1 Udi hio, Musa ngeyau ga Allah, "Ulun Israel bakoi akan harap ga aku mu ngeyau ga here bahwa Hanyu sa mengutus aku. Here mungkin mat ngeyau, 'Tuhan bakoi nyentarang tenga ga hanyu.'" 2 Akan tatapi, Allah ngeyau ga Musa, "Inon sa naan ta tangan nu hio?" Jawab Musa, "Ina tongkat ku." 3 Allah ngeyau, "Pedak tongkat nu hio ga tane." Maka, Musa medak tongkat e ga tane dan tongkat hio baubah menjari nipe. Musa malempat ba lawit, 4 Tatapi Tuhan ngeyau ga aye, "Ului tangan nu dan tulung lah ikui nipe hio." Maka, Musa nampului tangan e, nangkap ikui nipe hio, pahengau nipe hio menjari tongkat waleng. 5 Allah bapaner, "Huyulah aye ta hadapan ga ulun Israel di here mat harap bahwa hanyu nena Tuhan, Allah datu nini nu, Allah Abraham, Allah Ishak, pahengau Allah Yakub." 6 Udi hio, Tuhan bapaner ga Musa, "Aku akan ngami ga hanyu bukti sa lain. Tampasuk tangan nu ga huang jubah nu." Maka, Musa nampasuk tangan e ga huang jubah nu. Ganyah aye ngalur tangan e sa uah kusta, penu pahengau bintik-bintik mahilak sa sameh salju. 7 Udi hio, Allah ngeyau, "Wayah ina, tampasuk waleng tangan nu ga huang jubah nu." Musa nampasuk tangan e baubah menjari maeh seperti samula. 8 Allah ngeyau, "Jaka here koi harap ga hanyu ganyah hanyu ngulah mukjizat pahengau tongkat nu, here akan harap pas hanyu nyantarang mukjizat sa ka rueh ina. 9 Jaka here tatap koi harap udi hanyu nyantarang karueh tanda ina, alaplah ranu neke Witu Nil. Natuang ga tane dan ranu hio akan menjari ira." 10 Musa ngeyau ga Tuhan, "Tuhan, sebujur e, aku lain ulun sa marati bapaner, baik sa dahulu maupun wayah ina udi hanyu bapaner ga hamba-Nu ina. Aku koi marati dan fasih ta huang bapaner." 11 Tuhan ngeyau ga aye, "Hie sa menjarikan wawa ulun? Hie sa tau ngulah ulun bisu? Hie sa tau ngulah ulun marengen? Hie sa tau ngulah ulun nena atau pehe? Bakoikah Aku, Tuhan, sa iyuh ngulah kaluhan hio? 12 Jari, tulak lah! Aku akan nampahengau hanyu ganyah hanyu bapaner. Aku akan ngami paner ga hanyu mat na antuh." 13 Akan tatapi, Musa ngeyau, "Tuhan, aku mohon , utus bo ulun lain mat ngantuh pesan ina." 14 Udi hio, Tuhan sangit bulu e ga Musa dan ngeyau, "Koi sa naan Harun, pulak sa nai nu, ulun Lewi hio? Rasa ku aye marati bapaner. Tena nu, aye ganyah balua manalu hanyu dan aye akan senang tuu ganyah panalu di hanyu. 15 Hanyu harus bapaner ga aye dan mawara e inon sa harus na eyau e. Aku akan nampahengau kaon rueh dan mawara inon sa harus na gawi kaon. 16 Jari, Harun akan menjari juru bapaner nu. Sameh Allah, hanyu akan bapaner ga aye dan aye akan mawara ga ulun Isral. 17 Tulak dan aunlah tongkat nu. Pakai lah tongkat hio mat ngulah mukjizat-mukjizat sa lain." Musa Mananan Midian 18 Udi hio, Musa waleng ga Yitro, umpu sa laki. Musa ngeyau ga aye, "Elah nu aku waleng ga Mesir. Aku kakan nena inonkah bangsa ku masih welum." Yitro ngeyau ga Musa, "Tulak lah huang damai." 19 Udi hio, ganyah Musa masih naan ta Midian, Tuhan ngeyau ga aye, "Waleng bo ga Mesir ulah ulun-ulun sa kakan munu hanyu wayah ina haot matei." 20 Musa nampa amau harau dan kawan nakia e da entuh keledai dan waleng ga Mesir. Aye ngaun tongkat Allah ta tangan e. 21 Ganyah Musa lagi takia waleng ga Mesir, Tuhan bapaner ga aye, "Pas hanyu waleng ga Mesir, santarang ga Firaun mukjizat-mukjizat sa haot na ami ku ga hanyu. Akan tatapi, Aku akan ngulah Firaun makeng mat koi hakun ngelah here tulak. 22 Udi hio, hanyu harus ngeyau ga Firaun, 'Tuhan ngeyau ina: Israel ayelah anak-Ku sa panga tueh. 23 Dan, Aku ngeyau g hanyu mat ngelah anak ku tulak dan menyembah Ku. Jaka hanyu koi nunyu Israel tulak, Aku kan munu anak nu sa panga tueh.'" Anak Musa Nasunat 24 Huang bapanulak ga Mesir, Musa bamalam ta isa uneng. Tuhan kahaba Musa ta uneng hio dan bausaha munu e. 25 Akan tatapi, Zipora ngalap pisau watu dan manyunat anak e. Aye ngalap upak na halus e dan medak e ga pee Musa. Udi hio, aye ngeyau ga Musa, "Aye irilah pengantin ira ga aku." 26 Zipora ngantuh ina ulah aye haot nyunat anak e. Jadi, Allah ngelah Musa welum. Musa Hampe ta Mesir 27 Tuhan haot ngeyau ga Harun, "Tulak bo ga padang gurun mat manalu Musa." Maka, Harun tulak dan panalu Musa ta Gunung Allah. Aye nena Musa dan nyiuk e. 28 Musa ngeyau ga Harun kaluhan sa haot Tuhan perintahkan ga aye ngeyau dan tentang kaluhan mukjizat sa harus na ulah e mat ngabuktikan bahwa Allah haot mangutus e. 29 Udi hio, Musa dan Harun tulak dan manyimpun kaluhan tueh-tueh Bangsa Israel. 30 Harun bapaner ga here dan ngeyau kaluhan sesuatu sa haot na eyau Tuhan ga Musa. Udi hio, Musa nyentarang mukjizat-mukjizat ga here kaluhan. 31 Dan ulun-ulun Israel harap. Ganyah Bangsa Israel krasa bahwa Tuhan haot nena penderitaan here, here sujud dan menyembah Allah.