¹ Ni tundamene muni lyirato ,i ndi pukuna, ni shukyere zimpo i zi mupupo, shihuru iyu buporofita. ² Mi ya matihweta zindime ,ama kuhweta na bato mati hweta nu Redyza ,kakuti kunjemwa yama tumuyuvwa ,mati hweta i zahati yibiwa mu mupupo . ³ Ya matiporofita matizira a bato iza ti dzini kawo ,izi ku kutaza izatyi gisa mutima . ⁴ Ya matihweta zindime mati dzinikawo yumunye ,mi yama tiporofita matidzini i kereke . ⁵ Ndara kushaka akya kwenu ina tihweta zindime , nanga kukitira popa , ndara kushaka akya ni porofite ,kakuti yamati porofita ana kuwuso kuya mati hweta muni zindime ,[nakana u yumwe katitoroka akya i kyerekye kwene kudzinuwa], kono pani ,nwe bakwanga akya ndiye kuhweta mu zindime zina hati yubwa , Mi he bakwanga ndakuya kuhweta kunwe muni zindime ,shikya shishe ni shangana po ?, ⁶ Yema ndakukwana , na kana kanditi hweta nanwe ,kwizuto iza ta tandawurwa . kapa shi zivo kapa wu porofita kapa kuruta . ⁷ Inka kusire kwizuto i za hatipara i zina murumo mutsiki tandi kapara ,kapa kambuli ,ati shezi lyilyisiwe murumo mutsiki ,ingahare shekuyibiwa akya kwa lyilyisiwa pala kapa kambuli? ⁸ Ati torombita she i lyilyisiwe shi murumo iwu mukawuhana, iwati yuvwahara naqxa, i yani kakulyitukisiza i ndwa? . ⁹ Mi shumukwa i wa ngahopa indinwe ati yema na kulyeta shuhuru izimwe zintaba iza ti yu bwahara, ingahare she kuyibiwa i shati hwetuwa ? she ibe nati li hwetira mu mupupo . ¹⁰ Mu lyuvu kuna mi futa iminji iyi zindime ,mi kunjemwa shilyati toraka. ¹¹ Mi ati kandi izire kulya tyenda lyiyi , kutitindibe nokoti u mutu yo mukyelyira ,mi ndiya yama tihweta kume indiye mukyelyira . ¹² Cware yenwe shina puna tukufalyeri kwisi izuto izyi mupupo , ni shakye kuyinjipa i kwati dzini kawo i kereke . ¹³ Ya mati kwana kuhweta zindime a rapere akya a kone kutarusa . ¹⁴ Kakuti ndishi rapera kandi tyi hweta zindime ,mupupo anga watirapera kono i kutisiso anga ,yema ya kusebeza . ¹⁵ Cware ndikyare pani ? shendi rapere shu mupupo ,indi kurapera shi kutwisiso ,shendi yimbe shu mupupo indi kuyimba shi kutwisiso, ¹⁶ Indi pumatyilyi tumera ku Redzya shu mupupo , indiya bana popenje ingahare baku hweta ''amen''. Indi puka kuli tumera ati kayi ka izire shi matihweta? ¹⁷ Injahamu yewe mati litumera naqa .kono yu yumwe a makwidzini kawo . ¹⁸ Ndati lyitumera ku Redzya ka kuti ndati hweta mu zindime ku nibbara. ¹⁹ Kono muzi kereke ndara kushaka kuhweta mayi nga manalyanja shi kutwisiso anga ,akya ndikwene ku hweta mushowo i wa hatiyubwahara ku mayi inga tikaya mo 10 000 . ²⁰ Bakwanga ni siye kuyanakana ndati ba pundi, kuzi runya ni be tandi bapundi ,mi muwutali ni be ni bakuru. ²¹ Kwata ñoruwa mu murawo,shendi hwetye ni shicava sha bato u mushowo irwezi ,indi shi miromo abato barwezi ,mi indi popa kamuni sheba ndiyubwe me, ku hweta shikati. ²² Mi nanga ndipakyo zindime shi supo,ka kuiba tishira kono kuiba hatyityishira ; zini wuporofita shisupo,ka kuiba hatyityishira,kono ku barumeri. ²³ Cware i kereke koyo ati ya kopana, mi kowo ,mushibaka shi cimwe ,mi kowo bati hweta zi ndime indi pukwakunjena ,kapa ndi pukwakunjena a bato i baxhu i zibo .Kapa i ba hacire kutishira ,mi basiye kutikya na ti puka ²⁴ Kono kowo bashi porofita ,indi pukwakunjena ya hati tishira kapa yaha yi zire, mati kolyisa kokuwo,shuyaturuwe kwi zuto kozo za mati hweta. ²⁵ Za zukuwa iza muni mutima akye za tandururwa mi shawulye puwuso shipata, mi a kubamere Uredzya ,mi a hwetye atikya, Uredzya ana nanwe. ²⁶ Kukyaruwe bakwanga ? ndatitikya ;ni shi kopana u mutu nu mutu kokunwe shabe nuruyumbo kapa ituto ,kapa intaba ya tandururwa ,kapa zindime ,kutarusa mandime izuto kozo zipanguwe shi kwidzini kyerekye. ²⁷ Ati kuna i bati hweta zindime ku hwetye ba biri kapa batatu shu kupuwa shibaka akya u yumwe a taruse. ²⁸ Mi ati kunjemwa yama titoroka ni siye kowo batupo muni kereke ,nisiye u mutu kweke ali hwetire yeke koku Redzya , ²⁹ Kuzirwe ba porofita ba viri kapa ba tatu ba bamwe ba yature i shatihwetuwa . ³⁰ Yu yumwe kokunwe ku ibasise ashi puwa kutandurura iza paturura , yuyumwe ikaku hweta ati qxamwii. ³¹ Kakutyi sheni porofite kwenu shukulyipa shibaka ,ndi kutikya kwenu ni rute ,mi kowo bakutaze ³² Mipupo aba porofita ya tyendusuwa ku baporofita. ³³ Kakuti Uredzya kanju mifilyifilyi kono injwi kozo, inka mwatisiwa muni zikereke kozo iza ba rumelyi. ³⁴ Mi bakazi ba tupo muni zi kereke ,yama bakutishirwa kuhweta, mi batiswanera,kuli bika kwinshi shina puwa tihweta murawo. ³⁵ Ba shishaka kutalifera shicimwe ba akwuze ba bebawo kumuzi kakuti kwatyi runa bakazi kuhweta muni zi kereke . ³⁶ Kana kutikya lyiyi lyu redzya ku lyata kalyera kuya i ko kunwe ? kapa inwekye ngaho lyata shangana? ³⁷ U yumwe ashi lyi mwana wu porofita kapa u mutu yana mupupo ,a yu bwisise akya zindati ni ñwera i taero ashikati. ³⁸ Yu yumwe ati yama ku yubwisisa a shitye . ³⁹ Cware ba kwanga ni twere mitima enu nanyina ku kuporofita, mi nisiye kuyibara ku kuhweta zindime. ⁴⁰ Mi izuto kozo zirasiwa indi shi murawo .