¹ Polo, makampungu ma Yezu Kristu, na namame Timoteo, ka Filemoni, ma bhugonzani masu na dasu ma ka mukoro, ka nsika Apfia, ka Arshipa dasu ma ka bhila, ² na ka kanisa indo asubha ndabho ³ awako:nkisa na mulembe a Mbali apeshikani ka bhenu duwa wa Mbali Basu na Nkama Yezu Kristu. ⁴ Nisimaga Mbali mamu mwani mase ninisimbako subha kunga awamu. ⁵ Nangesi niibi dumba indo onai subha Nkama Yezu Kristu na bhugonzani awako gwa bhatakatifu ⁶ bhase.Nimuuli mukoro awako abhe subha dumba abhe na nkekwa gwa Kristu ka ibisasu kibhonga tawa ⁷ mase.Dumbi, nilebi muhimbo gboka na gunisa mulima gwa bhugonzani awako; nangesi kayenya uwe, namame, mbuka mulima a bhatakatifo achwereri. ⁸ Nanga uli, nango nibhe subha Kristu na shiyo namwe nanga ibisako indo ni akibhonga, ⁹ ni tamanyo ka lina la bhugonzani, nanga uli nikutichi kunga, nangesi imi , Polo, ngbe ngbeku, na gbokasi manyone ma ka mpungu ma Yezu Kristu. ¹⁰ Nikukechi gwa miki mamu, indo nimubhokoti ngo ni ka mpungu, Onesimo, ¹¹ indo andele ayebhi kako ma mukoro, batu manyone kanai pani, ka uwe na imi. ¹² Nikushikishi yeye soho soho lamu. ¹³ Nibhudhukanaki nai ka gimamu, nanga anikorye ka mamba awako, mwani indo ni ka mpungu gwa Enjili. ¹⁴ Nango ni bhindo, kiyagonzi pani kora kima kanga kanikana awako, nanga bhindo kibhonga awako kabhe pani koe ni ma maani, batu indo akudu na uwe. ¹⁵ Atokikane bhudhwane ka mwani pidhoni, nanga omutakane ka chanda chanda. ¹⁶ kanga kwa ngele pani, batu kwa ngbeku ma ngele, kwa ma kinama, mabhugonzani mamu ahimo, na mako taba, abhe kingbulu nabhe subha Nkama. ¹⁷ Bhindo kinigbehe kwa munyankiro maako, omuyakira kwa imi. ¹⁸ Na kabhe ngo agusi musa lako, nabhe ana tuna awako, ombisa subha kibaro awamu. ¹⁹ Imi, polo , ninikeke na kibhoko awamu mbedhemi, nilihe, nanga kuikaniche pani koe oipeshe ka imi uwe mbedhemi, ²⁰ Oi, namame, abhongi nizore dwa wako kibhonga lando, subha Nkama; onigunisa mulima subha Kristu. ²¹ Nikukechi tombana na simirana na kiididisa wako, ngo niibi koe okora yena indo niniyombe. ²² Mwani landoni, lonja kamu mamba tolo, nagesi nisimirani koe nipeshikani ka uwe, tombana na kunga awako. ²³ Epafrasi, dame ma ka mpungu subha Yezu Kristu, ²⁴ akuramuchi, Marko mbuleni, Aristarko, Demasi, Luka, bhadame bha ka mukoro. ²⁵ Nkisa a Nkama masu Yezu Kristu abhe na mulima awasu.