¹ Yesu ho natiala nihide nateteliniso hilihe lati lahasamak ihwanahite neyalita hosing nilokobol ho robia. ² Ngete ho nateliniso ibwo nangorite hafereni na oparita hihwanahiso narobia harik. ³ Ngete ho najiman, ''Tarihe ajo ne nihote, iyalihi anya ngorite hafereni huja olwaji ilany sing fad. ⁴ Isieri hule fad neyalita hosing to nasaman. Nyuo hati anya ngorite ho afereni, isiarahi to naparita ho ngete, hehwanahi narobia ho ngete fad huja hatum ngete onyesere.'' ⁵ Toho otenyi hilihe to natempulo , tatali fa itolokokoriji tana mori huja onyilaji ce bu nesierita, ojo ngete, ⁶ ''Toho hunya reji huja itialatate, ofwoni hadi noholongi na obu idahini namorwo abito iswodoho na obu ibieli nifok.'' ⁷ Sing ho nahifiasu ngete, ojo, ''Lahetejianani, anu hunya reji idwongi? Nanyuo hati ba litelehi hunya reji?'' ⁸ Yesu ho na hitarang, ''Tobwonata angida ongida obu ohitonongi ite. Ofwoni hadi lati hula olwaji ta nafure ho ne, ojimi, 'Ne ngete,' cebu, 'Anyiha noholong.'Hebayangata to sing. ⁹ Netiyiratate narem cebu nangalasu, banga ibayangata,ongida hunya reji lidwongi lihasili, nyuo hati nolosungi obu ihasil tiye tiye.'' ¹⁰ tinya ngete ajo niho sing, ''hang adeto niho nahang, ce bu miji ho miji. ¹¹ obwon ba nabwara ho dengeto, ce bu nimasik huja olwaji nahure ce bu nedehita. obwon ba nabayangi ce bu nemadita to hide. ¹² Nyuo hati hobengi hunya reji fad, orwehini hadi sing nehes hosing niho hote, cebu ohitegemi hadi ite, ohisieri hadi ite nikelesiaji hosing cebu nilotwarari, ohiyene hadi ite nihatemeni ho lohobu cebu niho lagala to nafure ho ne. ¹³ Isiarahi hadi nihote nehoi nihiramahitari. ¹⁴ Inaha, ihuhumahinete to tajio hote ongida obu nihigiarari hobe noholong, ¹⁵ esiarahi hadi ne ite netenyita nihote cebu nolofero, na isiarahi lamerok hote fad obu otum idayari kuya itegelehenyi. ¹⁶ Nyuo hati ohisieri hadi ite monyie ho iyangirok hote, hilasirak, lati cebu morit, cebu ihwanahini hadi hilihe nihote niyeyi. ¹⁷ Ohidayari hadi ite lati fad to nafure ho ne. ¹⁸ Nyuo hati odobu nafofiti to hohou hoji otum omudang. ¹⁹ Nidihan hoji ihorihi beji nolohailong hoji. ²⁰ Netelatate lasegere iluri Yerusalemu, to jianata ojo anyiha nahipapala . ²¹ Ikie hule to Yudea inamite nidenge, cebu ikie hula obwoni nihiji ho hang idahini, cebu hedahisi hula obwoni nihotwa ho hang iruhini. ²² Noholongi ho beho hunya, ongida nareji fad huja hegierehini otuhohine. ²³ Ikie narohoji obwon niho te huja imwohojoto cebu nihosing huja itanahe niho ehwe holongi! Obwon hadi namijan na obolo nifok, cebu narohoji niho hule ati. ²⁴ Ochuhi hadi sing to nanyaliru cebu iyare hadi sing nilotwarari nihangite fad, cebu orie hadi paganoji Yerusalemu , many otuhohino noholongi ho paganoji. ²⁵ Obwon hadi netelehita holong cebu niyafa cebu nihanger. Nifok, obwon hadi nahihuyasu nihangite, ibuyange hadi sing to nahitihita dial. ²⁶ Obwoni hadi lati hula ohuyarite nolorimak cebu ho negigilo ho nareji huja ofwonise nifok. Itenenengi hadi nahide. ²⁷ Tinya oteli hadi sing Iha Najyok olotu nidis to na hifirang cebu nakwatan na obolo. ²⁸ Nyuo hati nomo nechahi hunya reji, todetete nihide, cebu itingoto nohosi hote nihide, tonanyuo anyiha nahisiarahiso hote.'' ²⁹ Yesu ho na hiramahiso sing nohorwong ho tianya, ''Totialata niho nangaboli, ce bu nakiana fad. ³⁰ Lomo nabuji nakana, itialatate to nakwanite hote cebu ijianata ojo anyiha nafurat. ³¹ Netialatate hunya reji ofwonite, tojianata ojo anyiha ho Najyok . ³² Tarihe, ajo ne nihote, anya hilahaji obu ba olo niger, many ofwoni hunya reji fad. ³³ Nahide ho nafok otuhohini hadi , nyuo hati nahiram ho ne obu ahadi otuhohino. ³⁴ Nyuo hati ihwanahisi nahigigilita nikwanite hote ', ongida natajio hote obu ohiyare ite niwahita ho kwan, narumatito, cebu nahihuyata ho hisu. ³⁵ Olotu hadi ene holong nihote aburak to nakitu. Olotu hadi niho lati fad hula omanye nafok. ³⁶ Nyuo hati totialati noholongi fad, tomojete ojo ongida ite igoloto bebe nihiluyajiere niho hunya reji ofwonite, cebu huja ofwoni idwong, cebu obotia nihetemeni ho Iha Najyok.'' ³⁷ Niho noholongi lo fa itejianari ngete nitempulo cebu to harie ngete ho naloten niger, ho nageto ni denge na ongelese ojo Olivet. ³⁸ Lati fad ho nafwoniso to nahubanyi berien nihitiyirari ngete nitempulo.