¹ पौलुसो री तरफा ते जो मसीह यीशुओ रा कैदी ए और तीमुथियुस पाईयो री तरफा ते, आसा साथे काम करने वाळे प्यारे फिलेमोन ² और बईण अफफिया और म्हारे योध्दा अरखीप्पुस और फिलेमोनो री कअरो री कलीसिया रे नाओ, ³ म्हारे पिता परमेशर और मसीह प्रभु यीशुओ री तरफा ते ताखे दया और शान्ति मिलदी रओ। ⁴ आऊँ सदा परमेशरो रा धन्यवाद करूँआ और आपणी प्रार्थना रे बी ताखे याद करूँआ। ⁵ तेरे प्यार और विश्वासो रे बारे रे सुणी की, जो सबी पवित्र लोका साथे और प्रभु यीशुओ पाँदे ए, ⁶ आऊँ प्रार्थना करूँआ कि तेरा विश्वासो रे तेरा साथे ऊणा तेरी सारी पलाईया री पछयाणा रे मसीहो खे प्रभावशाली ओ। ⁷ कऊँकि ओ पाई! माखे तेरे प्यारो ते बऊत खुशी और शान्ति मिली, कऊँकि तेरी बजअ ते पवित्र लोका रे मन अरे-फरे ऊई गे। ⁸ इजी री खातर हालाँकि माखे मसीहो रे बड़ी इम्मत ए कि जो गल्ल खरी ए, तिजी री आज्ञा ताखे देऊँ। ⁹ तेबे बी मां स्याणे पौलुसो खे, जो एबे मसीह यीशुओ री खातर कैदी ए, ये ओर बी खरा लगेया कि प्यारो साथे बिनती करूँ। ¹⁰ आऊँ आपणे बच्चे उनेसुमुसो खे, जो मांते मेरी कैदा रे जम्मी रा, तांते बिनती करूँआ ¹¹ कि से पईले तो तेरे किजी कामो रा नि था, पर एबे तेरे और मेरे दूँई रे बड़े कामो रा ए। ¹² तेसखे ई, मतलब- जो मेरे काळजे रा टुकड़ा ए, मैं से तांगे वापस पेजी ता रा। ¹³ तेसखे आऊँ आपु गे ई राखणा चाऊँ था कि तेरी तरफा ते एसा कैदा रे जो सुसमाचारो री बजअ ते ए, मेरी सेवा करो। ¹⁴ पर मैं तेरी इच्छा ते बिना कुछ बी करना नि चाया, ताकि तेरी ये कृपा दबाओ रे नि पर खुशिया साथे ओ। ¹⁵ कऊँकि क्या पता से तांते कुछ दिन तक इजी बजअ ते लग ऊआ, ताकि सदा तां नेड़े रओ। ¹⁶ पर आजो ते नौकरा जेड़ा नी, बल्कि नौकरो ते बी खरा, मतलब- पाईयो जेड़ा रओ, जो मेरा तो खास प्यारा आए ई, पर एबे शरीरो रे और खास करी की प्रभुओ रे बी, खास प्यारा ओ। ¹⁷ अगर जे तूं माखे आपणा साथी समजेया, तो तेसखे ईंया ग्रहण कर, जेड़ा माखे। ¹⁸ अगर जे तिने तेरा कुछ नुकशाण करी राखेया या से तेरा कर्जदार ए, तो मेरे नाओ पाँदे लिखी लो। ¹⁹ आऊँ पौलुस आपणे आथो साथे लिखूँआ कि मां आपु परी देणा और इजी री बोलणे री जरूरत निए कि मेरा कर्ज जो तां पाँदे ए, से तूं ई ए। ²⁰ ओ पाई ! ये खुशी माखे प्रभुओ रे तेरी तरफा ते मिलो। मसीहो रे मेरे जिऊओ खे अरा-फरा करी दे। ²¹ आऊँ तेरा आज्ञाकारी ऊणे रा विश्वास करी की ताखे लिखूँआ और ये जाणूँआ कि जो कुछ आऊँ बोलूँआ, तां तिजी ते केथी बड़ी की करना। ²² और ये बी कि माखे रणे खे जगा त्यार राख, माखे उम्मीद ए कि तुसा री प्रार्थना रे जरिये आऊँ तुसा खे देयी देणा। ²³ इपफ्रास जो मसीह यीशुओ रे मां साथे कैदी ए ²⁴ और मरकुस, अरिस्तर्खुस, देमास और लूका जो मां साथे काम करने वाळे ए, इना री ताखे नमस्कार। ²⁵ म्हारे प्रभु यीशु मसीहो री दया तुसा री आत्मा पाँदे ऊँदी रओ। तथाअस्तु॥