¹ شهرِ قیصریه میَأن ایتَه مردای زندگی کوده کی اونِ نام «کُرنِلیوس» بو و جی فرمانده یانِ ایتَه هنگِ رومی به نامِ هنگِ ایتالیایی بو. ² اون و اونِ خانواده آدمایِ دوروستکار و خداترسی بود، اون همیشه خدا درگاهَ دوعا کوده و فقیرانَ صدقه فَأدَه یِه. ³ ایروز حدود ساعت سه بعظهر خدا فرشته یَ رؤیا میَأن بیده کی اونِ ورجَه بأمو و بوگوفت:«ای کُرنِلیوس» ⁴ کُرنِلیوس وحشتِ اَمرَه اونَ خیرَه بوست و بوگوفت:«بله خداوند» فرشته بوگوفت:«تی دوعا یان و صدقه یان خدا پیشگاهِ جَه در بوجُر، هدیه یادآوری مَأنستَأن قبول واقع بوبُسته. ⁵ هَسَه کسانی یَ اوسَه کون شهرِ یافا تا شمعون کی پطرسَ معروفِ یَ به اَیَ بأورد. ⁶ اون شَمعونِ دَبّاغِ خانه مهمانه کی اونِ خانه دریاکنارِ جَه نَهَه» ⁷ هَطو اون فرشته ای کی اونِ اَمرَه گب زَئَن دوبو جی اونِ ورجَه بوشو، اون دو نفر جی خو خادمان و ایتَه جی خو سربازانَ کی مردِ دینداری بویَ دخَأد، ⁸ و همۀ ماجرایَ اوشَأنِ رِه تعریف بوکود و اوشَأنَ اوسَه کود شهرِ یافا. ⁹ فردایی ظهرِ موقع کی اوشَأن راه میَأن ایسَه بود و ایبچه بمَأنسته بو فَأرسد شهرَ، پطرس بوشو خانه بامِ سر تا دوعا بوکونه. ¹⁰ در اویَ اونَ ویشتا بوبُست و بخَأسته کی ایتَه چی بوخوره. وختی غذا آمادَه کودَأن دوبود، اون جی خودش بیخودَ بوست و رؤیا بیده. ¹¹ اون در اون حال بیده کی آسمان وَأشکافته دَأره و ایتِه چی پیلدانه سُفره مَأنستَأن کی چهار گوشِ جَه آویزانه اَمون دره زمینِ طرف، ¹² و اونِ میَأنم همه جور چهارپا و خزنده و پرنده جَه پوره. ¹³ اونموقع ندایی به اونِ گوش فَأرِسه کی گوفته:«ای پطرس، ویریز سر وَأوین و بوخور» ¹⁴ پطرس جواب بدَه:«نه ای خداوند، چره کی هیچوخت چیزِ حرام و نجسَ لب نزَه دَأرم» ¹⁵ دومین بارِه هو صدا بأمو کی بوگوفت:«اونچی کی خدا حلال بوکوده یَ، تو نجس نوگو» ¹⁶ اَ اِتفاق سه بار تکرار بوبُست و بازن سفره به آسمان بوبورده بوبُست. ¹⁷ در هو حال کی پطرس فکر کودَأن دوبو کی اَ رؤیا معنی چیسه، کُرنِلیوسِ اوسِه بوبُسته یان، وَأورس وَأورس شمعونِ خانه یَ پیدا کودد و فأرسد اونِ خانه درِ سر. ¹⁸ اوشَأن صدایِ بلندِ اَمرَه وَأورسِد:«آیا شمعونِ معروف به پطرس اَیَ مهمانه؟» ¹⁹ پطرس هنوز دربارۀ او رؤیا فکر کودَأن دوبو کی روح اونَ بوگوفت: «فَأندر، سه نفر تی دونبال گردد. ²⁰ ویریز بوشو بیجیر و اوشَأنِ اَمرَه راه دکف بوشو و شک نوکون، چره کی اوشَأنَ من اوسه کوده دَأرم» ²¹ پطرس بوشو بیجیر و اوشَأنَ بوگوفت: «من هونی ایسم کی اونِ دونبال گردید، چی وَسی بأموئید اَیَه؟» ²² جواب بدَأد:«فرمانده کُرنِلیوس کی شخصِ دوروستکار و خداترسی ایسه و همۀ یهودیانِ ورجَه خوشنامه اَمرَه اوسه کوده اَیَ. اون فرشتۀ مقدسِ جَه دستور بیگیفته کی تی دونبال اوسه کونه و ترَه دعوت بوکونه خو خانه و تی گبانَ بیشتَأوه» ²³ پس پطرس اوشَأنَ بوبورد خانه دورون و اوشَأنِ جَه پذیرایی بوکود. و فردایی ویریشت و اوشَأنِ اَمرَه راه دکفت، و چن نفر جی شهرِ یافا ایماندارانم اونِ اَمرَه بوشود. ²⁴ فردایی قیصریه یَ فَأرسد، کُرنِلیوس خو دوستان و خویشانَ دعوت بوکوده بو و همگی اَشَأنِ رَأفأ ایسَه بود. ²⁵ وختی پطرس خَأسته بیشه خانه دورون، کُرنِلیوس بوشو اونِ پیشواز و خورَه تَأوَأدَه پطرسِ پا جیر و اونَ سُجده بوکود. ²⁶ ولی پطرس اونَ راستَ کود و بوگوفت:«ویریز، منم تی مَأنستَأن ایتَه انسانم» ²⁷ بازن هَطو کی همدیگرِ اَمرَه گب زَده بوشود خانه دورون و پطرس بیده کی خیلیَأن اویَ جمعَ بوسته دَأرد. ²⁸ پطرس اوشَأنَ بوگوفت:«شومَأن خودتأن دَأنید کی ایتَه یهودی رِه جائِز نییِه کی غیرِ یهودیانِ اَمرَه معاشرت بدَأره، ولی خدا مرَه نیشان بدَه کی نوَأستی هیچ کسَ نجس بدَأنم. ²⁹ پس هَنه وَسی وختی می دونبال اوسه کودید بدونِ چون و چرا بأموم. هَسَه بوگوئید چی وَسی بخَأستید کی بَأیم اَیَ؟» ³⁰ کُرنِلیوس جواب بدَه:«چهار روز قبل حدوداً هَ موقع یعنی ساعت سه بعظهر خودمِ خانه دورون دوعا کودَأن دوبوم کی ایمرتبه ایتَه مردای کی نورانی رخت به تن دَأشته مرَه ظاهرَ بوست ³¹ و بوگوفت:«کُرنِلیوس، تی دوعایان مُستجاب بوبُست و اون صدقاتی کی فقیرانَ فَأدَأیی خدا پیشگاهِ جَه منظور بوبُسته. ³² چن نفرَ اوسه کون شهرِ یافا تا شمعونِ معروف به پطرسَ بأورد اَیَ، اون شمعونِ دبّاغِ ورجَه کی اونِ خانه دریاکنارِ جَه نَهه مهمانه. ³³ منم سریع تی دونبال اوسه کودم و تونم لطف بوکودی و بأمویی. هَسَه همۀ اَمَأن خدا حضورِ جَه حاضریم تا اونچی کی خدا ترَه بفرماسته یَ بیشتَأویم» ³⁴ پطرس شروع بوکود به گب زَئَن و بوگوفت:«هَسَه بفَهمستم کی خدا مردمانِ میَأن هیچ فرقی نِنه و هیچ تبعیضی قائل نیبِه. ³⁵ بلکی هر کی اونِ جَه بترسه و دوروستکار بیبِه جی هر قؤمی کی بیبِه خدا مقبوله. ³⁶ خدا خو پیامَ قؤمِ اسرائیلِ رِه اوسه کود و بواسطۀ عیسی مسیح کی همۀ قومأنِ خداونده، صُلح و سلامتی مُژده یَ اِعلام بوکود. ³⁷ شومَأن خودتَأن دَأنید کی همۀ اَ چیزَأن جی جلیل شروع بوبُست بعدِ اون تعمیدی کی یحیی اونِ رِه موعظه کوده و بازن همۀ یهودیه میَأن پخشَ بوست. ³⁸ و خدا، عیسایِ ناصریَ روح القُدس و قوّتِ اَمرَه مَسح بوکود، و اون همه جا شوئِه و کارای خُب انجام دَأئِه و همۀ کسانی کی شیطانِ اَسیر بوبُسته بودَه آزادَه کوده، چره کی خدا اونِ اَمرَه بو. ³⁹ اَمَأن شاهدِ همۀ او کارانی ایسیم کی عیسی یهودیانِ سرزمین و اورشلیمِ میأن انجام بدَه. اوشَأن اونَ به صلیب میخکوب بوکودد و بوکوشتد. ⁴⁰ ولی خدا اونَ روزِ سومِ رِه زنده و ظاهرَ کود، ⁴¹ ولی نه همۀ قؤمِ رِه، بلکی فقط شاهدانی رِه کی خدا جی پیشترأن تعیین بوکوده بو، یعنی اَمَأنی کی بعدِ اونِ زنده بوستَأن اونِ اَمرَه خوردیم و وَأخوردیم. ⁴² اون اَمرَه فرمان بدَه کی اَ حقیقتَ شهادت بدیم و قؤمَ اِعلام بوکونیم کی خدا اونَ تعیین بوکوده تا مُرده یان و زنده یانِ داور بیبِه. ⁴³ همۀ پیغمبرَأن دربارۀ اون شهادت بدَه دَأرد کی هر کسی اونَ ایمان بأوره، بواسطۀ اونِ نام اونِ گوناهان آمرزیده بِه» ⁴⁴ پطرس هنوز گب زَئَن دوبو کی روح القُدس همۀ اون کسانی کی پیامَ ایشتَأوستَأن دوبودَ نازل بوبُست. ⁴⁵ بعضی جی ایماندارانِ یهودی نژاد کی پطرسِ اَمرَه بأمو بود، وختی بیدد کی روح القُدس حتی غیرِ یهودیانِ رو هم نازل بوبُست، تعجُب بوکودد. ⁴⁶ چون خودشَأن ایشتَأوستَأن دوبود کی اوشَأن به زبانهایی خدایَ ستایش کوند و گب زَند کی تا اونموقع نَأنِستد، اونموقع پطرس بوگوفت: ⁴⁷ «هَسَه کی اَشَأن اَمی مَأنستَأن روح القُدسَ دریافت بوکوده دَأرد، آیا کسی تَأنه بوگویه کی اَشَأن نوَأستی تعمید بیگیرد؟» ⁴⁸ پس پطرس دستور بدَه کی اوشَأنَ در نام عیسی مسیح تعمید بدد. اوشَأنم پطرسِ جَه بخَأستد کی چن روزی اوشَأنِ ورجَه بِئسِه.