¹ Bulus, bwira Niyajiyʊwi, bo ni təmriya Yesʊ Kristiyʊ, a gwa nəbbəntangnga yəmbə nyamba nəbba Niyajiyʊwʊm sammənəm, yəmtangnga yəm bə nyam na ngatang rə yobi a tatan Niyajiyʊwi. ² Kangkə wa mʊra titangnga fʊriya yəmbə merə mwatəntəm ba Niyajiyʊwʊm, bə me nyar a mʊriyəm, ka təgbə yəm ba gəm kə məna dʊ tangngərtə warigʊwʊng. ³ A wai jii a sɨtɨsɨwi, ka jəgga yəm ba gəm a gwa təmrang ka ni go fi-finang ka gəngngəng. Bən nəngnga kang ke bəri sori wʊ Niyajiyʊ Ni jəgriya nənnʊwi. ⁴ Yɨgira Titusi, yəlliya miyʊ rə yəm bə nyami a mʊra nəbəntanga yəmbə nyam. Nəttətən dautən bə wi, bʊmte rə chimbə ləmmangngəm a gwa Niyajiyʊ Te nənnʊ na Kristi Yesʊ Ni jəgriya nənnʊ. ⁵ Bəraki nyang nyəngki gʊn dʊnna Karitai na ban yəngna jɨna rii bi, na samən tabe a bəttə warigʊ nyəngkən nən sori rəgəng. ⁶ A chi kwak Taba yʊ bə merə jiya kəbbariyəm, nibari rə nyʊi kwani, rə bətəm bə nga rəgəm bə merə gʊjiya kəbari, mebə təm swiyer də bwiran rə bʊnaiya tautangnga dʊrriyəm. ⁷ A chin kwak ni rə dəntələn da Ekklisiyan, a gratətta gʊ ta wʊ jəga gwa rʊwani nyiniyʊ wa Niyajiyʊwi, a yʊllo wʊ merə bwirani. Kari ba yʊllo ni səng yəmmi, rə bʊnai a mitang kan daangngi, no chʊwai, wʊ rə yəmmi mwami, na rə sʊwi. ⁸ A jiya nyangngi, a yʊllo wʊ yʊrə fʊbi, chʊgo ji nyai. A chin kwak a yʊllo wʊrə kəmmarang ka nyangngi, nyagʊwi a rii rə tata Niyaijiyʊwi, rə tautangnga dʊr. ⁹ A yʊllo wʊ tarə təmrang kən məssatən nən rə kumni, nyəngkə ba ne kumni bagi rə məssarang kə nyangngəng na bo bə wʊgarə kinəm. ¹⁰ Bəraki karə ba kʊsɨkʊsiyəm mwam, nyərarə bən mwetən jwinəm. Yəmna jiyʊ yərə kʊnni. Karə jʊllai bo mənni mərgə nəb. ¹¹ A chin kwak nən dang hanjim. Bə nəngnga məssarang ka jiya dautən bəwi, bərarə nyatang kə bwiran mənni nyəngngo kaina nəbbi. ¹² Kwan a mʊran jiyʊ bo nən bərsan a mʊra jiyʊ, ka sʊwe go, "Kiratawa nəbbə kəra nyatəm a kiya-kiya, bo mənni də bwiran, bərə yuumrəm, mənni bə jau jɨni dəni." ¹³ Yəm bambe bə nyam, yəngna hanjim rə kwewi nyəngkə ba chi rə kumni a mʊra yəm bə nyaməm. ¹⁴ Kari bən kaubwi rə kəmmarang ka mʊng a gwa kʊtəsəgniya Yahudawai, na sori ta jiyʊ ta nəbbi yə wʊlga yəm bə nyami. ¹⁵ A gwa bə ka yʊlgoim, wʊnə ji nən yʊlgo. Mənni bə me yʊlgoim na rə bʊnaiya yəmbə nyami wʊnə ji merə yʊlgoi. Bəraki furna jiyʊ na kəmmarang ka jiyəng ka kiya. ¹⁶ Sʊwe rə go kətə yəm Niyajiyʊ, mənni ka jau buriyangʊ a gwa swiyer da jɨni yʊwi. Ka yʊllo jɨni sirəmi na bə me bə nwi yəmməm. Me bən nga nən hanjim a dagi swiyer də nyan.