¹ Mi Jesu, nazywire Ruho Rechenete, saboora kazwa ku rwizyi rwa Jorodani, mi kahitilwe o Ruho mwinkanda ² oku naka ezekwa kwa dyabulosi kama zyuba o makumi one. Kali nalya chintu mu ao mazyuba, mi ku mamanikizo eyo nako, shika fwite njara. ³ Diyabulosi aku amba kwakwe, "Heba oli Mwana Nyambe, olaele li buwe lizoke libe nkonko." ⁴ Jesu akumu taba ye, "Kuñoretwe, 'Omuntu ka hali bulyo ke nkonko."' ⁵ Cware diyabulosi aku twala Jesu kucibaka chihangeme, mi oku kamusunda emibuso yonshe yomwi fasi mukanako kadana. ⁶ Diyabulosi aku amba kwakwe, "Mbondi kuhe Engamu yonshe no burotu bwayo bonshe, kakuli ninda zihewa, mi ndiola kuziha yenshe zyo ndishaka. ⁷ Cware, heba mbondi gunkamene noku ndikutika, mbozibe zako." ⁸ Kono Jesu aku taba noku muta ye, "Kuñoretwe, 'Mbo kutike ONfumu Nyambe wako, mi ndeye yenke shaka osebezere.'" ⁹ Cware diyabulosi aku twala Jesu kwa Jerusalema noku kamubika hechibaka chihanzi chaha cho muzyako we tempele. Nokumuta ye, "Heba oli Mwana Nyambe, oki showere hanshi. ¹⁰ Kakuli kuñoretwa ye, "Mbwahe ama ñiloyi bakwe entaero kuamana newe, aku babarere.' ¹¹ mi, 'Alaku nanuna mu ma anja ao, kuti ye kali no chunchune ha buwe.'" ¹² Mi ku kumutaba, Jesu akuta ye, "Kuambitwe ye, 'Washa ereki Nfumu Nyambe wako.'" ¹³ Aha amana diyabulosi kulika Jesu, aku yenda, nokumu siya mbita imwi nako. ¹⁴ Cware Jesu aku bora kwa Galileya mu ngamu wa Ruho Ruchena. Mi ne mbunzi ka zakwe zoku zhura-zhura muchishi chonshe. ¹⁵ Mi aku tatika kuzyiiza mu masinagoge abo, mi niba murumba bonshe. ¹⁶ Aku kezya mwa Nazaretha, mu chishi omu naakulira, shina kamo atendanga, nakabira mu masinagoge rwe Nsabata, shina mu kaku tendiwanga, mi aku zyimana kuti a bare koku ongoza. ¹⁷ Boku mutambika embuka yo mupolofita Isaya. Oku alula mbuka noku wana hena ku kuñoletwe, ¹⁸ "Oruho rwa Nyambe hangu rwina, kakuli nandibiki entonzo yoku sumwina banjebwe embunzi erotu. Nanditumi kuku zyibisa entukuruho kubena bashiminitwe, noku babofu ye babone kame, kuha entukuruho kubena bashandisiwa, ¹⁹ ku zyibisa omwaka wo chisemo cha Nyambe." ²⁰ Mi aku ara mbuka, oku iboza kumuyendisi noku kara. Bonshe bo kaba kere mu masinagoge shikaba mu tonderere bulyo. ²¹ Akutatika ku amba kwabo, "Shunu eyi ntimana yazyuzilizwi nemu teezete." ²² Yenshe zyo kakereko nakishuwira zo na amba, mi niba komoka bonshe ka mazywi omusa aya kazwa mukanwa kakwe. Kaba amba ye, "Kali nde mwana wa Josefa zyu?" ²³ Aku amba kwabo ye, "Fwe, mbomu ndisumwine eyi nguli, 'Ñangaa, kihoze, tende zonshe zo nitwa shuwa ye niwa mana kutenda mwa Kapenaumu, zitende mu munzi wako.'" ²⁴ Kono akuta ye, "Fwe, ndimita ye, kwaazya mupolofita ozyu a atambuliwa mu munzi wakwe. ²⁵ Kono keniti ndimisumwina ye, kakwina banfwirwa bangi mwa Isilaele mwi nako ya Eliya, ewiru kali yalitwe ka mywaka yotatwe ne myezi ye anja na konke, mi kakwina enjara ingi mwi nkanda. ²⁶ Kono Eliya kali natumiwa kwabo, mbita aha nayenda kwa Zarepati ne Sidoni, ku mufwirwa zyo ka kara kuko. ²⁷ Mi kakwina bangi bo kaba rwara mbingwa munako ya mupolofita Elisha, kono kwazya nanga yenke zyo nahoziwa mbita Namani womu Siriya." ²⁸ Bonshe bo kabena mu masinagoge boku benga hawa aha ba zishuwa zizo. ²⁹ Boku zyimana, noku mutandira kunje ko munzi, noku mutimbira kumamani-mani ye rundu aho kaba zyakire munzi wabo, kuti bamushonjere hanshi. ³⁰ Kono aku hita mukati kabo noku kakiyendera ku chibaka chi mwinya. ³¹ Cware aku yenda kwa Kapanaumu, munzi wo kauwanika mwa Galileya, mi akuba ruta rwe Nsabata. ³² E zyiizi zakwe neza komokisa bantu, kakuli ka amba ke ngamu. ³³ Aho mu masinagoge kakwina mukwame ozyu kakwesi ruho rwe dimona yamasira, mi akujangaza kezywi lihanzi ye, ³⁴ "Ah zinji tuswanera kutenda newe Jesu wa mu Nazareta? Nokezyi kutuyaha? Ndikuzyi- ozyu Achena wa Nyambe!" ³⁵ Jesu aku kalihila edimona, "Washa ambi mi kame ozwe kwakwe." Aha ishonjera zyo mukwame hanshi hakati kabo, eyo dimona yokuzwamo, kali niya muremeka nanga kanini. ³⁶ Bantu bonshe kaba komoketwa, mi bokuzikandeka mukati kabo. Bokuta ye, "Mazywi munji a? A laela myoyo mibbi ke ngamu na manta mi neyo izwa." ³⁷ Mi embuzi ziamana neye zoku zyura muchishi chonshe. ³⁸ Cware Jesu akuzwa mu sinagoge nokuka kabira munjuwo ya Simoni. Aho mukwekazi wa Simoni ka shandiswa kuhisa mubili, mi bokumu kumbilila kwakwe. ³⁹ Mi aku zyimana hambali neye noku tanda butuku, mi bokumusiya. Haho bulyo aku zyimana noku tatika kuba tahwira. ⁴⁰ Aha limina ezyuba, bantu bokureta kwa Jesu bantu bo kaba lwala marwalila anchina-chinchana. Nabika ma anja akwe ha bantu bonshe bo kabakere ko noku bahoza. ⁴¹ Madimona aa ka akere mu bantu bangi niya zwamo, ne ajangaza ni ata ye, "Oli Mwana Nyambe!" Jesu aku kalihila ma dimona, kalina azuminiza ku amba kakuli ka azyi ye ndeye Kreste. ⁴² Ke nako ya masiku-siku, akuzwila kunje nokuyenda kuchibaka cha aazya bantu. Dxhandiya yo bantu yakumu shaka-shaka noku kezya kucibaka oku kakere. Niba lika kumukazika ye ashaba siyi. ⁴³ Kono akubata ye, "Ndisiswanera kuzyiiza mbunzi rotu yo mpuso ya Nyambe mu minzi mingi imwinya, kakuli ndebaka lyo ninda tumiwa." ⁴⁴ Mi aku zwila habuso kuzyiiza mu masinagoge nimwa Judeya yonshe.