, kare panyasat tuh manyapa kakaren taluh je dia ewen ngatawan, je baya ewen ngatawa baupun bara naluri, kilau metu je dia manempu akal. Tagal taluh te jituh ewen akan ihancur. 11 Calak ewen! Ewen jadi maumba jalan je inantarang Kain, tuntang manyasah dengan sarakah kasalan je inggawi Bileam, tuntang matei lumat awi panulakan kilau Korah. 12 Ewen tuh sama kilau tual huang pajamuan ka'asim, je manelen panginan hayak ikau tanpa angat mikeh, paduli baya akan arep kabuat. Ewen sama kilau awan je dia maimbit hujan, je inampuh riwut akan kanih kate. Ewen kilau kakaren batang kayu je dia mamua metuh wayah ah, matei due kali, tuntang injawut sampai kan uhat ah. 13 Ewen sama kilau galumbang laut je ganas, je mambure kahina'an ewen kabuat. Ewen sama kilau kakaren bitang je manamuei, je aka kakaput je puna kaput je jadi inyadia akan katatahi. 14 Kea tentang kakaren uluh jituh iye Henokh, katurunan kauju bara Adam, banubuat," Payah, Tuhan dumah hayak kakaren ribu uluh barasih-Ah, 15 akan manjalan pahakiman hunjun kakaren uluh; mahukum kakaren uluh fasik hunjun kakaren taluh gawi fasik je inggawi ewen dengan cara je fasik, tuntang hunjun kakaren kapander kasar je jadi inyewut gawin kakaren uluh badosa je fasik taharep Hatala." 16 Ewen iye lah kakaren uluh je rajin mangeluh, manggau-gau kasalan, tuntang maumba kadan dak belai ewen kabuat; ewen banyama hai tuntang manjelap uluh beken akan mandinu kauntungan. 17 Kawan pahari je ingasih kuh, ikau harus maingat narai je jadi imander rasul-rasul Tuhan itah, Yesus Kristus. 18 Ewen jadi hamauh dengam," Metuh jaman pangaklepah, akan tege kare pambaka je baya maumba kahandak belai ewen je fasik." 19 Ewen iyelah kakaren uluh je manguan kapusit, maumba kahandak duniawi, tuntang dia manempu Roh. 20 Tapi, ikau, Kawan Pahari je ingasih kuh, pahingkat arep muh kabuat hung hunjun iman muh je paling barasih tuntang badoa huang Roh Barasih. 21 Haga arep muh huang asi Hatala sambil manunggu rahmat Tuhan itah, Yesus Kristus, je manantiring akan pambelum je katatahi. 22 Inempu ih kamurah atei akan ewen je ragu-ragu, 23 Inyalamat uluh beken dengan marabut ewen bara apui. Akan je beken, parahan ih walas asi je impahayak angat kikeh, tuntang manjilek bajun ewen je imapa kahandak belai duniawi. 24 Akan Iye, je bakuasa manjaga ikau dia manjatu tuntang mahadir ikau tanpa cacat hung taharep tahta kamuliaan-Ah dengan kahanjak je hai, 25 Akan kaije Hatala, Juru Salamat itah, nyuru Kristus Yesus, Tuhan itah, kamuliaan, ka'agung, kakuat, tuntang kuasa katatahi: bihin, metuh tuh, sampai katatahi. Amin.