¹ Yuda, lahigiamani ho Yesu Kristo, cebu hilasi ho Juma, niho hula ongeleni, niho Najyok la Monye, cebu itiringati niho Yesu Kristo: ² ikie namehino ho nayomo cebu nakwama oyisehino nihote. ³ Lo fa hetogolohiso ne nahigierehiso nihote to nahitalahino hojie, egierehi ne nihote nihitotosohinere ite ojo ongida igoloto niho nahiruk lo fa isieri niho laheruhok. ⁴ Eruhuni hilihe lati nihiji hote lati hulo fa ipireri noho hifadariso- lati hula obu ojieni Najyok hula itegiararite nangidari ho Najyok to ho nihiramita hosomon cebu idayari lolohitwahaji cebu Lohobu hojie, Yesu Kristo. ⁵ Tahanya awak ne ituhuyahiso ite---dobu ejianatate ngete bebe----ojo Lohobu bu etalahu lati to fok ho Ijip, nyuo hati nihalu ngete ho nahipalariso ehule obu iruhi. ⁶ Ho anjiloji hulo fa obu inefite na masik ho sing noho higiama---nyuo hati eda hini namasik hulo fa itwenge rete sing----ehwanahi Najyok sing nilotwarari nosio, nidimele, nihitilasere noholong nobolo nohongoto ho hiramita. ⁷ Okialare toho Sodoma ho Gomorra ho nahangite huja onyihaji niho sing, huja ipulohini nakwanite ho sing nisomon cebu ijifite nawahan na oroho. Iteleni fa sing nihitetelehinere hulo fa ipadate nahitegiama ho nahima na osio. ⁸ Nyuo hati tanya ihoi, hule laherigak cebu itobwate kwanite ho sing, cebu idayari nagolon, otianye na orohojaya niho lahakwatak. ⁹ Nyuo hati dobu Mikal anjilo lobolo, lo fa negogwo rite ngete ho lahesuswani to nakwan ho Muse, obu ngete owak iyeno nongoto ho nahiramita niho ngete, ngete ho najiman, "Ikie Lohobu ohiring iji!" ¹⁰ Nyuo hati hula ti eyiene sing narohoji to nasinge na obu sing ojieni.Nasinge na ojieni sing ---nasinge na ojien natiang na obe ho nahigigilita-- sing hunya huja itabalari sing . ¹¹ Ikie narohoji obwon niho sing! Odahe sing to nehoi ho Kaine, cebu obwoniterete sing ho natajio nohorihinere na robia to ho lo fa ho Balaam. Ayeyi sing niho lo fa holong ho rem ho Kora. ¹² Sing hula hulo fa okwame niholong ho ji na obolo, onyese nebengi riri, itanyase nakwanite ho sing ijia. Orahi sing edis na obe nahari, nakiana ho furat huja obutarita harik, ogohi to namori---- ¹³ nolobwangi na ingere noho namagor, oworito nariri ho sing, nahanger huja ilulurute---huja otunahinerete nahirok ho nidimele jik. ¹⁴ Enok, la olotu narahan metaharik hula ho Adam, ho nahiramahiso sing, ojo, "To tialati! Olotiniso Lohobu ho alif ho alif ho lati hongete hula onyilaji, ¹⁵ ningotere nahiramita ho lati, nitwarahinere lati hula obu ruhi nahiram ho Najyok to nahigemita ho sing huja ihoni sing to nehoiha huja obu ongidari, cebu netenyita huja ibuhaji huja otianyeni lati hula ipalarite niho ngete." ¹⁶ Sing hule lati hula iboti natajio, lahengugwak, hula ijifite nawahiti huja iboti, lahetadarak, hula ohoholise haletok. ¹⁷ Nyuo hati ite, hule, ihuyasu hulo netenyita hulo lo fa otianya laheramahitak ho hiramita ho Lohobu ho hojie Yesu Kristo. ¹⁸ Ojimi sing nihote, "Nilohichungi ho holong obwon hadi lahkenitak hula ijifite newahiti ho sing huja orohoji." ¹⁹ Hula ti itwo nge sing ahagesemok, inefite sing to nawahan ho reji huja obieu Najyok, cebu obu sing obwoniterete Nolohailong Na-Onyila. ²⁰ Nyuo hati ite, hule, toho itoboloroto nakwanite hote niho nahiruk na onyila bebe, toho imojeretete niho Nolohailong Na-Onyila, ²¹ itiringati bwanan nikwama ho Najyok, cebu itilasete namehino ho Lohobu ho jie Yesu Kristo la iyeno nahisu na osio jik. ²² Omehino niho hula orise, ²³ italahu lati, oruju sing to hima; niho hilihe isiarahi namehino tanabayangi, toho idayajieretete dobu nabongo na irusohino natiang. ²⁴ Tahanya niho ngete la ohitun ite to lohitihitere, cebu ihisiarahi ite ibotiati nihatemeni ho kwatan hongete, nebe ibwo nebot cebu to tanakwama, ²⁵ Niho Najyok abito lahetalahani ho jie niho Yesu Kristo Lohobu ho jie, ikie nakwatan, nagolon, ho nihifirang-nihatemeni holong tahanya, jik ho jik. Amen.