¹ Kame ni kwa ba kuti, karwe Nsabata, Jeso kaya buyenda mu mawa ebweke mi bazyiizwa bakwe ka baya butora emitwi yo bweke, ku ibukusha mumanja abo noku ilya. ² Kono bamwi kuba Farisi boku ta ye, "Chinji aha mutenda cintu chazya kuzuminizwe kutendiwa karwe Nsabata?" ³ Koku mutaba Jeso akuta yee, "Kali nimwa bara ezo natenda Dafida aho kafwite enjara, eye ne bakwame abo kabena neye? ⁴ Naka kabira munjuwo ya Nyambe, nokahinda enkoko ichenesetwe nokulya ko, mi kame akuha ne bakwame bamwi abo kaba kere neye nokulya, nanga kuti kakuzumininwe bulyo ma purista kuilya." ⁵ Kame aku amba kwabo, "Mwana Omuntu ndo Nfumu we Nsabata." ⁶ Nikwa tendahala he imwinya Nsabata kuti nayenda mu sinagoge, noka zyiiza bantu. Ka kwina omukwame ozyo ka kwesi eyanja lizyuminine. ⁷ Bañoli ne ba Farisi ka bamu tonderere chaha koti babone heba awora ku hoza muntu rwe Nsabata, koti bawane ebaka lyo kumuhambika obubbi. ⁸ Kono kazyi ezo kaba kwesi ba azyara, sa sumwina omukwame si yanja lizyuminine, "Nanuke, mi ozyimane hanu hakati kabuntu bonshe." Cware omukwame akunanuka no ku zyimana haho. ⁹ Jeso aku amba kwabo, "Ndimi buza, kuzumininwe kutenda oburotu kapa obubbi rwe Nsabata, okuha buharo kapa kubu zyonaura?" ¹⁰ Mi aku zimburuka kuba tonderera bonshe noku amba ko zyo mukwame, "Orore eyanja lyako." Sa tenda bulyaho, mi eyanja lyakwe nilya bozekezwa nenja. ¹¹ Kono kabazywire obubengi, boku ambaura mukati kabo ezi kaba swanezi okutenda kwa Jeso. ¹² Nikwaba bulyaho kwa ena mazyuba na ya ku rundu kuka rapera. Aku zwira habuso mwi ntapero masiku onshe kurapera kwa Nyambe. ¹³ Aho lizwa, aku kuwa abazyiizwa bakwe, mi akushara mo be kumi nibo bire kwabo, abo nakuwa ye ba Apositola. ¹⁴ Amazina aba Apositola kabali ba Simone (ozyo kazyibahere ke zina lya Pitorosi)ne mwanchu wakwe, Anduru, Jakobo, Johani, Filipi, Batoromia, ¹⁵ Mateu, Tomasi, Jakobo mwana Alufasi, Simone, ozyo kakuwa Ziloti, ¹⁶ Judasi mwana Jakobo, ne Judasi Isikarioti, ozyo na muyaza. ¹⁷ Haho Jeso ukusuka harundu nabo no kezya kuzyimana hapatamite ne chinalyanga che ba zyiizwa ne chinalyaga cha bantu ba zwa kwa Judeya, ne Jerusalema ne mbali ye wate lya Tiye ne Sidoni. ¹⁸ Nibakezya kuteeza kwakwe no kezya kuhazwa ku zirwaro zabo. abantu kaba shandisiwa myoya mibbi niba hozwa nabo. ¹⁹ Omuntu yenshe muchinalyanga ka likite koti amukwate kakuli engamu yoku hoza kaikwesi izwa kwakwe, mi naba hoza bonshe. ²⁰ Haho sa tonda bazyiizwi bakwe, no kutaa ye, "Mukwesi enfuyauzi enwe mushebete, kakuli omubuso wa Nyambe ngwenu. ²¹ Mukwesi enfuyauzi enwe mufwa enjara hanu, kakuli nomuna kuta. Mukwesi enfuyauzi enwe mulilite hanu, kakuli ne mura sheka. ²² Mukwesi enfuyazi ha bashimi zokera abantu no ku mibikira kumbali no kumituka, kebaka lyo Mwana Omuntu. ²³ Mushumunuke mwelyo zyuba mi mushotauke ke ntabo, kakuli kobuniti mbomuwane mupuzo munene mu wiru, kakuli bashukurwenu mbobulyaho kaba hinda maporofita kenjira iswana. ²⁴ Kono mbumai bwenu enwe mukiwanina, kakuli sinimwa wana kare munyaka wenu. ²⁵ Mbumai bwenu enwe mukusi, kakuli nemurafwa enjara. Mbumai kwenu enwe musheka inu enako, kakuli nemuna silisa no kulila kumazyuba akezya. ²⁶ Obumai mbwako, haiba abuntu bonshe baamba zirotu kako, kakuli mbobulyaho kabatendanga bashikurwenu ku ma porofita bobuhata. ²⁷ Kono ndiamba kwenu enwe mutezete, mushake abo bamitoete no kutenda burotu kubena kaba mishaki. ²⁸ Muhe enfuyazi kubena bami kuta, no kuraperera bena ba mishandisa. ²⁹ Ko zyo akudama ku tama lyonke, omuhe norumwinya orubazu. Ozyo ahinda echizyabaro chako, washa mukanisi kuhinda ne chansi yako. ³⁰ Muhe kubonshe aba bami kumbira. Omuntu asihinda echintu chako, washa mukumbili kuti achiku bozekeze. ³¹ Bulyaho oshaka kuti bakutendere buntu, oba tende bulyaho newe. ³² Heba mboshake bulyo bena bantu bakushaka, zinji owana ho? Kakuli nanga batenda zibbi bashaka bena baba shaka. ³³ Oshitenda burotu kubena bakutenda nenja bulyo, zinji owana ho? Kakuli nanga batendi be zibbi mbobulyaho batenda. ³⁴ Heba okorotisa bulyo bantu abo obwene ye baora kulifa, zinji owana ho? Nanga batendi be zibbi ba korotisa batendi be zibbi, koti ye ba bozekezwe esheleñi ilikana. ³⁵ Kono mushake ezitozi zenu mi mubatende nenja. Mukorotise nemusa lindili kubozekezwa chimwi mi omupuzo wenu mboube munene mi mbo mube bana bo ozyo Ahanzi ku Hitiliza, kakuli eye akwesi echisemo kubena kabalitumeli ne bantu babbi. ³⁶ Mube be chisemo, shina omu afwana Shwenu we chisemo. ³⁷ Mwa sha atuli, kuti ye nenwe mwasha atuliwa. Washa nyansi, koti ye newe washa nyansiwa. Mu kwatire bamwi, koti yee nenwe mukwatilwe. ³⁸ Mutahe, mi nenwe nemuna tambura. Empo nene— inyetezwite hanshi, kui nyunga hantu honke mani noku tikaekera amatende enu. Kakuli entikanyo shaka osebelise nje ntikanyo shaka neisebelisiwe ni kwako." ³⁹ Haho akuba sumwina enguli. "Omofu kana awora kuhitira omoofu zyumwinya? Nali atenda bulyaho, bonshe mbo ba wire murambo, nga kali? ⁴⁰ Omuzyiizwa kali munene kuhita muzyiizi, kono muntu yenshe zyo a zyiizwa kokuzyhura mbwa fwane nomuzyiizi wake. ⁴¹ Mi chinji aha otonda kasozu kadana kakere mulinsho lyo mukwako, kono koboni chisumo china mulinsho lyako? ⁴² Mbuti aho wora kusumwina mukwako ye, "Mukwangu, ko tende ndikuzwise kasozu kadana ko kena mulinsho lyako,' mi ewe mwine koboni e chisumo china mulinsho lyako? Ewe muhomi! Ozwise tango e chisumo china mulinsho lyako, nga shaka nobone nenja a kasozu kena mulinsho lya mukwako. ⁴³ Kakuli kwazya chi shamu chi rotu chi reta eziya ngantu zi borete, kame kwazya e chishamu chi bbi chi reta eziyangantu zi rotu. ⁴⁴ E chi shamu ne chi shamu chi zyibihara ke ziyangantu za cho. Kakuli bantu kaba yangi ezi feiga he chi shamu cho mukona, kapa kuyanga ezi kochera ze ndalindali ku chi shamu cho minga. ⁴⁵ O muntu murotu areta zintu zirotu kuzwilira muchibiko chakwe chirotu chomu mozyo wakwe, mi no muntu mubbi areta zibbi zikere mu chibiko chakwe chibbi cho mumozyo wakwe. Kakuli a kanwa ka amba ke zizywire mumozyo wakwe. ⁴⁶ Zinji mundi kuwira, 'Nfumu, Nfumu,' mi kamu chilili mazwyi aa ndi amba? ⁴⁷ Muntu yenshe zyo akezya kwangu, ozyo ka chilili mazywi angu, noku achilira, mbondi misumwine mbuti afwana. ⁴⁸ Afwana mbwe mukwame zyo azyaka enjuwo, ozyu naasa kuzungisa noku zyaka o muzuzu we njuwo he buwe ligorete. Aha akezya menji mangi, ama kumpesi a menji aku kezya kudama heyo njuwo, kono kali niya nyungana eyo enjuwo, kakuli niya zyakiwa nenja. ⁴⁹ Kono muntu zyo ashuwa mazywi angu mi kaa tendi, afwana mbwe muntu zyo nazyaka e njuwo hebu nashabiki muzuzu we njuwo. Ama kumpesi a menji aha akezya kudama heyo njuwo, yokugwa haho bulyo, mi enshinyeho yeyo njuwo yokuhura kuma manikizo."