¹ بازن پولس جی آتن بوشو قُرِنتُس. ² در اویَ ایتَه یهودی مردایَ مرَه آشنا بوبُست کی اونِ نام «اَکیلا» بو و اونِ زنِ نام بو «پریسکیله» و تازه جی ایتالیا بأمو بو، چره کی «کلودیوسِ» قیصر فرمان بدَه بو کی همۀ یهودیان وَأستی جی روم بوشود بیرون. پولس بوشو اوشَأنِ دِئِن رِه، ³ و چون پولسم اوشَأنِ مَأنستَأن خیمه دوز بو، اوشَأنِ ورجَه بِئسَه و کارَ مشغول بوبُست. ⁴ اون هر شنبه روز شوئِه کنیسه و یهودیان و یونانیانِ مرَه گب زَئِه و سعی کوده کی اوشَأنَ قانع بوکونه. ⁵ وختی سیلاس و تیموتائوس جی مقدونیه بأمود، پولس همۀ خو وختَ بنَه موعظه رِه و یهودیانِ رِه دلیل اَورده کی عیسی هون مسیحه موعوده. ⁶ ولی بعضی جی یهودیان اونِ اَمرَه مخالفت کودد و اونَ فُحش دَئِد و بدوبیراه گوفتد، پولس خو ردا دامنَ تکان بدَه و اوشَأنَ بوگوفت:«شیمی خون خودتانِ گردنه، می گردن نییِه. جی اَن پس شؤم غیرِ یهودیانِ ورجَه» ⁷ بازن جی کنیسه بوشو ایتَه غیرِ یهودی خانه کی خداپرست بو و «تیتوس یوستوس» نام دَأشته. اونِ خانه کنیسه مرَه دیوار به دیوار بو. ⁸ ولی کنیسه رئیس کریسپوس، و همۀ اونِ خانواده خداوندَ ایمان بأوردد. و خیلی جی قُرِنتُسِ مردمم وختی خدا پیامَ بیشتَأوستد، ایمان بأوردد و تعمید بیگیفتد. ⁹ ایتَه شب خداوند رویأ میَأن پولسَ بوگوفت:«نوَه ترسِن، گب بزن و ساکت نِئس، ¹⁰ من تی اَمرَه یم و هیچ کس نِتَأنِه ترَه آزاری برسَأنه، چره کی اَ شهرِ دورون من آدم زیاد دَأرم» ¹¹ پس پولس یک سال و نیم در هویَ بِئسَه و خدا کلامَ اوشَأنَ تعلیم بدَه. ¹² ولی وختی «گالیو» یونانِ فرماندارِ بوبُست، یهودیان بر ضدِ پولس مُتحد بوبُستد و فووُستد پولسِ سر و اونَ بوبوردد دادگاه تا محاکمه بوکوند، ¹³ اوشَأن بوگوفتد:«اَ شخص مردمَ وادار کونه کی خدایَ برخلافِ قانونِ شریعت پرستش بوکوند» ¹⁴ وختی پولس خَأسته گب بزنه، گالیو یهودیانَ بوگوفت:«اگر جُرم و جنایتی در میَأن بیبِه وَأستی شیمی شکایتَ گوش بوکونم، ¹⁵ ولی چون شیمی مُشکل مربوط به کلمات و اشخاص و شیمی مذهبِ قوانینه، خودتان اونَ حل و فصل بوکونید، من نخَأیم اَجور چیزَأنِ میَأن دخالت بوکونم» ¹⁶ بازن همۀ اوشَأنَ جی دادگاه بیرونَ کود. ¹⁷ اوشَأنم فووَستد سوستِنِس سر کی کنیسه رئیس بو، و دادگاه جولو اونَ پَأیی بزَد. ولی گالیو خورِه نِنَه و اِعتنا نوکود. ¹⁸ پولس بعدِ ایته مدتی طولانی کی اویَ ایسَه بو، آخر سر مسیحیانِ جَه خداحافظی بوکود و کشتی اَمرَه بوشو سوریه. و آکیلا و پریسکیله یَ خو مرَه بوبورد. اون کِنخریه جَه خو سرَ بتراشت چره کی اَطو نذر بوکوده بو. ¹⁹ وختی فَأرسد اَفِسُس، خو همسفرانِ جَه سیوایَ بوست و تنهایی بوشو کنیسه تا یهودیانِ اَمرَه گب بزنه. ²⁰ اوشَأن اونِ جَه بخَأستد کی ویشتر اویِ بِئسِه، ولی اون قبول نوکود. ²¹ و اوشَأنِ جَه خداحافظی بوکود و بوگفت: «اگر خدا بخَأیِه باز شیمی ورجَه اَیم» بازن کشتی یَ سوارَ بوست و اَفِسُسِ جَه بوشو. ²² و قیصریه جَه کشتی جَه بیجیر بأمو و بوشو اورشلیم، و بعدِ اینکی کلیسا ایماندارانِ اَمرَه دیدار بوکود، راه دکفت و بوشو اَنطاکیه. ²³ ایتَه مدت اویَ بِئسَه و باز راه دکفت بوشو سفر. اون سرزمین های غَلاطیه و فریجیه یَ گردسته و شاگردانَ اوشَأنِ ایمانِ میَأن اُستوارَ کوده. ²⁴ در اَ موقع ایتَه یهودی مردای کی اونِ نام «آپولس» و اسکندریه مصرِ شین بو، بأمو اَفِسُس. آپولس هم مُعلمِ کیتاب مقدس بو و هم ایتَه سخنران و واعظ خوب. ²⁵ اون خداوندِ راه جَه تعلیم بیده بو و پور جی شور و حرارتِ روحانی بو. اون دربارۀ عیسی زندگی دوروست مردمَ تعلیم دَئِه، هر چن فقط یحیی تعمیدِ جَه خبر دَأشته. ²⁶ اون کنیسه دورون بی هیچ ترسی شروع بوکود قدرتِ اَمرَه موعظه کودَأن، پریسکیله و آکیلا اونِ گبانَ کی بیشتَأوستد، اونَ بأوردد خوشَأنِ خانه و دقتِ اَمرَه خداوندِ راهَ، اونِ رِه توضیح بدَأد. ²⁷ وختی آپولس بخَأست کی بیشه یونان، ایمانداران اونَ تشویق بوکودد و اویِ مسیحیانِ رِه نامه بینیویشتد کی اونِ جَه پذیرایی بوکوند، وختی اون فَأرسه یونانَ، کسانی یَ کی بواسطۀ فیض ایمان بأورده بود خیلی کمک بوکود. ²⁸ چره کی جمعِ میَأن یهودیانِ مرَه بحث کوده و دلایل قوی اَمرَه اوشَأنِ اِدعایَ ردَ کوده، و کیتاب مقدسِ جَه دلیل اَورده و ثابت کوده کی عیسی هون مسیحه.