¹² Yesu ka sotǝnna ni wa buwei go, ''A fulla bǝn buwe nǝb bǝra jǝni jauri ya jautangǝ tǝn nati, kari bǝn buwe kagǝm bamum, tǝn chititanmu na dugurtita mu tǝn nǝbba kullǝyǝm bǝri jǝniya kaniyǝm, nyǝngkǝ hanjim ka bu ne gǝrin, kǝ ba chi da kǝn janǝn jǝniyamu. ¹³ Mǝnni ki bǝn nǝngnga buwonga gwa nati ki, buwowu nǝbbǝ meri jǝniya kaniyǝm, tǝn jugbe tǝn duube, ¹⁴ mǝnni bǝn dǝg nǝn kang, bǝraki hanjim merǝ juwu ba merǝn gǝri. Bǝn mǝrin a kowu bǝn nǝb gug nǝbbǝ nyam gǝri.'' ¹⁵ Kǝ kwan a muriya nǝbba chiya dantǝlǝn tǝ Yesu a nwi yai jǝni yaiyǝng, ka sotǝnna hanguwi go, ''Digtanga a kang ka chiya wu ba jau jǝni jauri a duuttǝta Niyajiyuwi!'' ¹⁶ Mǝni yesu ka sotǝn go, ''Gu ni ya kurabwi ya grajiya natiyǝng ka buwowu nǝb mwamǝng. ¹⁷ Jii ya nati ya lauweng, ka tǝm bwiran gu go sotǝnna nǝbbǝ buwonǝm, 'Tǝ be, bǝraki kǝn sur wunǝ ji warigu.' ¹⁸ Kǝ waringǝm ban jiyǝm a su berǝ jute dandangǝng, 'Wuri jiguwi ka sotǝn go kǝn suta kuu, mǝn fau mo na di nan jǝga. Kǝmǝn chillanne dǝbǝmǝn.' ¹⁹ Kǝ gu a suwe go,'Kǝ sutta tǝngatta swiyeri wa tantǝ tǝ nuwi mǝn fau mo na yǝgi bungo. Kǝn chǝllan, dǝbǝmǝn.' ²⁰ Mǝnni gu ni bo go, 'Kǝ nǝngnga nate, bǝrari nyang, me bǝn dǝmǝn be.' ²¹ Kǝ bwira hi ya kauwabwi a be sotǝnna nigran gu yai jǝni yaiye.Ki nigra kai hiyu a nǝngnga jwagǝrǝng, 'Ka sotǝnna bwiran gu go, kaubwi wulak na tu a muratǝta bɨrti rǝ jutǝ dang dang, na buwowe nǝbbǝ meri kumniyǝm, rǝ jugbe, tǝn duube.' ²² Kǝ bwirahi go 'Nigra, ji suwei kǝn mwarmǝn,mǝnni beri tǝn ku ka sǝr we.' ²³ Kǝ nigra hi a sotǝna bwirahi go, 'Yigi na tu a murte murte tǝn jute na wu we furniya nǝbbi na digiro we, na kaita rǝ nyagu. ²⁴ Mǝn sugǝmǝn,me guni wǝ a mura nǝbbǝ mwam bǝ buwowu rǝ jiguwum ba dǝmǝna nya lǝmmang a mura nate miyu.''' ²⁵ A nyangngǝn kulǝn da nǝbbǝn ka yigi yom tǝn hangu, ka fulga bwi a jǝgga hanjimǝng ka sotǝn go, ²⁶ "Wuni ni wu farǝ ba be gwa miyu mǝnni na kobǝ tengu, na nengu, rǝ nyiyangu, rǝ bǝtǝm bagǝm, tǝn chittǝtangu nǝbbə barəm rǝ nyim, O bo rǝ yuum ba gǝmmi,me ba dǝmǝn a yullo mǝssari a miyu. ²⁷ Wunǝ bo wa dǝmǝn ba dǝb rǝyang yuwarang kangǝn a fungngiye ki, me ba dǝmǝn a chi bwe mǝssari miyu. ²⁸ Nǝn wunǝ wai wa mura jǝnu wu farǝ gǝ mu kaita jiyu ki me ba chi a jǝga chǝmmǝr də ba mukta jiya swiyerǝn? ²⁹ Kari ba yulo a fulla wa su titangnga swiyǝr dan gǝnni ki a buna nyǝngkǝ ba mwarmǝn gǝrǝng, ki ba chuwum ba nura deni, ³⁰ suwerǝ go, 'Ni waiwe ka su mutang mǝnni a dǝmǝn ba mwarmǝn.' ³¹ Nyang bo wunǝ nidu wu farǝ yigitanga kunni tǝn gu niduwi ki me ba chiya jǝga rǝ jigu na suga ki ni wurǝ kwelǝm neeti kwauwi ba dǝmǝn a bwiga tǝn chugo nidu wuri kwelǝm neeti furtǝsuwi ga? ³² Mǝnni me ba dǝmǝn ki, a jii bam nǝbbǝ barǝ kǝrangǝm ka pre, ki ka tǝm ni tǝmri wu ba nǝngnga gulǝrda chǝmbǝ lǝmmǝngǝm. ³³ Nǝn nyang bo, meri ni a mura jǝnu wa dǝmǝm ba du jǝniya kanniyu wangu kǝ me ba dǝmǝn yulo ni məssari miyu.