¹ Bulus bʊwai wa Kristi Yesʊwi, nabo chi Timotawʊs yɨgira Filimoni, chʊgo nənnʊ nən yotan dai, chʊgo swiyəri ya nənʊ bo, ² na wʊchʊwi ya nənʊ Afiya, na Arkifus chʊgo swiyəriya nənʊ wa kunni, na Ekklisiya bə kʊra bwi a kaita mʊwʊm. ³ Nətəta Niyajiyʊwi a chi ya gwa mwiyʊ, a jɨre wa gwa Niyajiyʊwi Tənənʊ na Nigra Yesʊ Nijəgri. ⁴ Kamən nəngngatən wʊnnan a Niyajiyʊ jʊtəkwang. Ka mən dəggəna nyini rʊwani a miyʊ. ⁵ Kən nwi yodai, tən yʊtang a yəm bə nyam bə tə ka rəgəm a Nigra Yesʊ, na nəbbə fʊngrəm warigʊ. ⁶ Mən rʊwa nyini mo mʊrgatang ka yʊtang ka yəm bə nyaməng ka jɨnəng ba nəngnga kumni a yʊtang ka wʊnə ji nyagʊwəng a nənnʊ a mʊra Kristiyʊwi. ⁷ Chiyamiyʊ kən nəngnga bwi ləmri rə titangnga fʊri bərarə yodai yan jənʊ, bəraki furna Ekklisiyai ka yuumtən bəra nən mwe, chiyamiyʊ. ⁸ Bərarə nyang kən yəm mo kamənə kumni a mʊra sori ya Yesʊwi sʊnən ji bən nəngəngai. ⁹ Mənni bo bərarə yodai, mən nəngnga chəllan mo me Bulus Ta grah, kʊ mʊwa jarəm bəra nən Kristi Yesʊ. ¹⁰ Kəmən nəngnganən chəllan bəra nən Onisinose, wʊn chi mən təi a mʊra chənti. ¹¹ Bəraki na nʊbə rə fini a gwa mwiyʊ, mənni kʊ karə fini a gwa mwiyʊ tən gwa mwiyʊ. ¹² Kən təmnən hangʊ, gʊwʊng fʊriya miyʊwi. ¹³ Kəməna fau mo mən ti hangʊ a gwa miyʊ na nəngngai mən swiyer də na bən nəngngai mənən a fʊlla mən ka mʊra chənti bərarə yəm bə ləmangngəmi. ¹⁴ Me mən farə mo mən nəngnga gʊji me rə ngatang ka mʊng. Fabə mo ji nya mən nəngngari a chi wʊ kwakgi, mənni a yʊllo wa kəmarang kə nyangngi. ¹⁵ Kai ki jiya wʊlgagənni a ji wʊreri go na bətə kaubwi tə chiga kʊrəkwang. ¹⁶ Me ba kaubwi a chi kewe, mənni bo ka li kewe, chiya dai a miyʊ. Hangʊ chiya dai a miyʊ mənni mən kəmma mo ka fʊriya mʊ a li kinəng deni warigʊ a gwa bwiyʊ na gwa Nigrai. ¹⁷ Kən dəbbi mo mən chʊgo swiyeri ki yi mən hangʊ nyəra nən me. ¹⁸ Ki ka nəngnga nən gʊji bwira ki, ki mən fʊng sʊni a gʊjiyʊ ki, kən dəb nəggənni. ¹⁹ Me, Bulus məmmən mʊla rə kang ka miying bən mərən. Me bən sʊnən sʊni, mʊ hai mən sʊni a miyʊ. ²⁰ O, chiya miyʊ, nəngngai mən tʊgarang bərarə Nigra; nimən gri a fʊriya miyʊ bəra nən Kristi. ²¹ Kən nəbbən yəmbə nyam mo bən nəngnga fini rə jiir da miyən, mən mʊlla nən, kən yəm mo bən nəngnga a li ji gʊllənni. ²² A nyangngi bo yəngnai mən gʊ səgri, mən ti fʊri mo bəri nyini rʊwana jɨnʊ bən kauwe bwi nən me a jɨni. ²³ Efafarasi, chʊgo miya jarəm bəri nən Kristi Yesʊwi, kə nəngnga sʊrang bo. ²⁴ Markʊs, Aritakʊs, Demas na Luka kagəm ba swiyerəm. ²⁵ Masi nəttetta Nigra Yesʊ Kristiyʊ a chiya we mʊ. Amin.