1 पौलुसा री तरफा न जो यीशु मसीह रा कैदी सा, होर भाई तीमुथियुसा री तरफा न आसरै प्यारे सैंघी फिलेमोन l 2 होर बैहण अफफीया,होर आसरै सैंघी योद्धा आरखिप्पुस होर फिलेमोना रै घौरा री मण्डली रै नाँ l 3 आसरै बापू परमेश्वर होर प्रभु यीशु मसीह री तरफा न अनुग्रह होर शान्ति तूसा बै मिल्दी रौहे l 4 हाँऊ हमेशा परमेशवरा रा धन्यवाद केरा सा होर आप्णी प्रार्थना न भी तौभे याद केरा सा l 5 किबैकि हाँऊ तेरे तेई प्यार होर बशाह री चर्चा शुणा सा ज़े सेभ पवित्र लोका सैंघै होर प्रभु यीशु पैंधै सा l 6 हाँऊ प्रार्थना केरा सा कि बशाह न तेरआ शामिल होणा, तुसरी सेभ भलाई री पछियाणा न, मसीह री तैंईये शक्तिशाली होला l 7 किबेकी हे भाई मुम्बे तेरे प्यारा न बड़ा आनन्द होर शांति मिली, तैबै कि तेरे द्वारा पवित्र लोका रै मन हौरे भरे हुए सी l 8 तैबै अगर मुम्बै मसीह न बड़ी हिम्मत सा कि जो गैल ठीक सा, तेईरा हुक्म तौभे देनू l 9 तैबैबी मुम्बै खापरै पौलुसा बै जो एबै बी मसीह यीशु री तैंईये कैदी सा,ऐ होर बी बड़ा शोभला लागा सा कि प्यारा सैंघै प्रार्थना केरणु l 10 हाँऊ आपणै शौहरू ऊनेसिमुसा री तैंईये, जूण मुं न पैदा हूआ सा,जैबै हाँऊ कैदा न ती, तौ सैंघै प्रार्थना केरा सा l 11 सौ ता पैहलै कोई कौमा रा नेई ती,पर एबै आसरै होर तूसरै बड़े कौमा रा सा l 12 तेईबै मतलब ज़े मेरे दिला रा टुकड़ा सा, मैं तूसा हागै बापस भेजुन्दा सा l 13 तेईबै हाँऊ आपू सैंघै रखणा चाहा ती कि सौ तेरी तरफा न कैदा न जो शुभसंदेशा रा कारण सा, मेरी सेवा केरला l 14 पर मैं तुसरी इच्छा बगैर किच्छ बी केरणा नेई चाहू,कि तूसरी ये दया जबरदस्ती नेई पर खुशी सैंघै होली l 15 किबैकि कि पता सौ तूसा न किच्छ रोजा री तैंईये तैबै अलग हुआ कि हमेशा तूसरै नेड़ रौहे l 16 पर एबै न लेईया नौकरा सैंई नेई वरना नौकरा न भी ठीक, मतलब भाई रै बराबर रौहे, जो मेरा ता खास प्याराऐ सा, पर ऐबै देह न होर प्रभु न भी, तेरा भी खास प्यारा होला l 17 तैबै अगर तू मुम्बै आपणा सैंघी बूझा सा, ता तेईबै ऐंढै अपनात् जैंढै मुम्बै l 18 अगर तेईये तेरा किच्छ नुकसान केरूदा सा, कि तेरा किच्छ लेऊदा सा, ता मेरे नाँ पैंधै लिखीत् l 19 हाँऊ पौलुस आपणै हौथा सैंघै लिखा सा कि हाँऊ आपूये भौरा सा,होर बोलणै री कोई जरूरत नेई मेरा कर्ज जो तौ पैंधै सा सौ तू ही सा l 20 हे भाई, ऐ खुशी मुम्बै प्रभु न तेरी तरफा न मिले l मसीह न मेरे जीऊ बै हौरा भरा केर l 21 हाँऊ तेरे आज्ञाकारी होणै रा भरोसा रखिया तौभे लिखा सा,ऐ जाणा सा कि जे किच्छ हाँऊ बोला सा, तू तेई न बी जादा केरला l 22 होर ऐ बी कि मेरी तैंईये रौहणै री जगहा तैयार रखा l मुम्बै आशा सा कि प्रार्थना रै जरिये हाँऊ तूसा बै देणा l 23 ईपफ्रास ज़े मसीह यीशु न तूसा सैंघै कैदी सा, 24 होर मरकुस होर अरिस्तर्खुस होर देमास होर लूका ज़े मुं सैंघै सी,तिन्हरा तौभे नमस्कार l 25 आसरै प्रभु यीशु मसीह रा अनुग्रह तुसरी आत्मा पैंधै होन्दा रौहे l आमीन l