¹ ایروز پطرس و یوحَنا ساعت سه بعظهر کی وختِ دوعا بو شوئون دوبود معبد. ² هو موقع چن نفر، ایتَه مردایَ کی فلجِ مادر زاد بویَ اَوردَأن دوبود، اوشَأن اون فلجَ هر روز معبدِ اون دروازه کی «قشنگه دروازه» نام دَأشتِه جولو نیشَأنِئِد تا مردمی کی شوئون دوبود مَعبدِ دورونِ جَه گدایی بوکونه. ³ وختی اون مردای پطرس و یوحنایَ بیده کی خَأیِد بوشود معبدِ دورون، اوشَأنِ جَه صدقه بخَأست. ⁴ ولی پطرس و یوحَنا اونَ فَأندرستد، و پطرس اونَ بوگوفت:«اَمرَه فَأندر» ⁵ او مردایم اوشَأنَ فَأندرست و منتظر بو کی چیزی اونَ فَأدد. ⁶ ولی پطرس اونَ بوگوفت:«من طلا و نُقره نَئرم ولی اون چی کی دَأرمَ ترَه فَأدم، به نام عیسای مسیحِ ناصری ترَه دستور دهم ویریز و راه بوشو» ⁷ بازن اون مردایِ راست دسَ بیگیفت و اونَ ویریزَأنی. هو لحظه اونِ پاهان و ساقان قوّت بیگیفت ⁸ و خو جا جَه ویریشت و خو پاهانِ رو بِئسَه و راه دکفت، و هَطو کی واز واز کوده و خدایَ شُکر کوده اوشَأنِ مرَه بوشو معبدِ دورون. ⁹ همۀ مردم اونَ بیدد کی راه شوئون دره و خدایَ شُکر کونه. ¹⁰ ولی وختی بفهمستد اَ مردای هونی ایسِه کی کی قبلاً معبدِ قشنگِ دروازه ورجَه نیشته و گدایی کوده، خیلی تعجب بوکودد. ¹¹ هوطو کی اون مردای پطرس و یوحنایَ دوچوکسته بو و اوشَأنِ جَه سیوایَ نوبوسته، همۀ مردمی کی حیرت بوکوده بود، سلیمانِ ایوانِ سر اَشَأنِ طرف بودووستد. ¹² وختی پطرس بیده کی مردم اَمون دأرد، اوشَأنَ بوگوفت:«ای اسرائیلِ مردکان، چره اَ کارِ جَه تعجب بوکوده دَأرید؟ چره اَمرَه اَطو خیره بوسته دَأرید، خیال کونید کی اَمَأن اَمی تقوا و قدرتِ اَمرَه اَ مردَ شفا بدَه ئیم؟ ¹³ ابراهیم و اسحاق و یعقوبِ خدا، اَمی پئرَأنِ خدا، خو خدمتکار عیسی یَ جلال بدَه، هونی کی شومَأن اونَ تسلیم بوکودید و پیلاطُسِ حضورِ جَه اونَ انکار بوکودید. هر چن پیلاطُس دیل خَأستِه کی اونَ آزادَ کونه. ¹⁴ ولی شومَأن اون قُدوسِ عادلَ مُنکر بوبُستید، و اصرار دَأشتید کی اونِ جا ایتَه قاتل آزادَ بِه. ¹⁵ شومَأن اون مردی کی سرچشمۀ زندگی بویَ بوکوشتید، ولی خدا اونَ مَردن پسِ رِه جی مُرده یان زندَه کود و اَمَأن شاهدیم کی اَ ایتفاق دکفت. ¹⁶ و اَ شخصَ کی دینید و شِنَأسید، عیسی نامِ قدرت اَ مردَ قوّت ببخشِه دَأره و بخاطر ایمان به اونِ نام اَ کار انجام بوبُستِه، بله، شیمی چومِ جولو ایمانی کی بواسطۀ عیسایه اَ مردَ ساق و سلامت بوکود. ¹⁷ و هسَه ای برَأرَأن، دَأنم کی شومَأن و شیمی حاکمان جی روی نادانی اَ کارَ بوکودید. ¹⁸ ولی خدا به اَ طریق، اون پیشگویی هایی کی خیلی پیشترَأن خو اَنبیاء زبانِ جَه بفرماسته بو، کی مسیح وَأستی رنج و زحمت بیدینه یَ، به انجام برسَأنی. ¹⁹ پس توبه بوکونید و خدا طرف وَأگردید تا شیمی گوناهان پاکَ بِه و آرامش و آسایشِ دوران جی خدا طرف فَأرِسِه ²⁰ و خدا عیسی مسیحَ، کی جی هو اول شیمی وَسی انتخاب بوکوده بویَ دوباره اوسِه کونه. ²¹ چون هوطو کی خدا بواسطۀ خو اَنبیاء خیلی وخت پیش اعلام بوکوده بو، اون تا موقعی کی همه چی تازه بیبِه وَأستی آسمانِ میَأن بِئسِه. ²² موسی بفرماست؛ خداوند شیمی خدا، شیمی برَأرَأنِ جَه پیامبری می مَأنستَأن شمرِه اوسه کونه، اون چی کی شُمرَه گویه یَ گوش بوکونید. ²³ و هر کسی اونِ جَه اِطاعت نوکونه، قؤمِ جَه نابودَ بِه و جی میَأن شِه. ²⁴ و همۀ اَنبیاء جی سَموئیل به بَعد، همه تَه اَ روزأنَ پیشگویی بوکوده بود. ²⁵ شومَأن پیغمبرَأنِ اولادید، هَنه وَسی اون عَهدی کی خدا اَمی اَجدادِ اَمرَه دوَستِ میَأن سهمی دَأرید و او عهدِ وارث به حیساب اَئید، وختی کی ابراهیمَ بوگوفت؛ همۀ زمینِ اَقوام تی نسلِ جَه برکت گیرد. ²⁶ وختی خدا خو بنده عیسی یَ مبعوث بوکود اونَ پیشتر جی دیگران، اول شیمی ورجَه اوسه کود تا شمرَه جی راههای شرارت و گوناه وَأگردَأنه، و اَطو خدا شُمره برکت بدَه.