¹ پنج روز بعد، کاهنِ اعظم حَنانیا، چن نفر جی مشایخ و ایتَه وکیلِ اَمرَه کی اونِ نام تِرمولُس بو بأمود قیصریه و بوشود فرماندارِ ورجَه و پولسِ جَه شکایت بوکودد. ² وختی پولسَ بأوردد و فِلیکسِ فرماندارِ حضورِ جَه حاضر بوکودد، تِرتولُس شکایتَ اَطو شروع بوکود:«ای عالیجناب فِلیکس، چون خیلی وخته کی شیمی سایه جیر اَمَأن صُلح و آرامش دَأریم و شیمی عاقبت اندیشی باعث بوبُسته اَمی وضع بهترَ بِه، ³ خودمَأنِ وظیفه دَأنیم هر جا و هر زمان کی بوبُسته اَمی مراتب قدردانی یَ شیمی خدمت عرض بوکونیم. ⁴ اما نِخَأئیم شیمی وختَ بیگیریم و شیمی سرَ بدرد بأوریم، خواهش کونیم همیشه مَأنستَأن اَمرَه لطف بوکونی و اَمی عَرایضِ مختصرَ توجه بفرمائی. ⁵ اَمرَه ثابت بوبُسته کی اَ مرد شخصی ایسه فتنه گر، کی جهانِ سرتاسرِ یهودیانِ میَأن شورش بپا کونه. تازه فرقۀ نصاری سردسته هم ایسه. ⁶ و سعی بوکوده بو کی اَمی معبدَ نجسَ کونه، هَنه وَسی اونَ بیگیفتیم و خَأستیم کی طبقِ اَمی شریعت اونِ مرَه رفتار بوکونیم و اونَ جزا بدیم، ⁷ ولی لیسیاسِ فرمانده بأمو و زورِ اَمرَه اونَ اَمی دسِ جَه بیرون بأورد، ⁸ و شاکیانَ دستور بدَه تا بَأید شیمی حضور. هَسَه اگر شومَأن خودتَأن اونِ جَه بازجویی بوکونید، حقیقتِ اَمی ایدعا شمرَه آشکارَ بِه» ⁹ یهودیانم همه تَه تِرتولُسِ گبأنَ تأئید بوکودد. ¹⁰ وختی فرماندار پولسَ ایشاره بوکود کی گب بزنه، اون اَطو جواب بدَه:«دَأنم کی سالیانِ درازی ایسِه کی شومَأن قؤمِ یهودِ مسائل و مشکلاتِ میَأن قضاوت کونید، هَنه وَسی خاطر جمعی مرَه شیمی حضورِ جَه خودمِ جَه دفاع کونم. ¹¹ شومَأن خودتَأن تَأنید تحقیق بوکونید و شمرِه معلوم بِهه کی جی موقعی کی من زیارتِ وَسی اورشلیمَ وارد بوبُسته دَأرم ویشتر جی دوازده روز نوگذره. ¹² و در اَ مدت هیچکس مرَه نیده دَأره کی پیله معبدِ دورون کسی اَمرَه جرّ و بحث بوکونم، و یا اَنکی کنیسه یانِ دورون یا شهرِ جَه، شورش راه تَأوَأدم و مردمَ می دؤر جمعَ کونم. ¹³ اوشَأن نِتَأند اتهاماتی کی مرَه زندَ ثابت بوکوند. ¹⁴ ولی شیمی ورجَه اعتراف کونم کی راه نجاتَ ایمان دَأرم و اَمی پئرَأنِ خدا عبادتِ رِه، جی اون راهی پیروی کونم کی اَشَأن اونَ فرقه دخَأند، من هر چی کی تورات و پیغمبرَأنِ کیتابانِ دورون بینیویشته بوبُسته یَ ایمان دَأرم. ¹⁵ منم اَشَأنِ مَأنستَأن خدایَ اُمید دَأرم و اعتقاد دَأرم کی عادلان و ظالمانِ رِه قیامتی در پیش ایسه. ¹⁶ هَنه وَسی همۀ می قوّتِ اَمرَه تلاش کونم خدا و انسانِ حضورِ جَه وجدانی پاکِ اَمرَه زندگی بوکونم. ¹⁷ من بعدِ سالیان دراز بوشوم اورشلیم تا قؤمِ فقیرانِ رِه هدیه بوبورم و قربانی هم تقدیم بوکونم. ¹⁸ معبدِ دورون اَ کارَ انجام دَئَن دوبوم کی اشَأن مرَه در حالی بیدد کی می سرَ بتراشته و تطهیر بوکوده بوم و نه دار و دسته ای می دور ایسَه بو و نه آشوبی بپا بوبُسته بو. ¹⁹ در اویَ چن تَه یهودی ایسَه بود کی ایالتِ آسیا شین بود، هَسَه وَأستی اوشَأن اَیَ شیمی حضورِ جَه بِئسَه بِد، تا اگر می جَه شکایتی دَأرد بوگوفته بِد. ²⁰ و یا اَنکی اشَأنی کی اَیَ ایسَأد بوگوید کی وختی شورا حضورِ جَه ایسَه بوم، چی جُرمی در من بیدد. ²¹ به جُز اَ ایتَه حرف کی شورا میَأن صدای بلندِ اَمرَه بوگوفتم؛ من اَن وَسی ایمروز شیمی میَأن محاکمه بوستَأن درم کی مُرده یانِ قیامتَ ایمان دَأرم» ²² در اَ موقع فِلیکس کی خُب یهودِ شریعتَ شنَأخته، محاکمه یَ عقب تَأوَأدَه و بوگوفت: «وختی لیسیاسِ فرمانده بَأیه، شیمی مسئله یَ بررسی کونم» ²³ بازن ایتَه اَفسرَ دستور بدَه کی پولسَ تحتِ نظر بدَأرد، ولی تا حدودی اونَ آزاد بند و وَألد اونِ دوستان بَأید اونِ دِئِن رِه و اونِ احتیاجاتَ برطرف بوکوند. ²⁴ چن روز بعد فِلیکس فرماندار خو زن دروسلا مرَه کی یهودی بو بأمو و اوسه کود پولسِ دونبال و اونِ گبانَ دربارۀ ایمان به عیسی مسیح گوش بوکود. ²⁵ وختی پولس جی عدالت و پرهیزکاری و داوری آینده گب بزَه، فِلیکس بترسه و بوگوفت:«تا هَ یَ وسته، تَأنی بیشی، ایتَه وختِ دیگر دوباره ترَه دخَأنم» ²⁶ فلیکس اُمید دَأشته کی پولس ایتَه رشوه اونَ فَأده، هَنه وَسی بارها اونَ اِحضار کوده و اونِ مرَه گب زَئِه. ²⁷ بعدِ دو سال «پورکیوس فِستوس» فِلیکسِ جانشین بوبُست. فِلیکس چون خَأسته یهودیانِ سر مِنّت بنه و اوشَأنَ راضی بدَأره، هَطو پولسَ زندانِ دورون دَأشته.