¹ Cware he mubike obubbi bonshe kumbali, bu homi bonse, buharo bwazya e niti, kushali tumera kuzo mukwesi, mi mureke kusinya amazina aba yenzenu. ² Sina ka banche abo niba pakiwa nobwangu, muli kumbute omuzilili uchena we chi Moya, kuta ye ko wo mukure mu kuhazwa, ³ Heba ni mwa wana kuti Nfumu murotu. ⁴ Mukezye kwakwe eye ebuwe lihara elyo nilya kaniwa ku bantu, kono elyo nilya ketiwa kwa Nyambe kuba lyo butokwa kwakwe. ⁵ Nenwe mufwana mbwe mabuwe ahara awo akwesi azyakiwa kuba enjuwo ye chi Moya, kuti mube ma puristita ba chena aba baha chitabero chi tambuliwa kwa Nyambe ka Jeso Keresite. ⁶ Entimana ikwesi zi:"Bone, ndibika e buwe lyo munkona yo muzyako mwa Zioni, liketetwe mi liswanera. Yenshe ozyo azumina kwakwe kali ka nfwe enshoni." ⁷ Cware he ekute ndyenu enwe muzumina. Kono, "ebuwe elyo nilya kaniwa ku bazyaki, ndelyo seli omutwi we enkona"— ⁸ mi, "nde buwe encenya lye sitataliso mi ne buwe enene lye sitataliso. "Ba sitatala, ku sha chilira ezywi, elyo kaba bikirwe. ⁹ Kono muli bantu ba ketetetwe, ma purisita batompeha eshika lichena, abantu ba Nyambe, mbo muzyibahaze enkezo endotu zo zyo na mikuwira kuzwa mufifi kuya museli erotu. ¹⁰ Kumatangiro kali kamulichintu, kono hanu muli bantu ba Nyambe. kali nimwa tambura echishemo, kono hanu mukwesi echishemo. ¹¹ Mubone, ndimikuwa mbwe ba zwakure ne bayendabii kuti ye muzwe kuntakazo ze nyama, ezo zirwa mu myiuzya yenu. ¹² Mube ne mihaliro mirotu mukati kabe Chishi, kuti, ye, basi amba koku mihambika mbwe mwa tendi ezintu ezibii, ba bone ezitendo zenu ezirotu no kuha entumbo kwa Nyambe mu zyuba shaka na kezye. ¹³ Mukutike abayendesi be mibuso ya bantu kebaka lyo Nfumu. Mukutike no Nfumu we chishi ko bunene bwakwe, ¹⁴ mane ne babusisi bulyaho, abo batumitwa okuha enkoto batenda ezibbi mi no kuha entumbo ba tenda burotu. ¹⁵ Kakuli zezo ashaka Nyambe, kuta ye koku tenda oburotu mutontoze ziambo za azya enzibo za bantu basiru. ¹⁶ Ka bantu barukuruhite, mwasha zebelisi entukuruho yenu mbwe maliziko obubbi bwenu, kono mube mbwe zikombwa za Nyambe. ¹⁷ Mukutike abantu bonshe. Mushe bakwenu. Mutiye Nyambe. Mukutike onfumu. ¹⁸ Zikombwa, mulibike munkotera ya ba Nfumwenu ke kute lyonshe, mane nikwa bena bazya echishemo abahali. ¹⁹ Kakuli ndinswanero kuti omuntu ahite mushando na kubazitwe kwa azya omurandu kabaka lyo kuzyiba Nyambe. ²⁰ Zinji uwana ho kuti utende chibi mi kuhewe enkoto nako nde? Cware heba notendi oburotu mi hape, ushandisiwa no kuhewa enkoto, echiha entumbo kwa Nyambe. ²¹ Chinu choo nimwa kuwirwa, kakuli Keresite neye namishandira. Namiisira enjira yo kuchilira mu matende akwe. ²² Kali natenda chibi, kali nikwa wanika obuhomi nali bonke mukanwa kakwe. ²³ Aha na tukiwa, kali na bozera okutuka. Aha na shandisiwa, kali natiza bantu, kono naliha ye mwini koo zyo aatura kenswanero. ²⁴ Eye mwini nahinda ezibi zetu mu mubili wakwe ha chikuni, kuti ye twa shabi ne nkabero mukutenda echibi kame, tuhare ko kuchena. Ke zibata zakwe ni twahozwa. ²⁵ Mwenshe kamuhungurukite mbwe embelele zazya omulisani, kono hanu semwa zokelii ku mulisani no muzyimanini wo myiuzya.