² اِستیفان بوگوفت:«ای پئرَأن و ای برأرأن، گوش بوکونید چی گوفتَأن درم، خدای پور جلال اَمی پئر ابراهیمَ، وختی هنوز بین النهرین میَأن سامان دَأشته و هنوز نوشو بو «حَران» ظاهرَ بوست ³ و اونَ بفرماست:«تی سرزمین و تی اَقوامِ سرزمینَ ترکَ کون و بوشو جایی کی ترَه نیشان دهم. ⁴ پس اونم جی کلدانیانِ سرزمین بیرون بوشو و ایتَه مدت حرّانِ جَه بِئسَه، بازن وختی اونِ پئر بمرد، خدا اونَ جی اویَ به اَ زمینی کی هَسَه شومَأن اونِ رو سامان دَأرید هدایت بوکود. ⁵ خدا حتی ایتَه وجبم اَ سرزمینَ ابراهیمَ فَأندَه، ولی هو موقع کی ابراهیم هنوز زَأی نَأشته خدا اونَ وَعده بدَه کی اون و اونِ زَأکأنَ، اَ زمینِ مالک بوکونه. ⁶ خدا اونَ بفرماست؛ تی نسل غریبانِ مَأنستَأن ایتَه بیگانه سرزمینِ میَأن زندگی کوند و چهارصد سال اوشَأنَ به بردگی گیرد و اوشَأنَ ظُلم کوند. ⁷ و خدا بفرماست؛ ولی من اون ملتی کی می قؤمَ به بردگی گیره یَ جزا دهم و بازن می قؤم آزادَ بِه و مرَه در هَ یَ عبادت کونه. ⁸ و هَ موقع خدا ابراهیمَ عهدِ ختنه یَ فَأدَه تا نشانۀ خدا عهد، ابراهیمِ اَمرَه بیبِه، و موقعی کی اسحاق بودونیا بأمو ابراهیمم اونَ هشتمین روزِ رِه ختنه بوکود، و اسحاق یعقوبَ، و یعقوبم خو دوازده تَه پسرَ کی بعدها هر کودام خوشَأن رِه ایتَه جی اسرائیلِ طایفه یانِ پئر بوبُستد. ⁹ یعقوبِ زَأکأن حسادتِ جَه یوسفَ بردگی رِه مصرَ بوفروختد، اما خدا اونِ اَمرَه بو ¹⁰ و اونَ جی همۀ سختیان نجات بدَه و اونَ حِکمت عطا بوکود، و فرعون یوسفِ جَه اونَ خوش بأمو، جوری کی اونَ مصرِ فرمانروا و خو دربارِ رئیس بوکود. ¹¹ هَ موقع همۀ مصر و کنعانِ میَأن قحطی بوبُست و پیله مُصیبتی به بار بأمو، طوری کی دِ اَمی اَجداد خوردنِ رِه چیزی پیدا نوکودد. ¹² وختی یعقوب بیشتَأوست کی مصرِ دورون گندم پیدا بِه، اولین بارِ رِه اَمی پئرَأنَ به اویَ اوسِه کود. ¹³ دومین سفرِ دورون یوسف خورَه خو برَأرأنَ بشناسانه و فرعون، یوسفِ اَصل و نسبِ جَه خبردارَ بوست. ¹⁴ بازن یوسف، اوسه کود خو پئر یعقوب، و باقی خو اَقوامِ دونبال کی هفتاد و پنج نفر بود. ¹⁵ و اَطو یعقوب بوشو مصر، و در هویَ یعقوب و همۀ اَمی اَجداد بمردد. ¹⁶ ولی اوشَأنِ جنازه یانَ دوباره وَأگردَأنِد شِکیم، و اون مقبره ای دورون دفن بوکودد کی ابراهیم مبلغی نُقره اَمرَه حَمورِ پسرَأنِ جَه بِهِه بو. ¹⁷ و هر چی وختِ عمل کودَأن به اون وعده ای کی خدا اَمی جد ابراهیمَ بدَه بو نزدیکترَ بوسته، اَمی قؤمِ نفراتم مصرِ دورون ویشترَ بوستد. ¹⁸ تا اَنکی ایتِه فرعونِ دیگر به قدرت بِرسه کی یوسفَ نشناخته. ¹⁹ اون اَمی قؤمِ اَمرَه دوشمن بو و اَمی اَجدادَ ظُلم کوده و اوشَأنَ مجبور بوکود تا خوشَأنِ تازه بیچِه زَأکأنَ صحرا میَأن ولَ کوند تا بیمیرد. ²⁰ هَ روزگارِ دورون موسی بودونیا بأمو و خیلی هم قشنگِ زأیی بو. موسی تا سه ماه خو پئرِ خانه پیلَه بوست. ²¹ وختی اونَ رودخانه دورون ولَ کودد، فرعونِ دختر اونَ بیگیفت و خو زَأیِ مَأنستَأن پیلَه کود. ²² و اَطو موسی مصرِ همۀ فرهنگ و حکمتَ یاد بیگیفت و گُفتار و کردارِ دورون قوی بوبُست. ²³ وختی چهل ساله بوبُست، خو مرَه فکر بوکود کی بیشه و خو اِسرائیلی برَأرأنَ بیدینه و اوشَأنِ وضعَ رسیدگی بوکونه. ²⁴ در اویَ بیده کی ایتَه مصری مردای ایته اسرائیلی یَ ظُلم کودَأن دره، پس اون اسرائیلی جَه حمایت بوکود و اون مصری یَ بوکوشت و اون مظلومِ انتقامَ اونِ جَه بیگیفت. ²⁵ موسی خیال کوده کی اونِ برَأرأن فَهمده کی خدا خَأیه اونِ دسِ اَمرَه اوشَأنَ نجات بده، ولی اوشَأن نفهمستد. ²⁶ فردایی رِه دو تَه اِسرائیلی یَ بیده کی همدیگرِ اَمرَه دعوا گیفتَأن درد، اون بخَأست کی اوشَأنِ میَأن صُلح بوکونه، پس بوگوفت؛ ای عزیزان، شومَأن برَأرید، چره همدیگرِ اَمرَه اَطو رفتار کونید. ²⁷ ولی اون اِسرائیلی تَه کی خو همساده یَ ظُلم کوده موسی یَ کنار بزه و بوگوفت؛ کی ترَه اَمی میَأن قاضی و داور بوکوده؟ ²⁸ نوکونه خَأیی مرَم بوکوشی هوطو کی دیروز اون مصری مردایَ بوکوشتی؟ ²⁹ موسی وختی اَ گبَ بیشتَأوست فرار بوکود و سرزمینِ مِدیانِ میَأن سامان بیگیفت و هویَ دو تَه پسره صاحاب بوبُست. ³⁰ وختی چهل سال بوگوذشت، کوهِ سینا اَطرافِ بیابانِ جَه، خداوندِ فرشته ایتَه آتش بیگیفته بوته میَأن اونَ ظاهرَ بوست. ³¹ موسی اَ منظره یَ کی بیده حیرت بوکود، وختی بوشو جولوتر تا خوب فَأندره، خداوندِ صدا به اونِ گوش فَأرسه کی گوفته؛ ³² منم تی پئرَأنِ خدا، ابراهیمِ خدا، اسحاقِ خدا و یعقوبِ خدا. اونموقع موسی جی ترس بپرکست و جرأت نوکود فَأندره. ³³ خداوند اونَ بفرماست؛ تی پاپوشَ تی پا جَه بیرون بأور، چره کی زمینی کی اونِ رو ایسأیی زمینِ مُقدسی ایسه. ³⁴ من ظُلم و ستمی کی می قؤمَ بِه یَ بیدم و اوشَأنِ آه و ناله یَ بیشتَأوستم، و نزول بوکودم تا اوشَأنَ نجات بدم. هَسَه بیا تا ترَه اوسه کونم مصر. ³⁵ بله، هون موسایی کی اوشَأن ردَ کودد و بوگوفتد؛ کی ترَه اَمی میأن قاضی و داور بوکوده؟ خدا هونَ بواسطۀ اون فرشته ای کی بوته دورون اونَ ظاهرَ بوست حاکم و نجات دهنده تعیین بوکود. ³⁶ و هَ موسی بو کی مصرِ دورون مُعجزات بوکود و اسرائیلِ قؤمَ جی مصر بیرون بأورد و جی دریای سرخ ردَ کود و چهل سال بیابانِ دورون اوشَأنَ رهبری بوکود. ³⁷ و هَ موسی بو کی اسرائیلِ قؤمَ بوگوفت؛ خدا شیمی برأرأنِ جَه ایتَه پیامبر می مَأنستَأن شیمی میأن اوسه کونه. ³⁸ موسی بیابانِ میأن بنی اسرائیلِ قؤمِ اَمرَه بو، و واسطه ای بو بین اَمی اَجداد و اون فرشته ای کی کوهِ سینا جَه اونِ اَمرَه گب بزَه و اون پیامِ زنده یَ اونَ فَأده تا اَمرَه برسَأنِه. ³⁹ ولی اَمی اَجداد نخَأستد اونِ جَه ایطاعت بوکوند و اوشَأنِ دیل خَأسته کی وَأگردد مصر. ⁴⁰ و هارونَ بوگوفتد؛ اَمره خدایانی چَأکون کی اَمی پیشاپیش حرکت بوکونه، چره کی نَأنیم اَ موسی سر کی اَمرَه جی مصر بیرون باورد چی بأمو دَأره. ⁴¹ و هو روزَأن ایتَه بُت گوساله مَأنستَأن چَأکودد و اونِ رِه قربانی بوکودد، و به افتخار اونچی کی خودشأن چَأکوده بود جشن بیگیفتد. ⁴² خدا هم اوشَأنِ جَه خو رویَ وَأگردَأنه و اوشَأنَ ولَ کود تا آسمانِ ستاره یانَ پرستش بوکوند. هوطویی کی پیغمبرَأنِ کیتابِ دورون بینیویشته بوبُسته: ⁴³ نه، بلکی شومَأن «ملوکِ» خیمه و شیمی خدا «رِمفانِ» ستاره یَ شیمی مرَه گردأنِه اید، هون بُت هایی کی شیمی دسِ اَمرَه چَأکوده بید تا اوشَأنَ عبادت بوکونید. پس شومرَه به بابلِ اوطرف تبعید کونم. ⁴⁴ اَمی اَجداد خیمۀ عبادتَ بیابانِ دورون خوشَأنِ مرَه حمل کودد، هو خیمه ای کی موسی خدا دستورِ اَمرَه و طبقِ هون نمونه ای کی اونَ نیشان بدَه بو چَأکوده بو. ⁴⁵ اَمی اَجداد وختی یوشع رهبری مرَه، کنعانِ سرزمینَ جی اَقوامی کی خدا اوشَأنِ پِشِ جَه بیرون تَأوَأده بو بیگیفتد، خیمۀ عبادتَ خوشَأنِ اَمرَه بأوردد و تا داوودِ اَیام اونِ دورون عبادت کودد. ⁴⁶ خدا داوودَ لُطف دَأشته و اونم خدا جَه بخَأست کی وَأله یعقوبِ خدا رِه ایتَه خانه چَأکونه. ⁴⁷ ولی اَ سُلیمان بو کی خدا رِه خانه ای چَأکود. ⁴⁸ ولی خدایِ مُتعال خانه ای دورون کی انسانِ دسِ اَمرَه چَأکوده بوبُسته بِه سامان نیگیره. هوطو کی نبی بوگوفته؛ ⁴⁹ خداوند فرمایه؛ آسمان می پادشاهی تخته، و زمین می پا جیرِ کُرسی، ⁵⁰ مگر می دس همۀ اَشَأنَ خلق نوکوده؟ ⁵¹ ای خدا نشناسان، ای یاغیان کی ذاتاً کافرید و شیمی گوشَأن کره، شومَأنم شیمی اَجدادِ مَأنستَأن بر ضدِ روح القدس مقاومت کونید. ⁵² کَ پیغمبره کی شیمی پئرَأن اونَ اَذیت و آزار نوکوده بِد؟ اوشَأن هر کسی یَ کی دربارۀ اون عادلِ اَمون پیشگویی بوکوده بِه کوشتد، و اَمی زمان شومَأن خودِ اونَ خیانت بوکودید و بوکوشتید. ⁵³ شومأنی کی بواسطۀ فرشته یَأن شریعتَ بدس بأوردید، ولی عمداً اونِ جَه ایطاعت نوکودید» ⁵⁴ شورا اَعضاء وختی اَ گبانَ بیشتَأوستد، چنان عصبانی بوبُستد کی خوشَأنِ دندانانَ به هم ساوستد. ⁵⁵ اما اِستیفان پور جی روح القدس آسمانَ فَأندرست، و خدا جلال و عیسی یَ کی خدا راستِ طرف ایسَه بو بیده. ⁵⁶ بازن بوگوفت: «فَأندرید، هَسَه آسمانَ دینم کی وَأشکافته و اِنسانِ پسرَ دینم کی خدا راستِ طرف بپا ایسَه» ⁵⁷ هَ موقع کسانی کی اویَ ایسَه بود دِ طاقتِ نَأوردد و فریاد بوکودد و خوشَأنِ گوشَ بیگیفتد و همه تَه فوتورکستد اِستیفانِ سر ⁵⁸ و اونَ فَأکش فَأکش جی شهر بیرون بوبوردد و سنگسار بوکودد. کسانی کی بر علیه اِستیفان شهادت بدَه بود و دیگرانی کی اونَ سنگسار کودَأن دوبود، خوشَأنِ عبایانَ بکدد و ایتَه جوانِ پا جیر بنَأد کی اونِ نام «شائول» بو. ⁵⁹ وختی اِستیفانَ سنگسار کودَأن دوبود اون دوعا بوکود و بوگوفت:«ای خداوند عیسی، می روحَ قبول بوکون» ⁶⁰ بازن زانو بزَه و صدایِ بلندِ اَمرَه بوگوفت:«خداوندا، اَ گوناهَ به اَشَأنِ حیساب نِنن» اَنَ بوگوفت و جان بدَه.