Imatiu 28

1 Isabati mẹ zẹtẹ da, ini ajuveinị ọkụshi ipaapa ọsẹ, di Imeri Imagidareni ọnri Imeri ọsa vẹ, de ve re irikuta ọnọ. 2 Re, di ẹtẹ jududo, fụvọki angẹni ọi Ananyiyi ọnya o chi fụrẹ ẹbẹẹba vẹ, do ve zina irẹta ene si ku irikuta ọnọ fiinaani, dọ yatụ tụra a. 3 Ọsisi ẹngwụzụ aani, o venebiri inyanya, di auru aani aa vụẹtẹ bẹnẹbẹnẹ. 4 Di angwa shi oserẹtẹ nin ana yizọ, dẹẹ bani, dẹ sẹdụ nyẹtẹ, dẹ simẹi azene su da. 5 Di angẹni ọnọ kaa yi anyẹnẹ ẹnẹ ka, "Asi angwa shi wụ nini; ma yẹ ki Ijesu, ana kani za ọchi-avashi ọnụ wee si nini. 6 Ọ zi kụ yi izọni, fụvọki ọ sha kwẹẹtẹ da, venebiri ọ mẹ ka gẹdẹgẹdẹ. Waa vẹ nin, ve re izi Ananyiyi bidi sụ tẹtẹ tụ. 7 Jantụ na kaa yi ẹziafu aani ka, 'Ọ sha kwẹẹtẹ fiini akaakana ẹnene su da. Re, ọ tụọvidi awụ nin a nọ Iganini. Izọ ọnụ ve ye e re e nini.' Re, ma ka yụ wụ nini da." 8 Di anyẹnẹ ẹnẹ zechị fiini irikuta ọnọ ini angwashi ọnri ụjẹ, de zue na kaa yi eziafụ aani. 9 Re, di Ijesu ne tu wa, dọ ka, "Ma kụ wụ ninee!" Di anyẹnẹ ẹnẹ vẹ, dẹ za Ijesu afụ, dẹ fẹkẹ ẹ. 10 Di Ijesu kaa yụ wa ka, "Asu ku shiangwa nini. Na wa na kaa yi ẹnyara ami nini, ka ẹẹ nọ Iganini. Izọ ene ve ye re mi." 11 Anyẹnẹ ẹnẹ maa na, di ẹnyi ini oserẹtẹ ẹnẹ, ngwụni irẹkụra na, dẹ na kaa yi arụfa ọbani nini isẹnẹ mẹ bo. 12 Ụmọni arụfa ọbani nin ne tu azẹkụ nin, dẹ geyi inọpati irẹyi ọnọ, dẹ si ẹkẹshi ọbani yi oserẹtẹ ẹnẹ, 13 dẹ kaa yụ wa ka, "Kaa yi aza nini ka, 'Eziafụ Ijesu ene ve yi oku aani inaafụ, i maa sụara.' 14 Aaviki igomina ọ wụ irenube ọnọni, i vaa mẹ ka ọ dọzẹ, dii kụ angwashi awụ nin kụra." 15 Di oserẹtẹ ẹnẹ dọ ẹkẹshi ọnọ, dẹ mẹ isẹna ka yụ wa ki ẹ mẹẹ. Di irenube ọnọni va garashi ini akaakana Iju nini, dọ yinaani vetu irajini. 16 Di eziafụ Ijesu ẹwụrọnya nọ Iganini, dẹ shirẹ nọ ini irẹsụfa ọni Ijesu ka yụ wa ka ẹ nọ. 17 Ụmẹ ene re, dẹ fẹkẹẹ, ama di ẹnyi aa jọirẹka. 18 Ijesu o ve tu wa, dọ kaa yụ wa ka,. "A si ụmọ bo ineeku ọnri inẹshẹ yi mi da. 19 Fụvavọ, ngwụ irẹkụravabẹ bo na, dụ wa kụ eziafụ va yi mi nini. Dụ waa mẹ isami yụ wa, ini irẹsha Ada ọnri Ozi ọnri Ifẹ Ọnini. 20 Waa zụ wa ka ẹ vatụra isa bo ọnim ka yụ wụ nini. Re, ma ya bẹrẹ wụ nini poro, nangwụ irama ẹshẹ."