¹ Yahuza, bwira Yesʊ Kristiyʊ, bo chiyan Yakʊbʊwi, yɨgira nəbbə buwowʊm, ba yodai a mʊra Niyajiyʊ Tei, bən samənsauwiyəm bəra nən Yesʊ Kristiyəm: ² Masi bʊmte na chimbə ləmmangəm na yodai a yəgtən bwi a gwa jɨniyʊ. ³ Nəbba yodaiyəm, kəmən bʊktə bwi rə kwani mən mʊlla gəməne a jiya jəgtang ka nənnəng warigʊ, a chi kwak n'mwe gəmən su nyagʊ a jiya yʊtang a yəmbə nyam bən ne nəbbə fʊngrəm kali kin me yəgtangwʊng. ⁴ Bagi nəb ka dɨgiye a bəmənbʊwi bwi. Bam nəbbe kən mʊlla dutətan jiyʊ rə langtang. Nəbbə merə tata Niyajiyʊwʊm, bə wʊlga nəttəta Niyajiyʊwi a yullo taltem, na bo jau buriya bəksər na Nigra nənnʊ Yesʊ Kristiyʊ. ⁵ Mən fau mən kəmmagəmmən- mənni kəttə si kak tə yəm jihi-gʊn sʊwe mo Niyajiyʊ ka jəgge bagi nəb a təm ba Masaram, mənni bo a buk kən juwo ba ne bə yəmbə nyamməm. ⁶ Bo, weni təmri ya si ba gʊ siriyan jiyʊwi, mənni bo ka dʊ gʊ chiriya jiyʊ a dɨlli-Niyajiyʊ ka bʊwa hanjim a chəntə kʊrəkwangngi, a mʊra kum, bera ko kʊnta wa duuti. ⁷ Ka nyəra Sadʊma na Gwamrata, na bo bətətta kawʊrre hanjiməm, ba nee duttətan jiyʊ taltəm, fʊng jəllən da bwiyən də me wa yobi nyaiyəm. Kən ti hanjim a chi bɨngorang rə bə no kərangkə mebə jiirəng. ⁸ Nən nyang bo, rəbə dʊggare ki ləbtə bwitan jiyʊwʊm. Naki mamən sʊ a nəbba tau təmməm, bo sʊrə bwantətta bwirai a dʊrra weni təmriyəm. ⁹ Kənən Mika'ilʊ wegən we təmri wʊ grai, a fʊlla wʊgare na yəgga yəmni tən nidʊwa gʊsəti a jiya libotan Mʊsai, a lebə jʊwi a be rə dagi bwamər da duutən a giya dʊr. A nyangngi ka sʊwe go, ''Masi Niyajiyʊ a mwen!'' ¹⁰ Mənni bam nəb bambe bə be nən bwantəttə bwirai a jʊtə hanjima yəmbi. Tən jiya yəmmi-bam nəbbe bərə yobiya namta sei merə kəmmarangngi, wʊtənne kʊnang a dutəttan jiyʊ. ¹¹ Jiya kʊnangngi nən ji! Bəraki hanjimma fʊng jʊwiyang Kayinʊwi, bo ka dɨgiya mʊra lerang ka Bal'amʊwʊng bəri nyatang ka gʊjiyən, ka kiya mʊra gugtang ka dʊrəng ka Korang. ¹² Bambə wetətta hiyʊ a bəmənbʊwi a mʊra bwiləmri ya yodai jɨnʊwi. Hanjim nəngnga bwiləmri me bujɨriwe, jarə dang nən ji. Hanjim kortətə me hi wi, tə səmba ka’ani. Hanjim rite rə ka’̄ani mebə tʊri-a bətəro-bətəro kali təsʊ, n'buto buto rə nəttan jiyʊ. ¹³ Hanjim kʊrmotətta hiyʊ rə jɨni talni, gwigora ji, nəngnga gaan, jəg fuggəlte ta bujɨri tan jiyʊwi. Hanjim betə yəntəri yogori, yən ti ten kum yuumllu kʊrəkwangəngi. ¹⁴ Ahnʊhʊ, ni wʊn nyibiyʊ sʊwe ra Adamʊwi, ka sʊ yəm yʊwerəm a jiya hanjimmi go, ''Chu! Nigra ka bere tən nəbbə yʊlgoim ba gəm neete- neete. ¹⁵ Hangʊ ka bere ba mwe duuta jiya nəb warigʊ. Na bo nə wʊngrang warigʊ ba yəmbə Niyajiyʊwʊm a mʊra jɨni bwirai ya nəngnngai a me jʊwiya Niyajiyʊwi yəmbʊwi, na bo bwantəttə kwewi warigʊ tə nəbbə rə jɨni bwiraiyəm a yəmbə Niyajiyʊ a sʊwa dʊra giyəm.'' ¹⁶ Bambə kʊgla yəmniyəm, na sʊrə yəmni rə kʊnniyəm, bə fʊng faurang kə bwirang ka jiyəng. Gug dʊr, miksare, wer bagi bərə nyatang ka jiyəng. ¹⁷ Mənni bo, n'jɨn, nəbba yodaiyəm, tə kəmma bwantətta nəb təmrəm ba Nigra Yesʊ Kristiya nənnʊ a sʊwe rə langtangngi. ¹⁸ A sʊgəmən go, ''A mʊra kota mwatənti, bən nya bərə nʊrəm bə ba fʊng faurang ka jiyəng ka bʊnai ya yəmtangnga Niyajiyʊwʊng.'' ¹⁹ Bam nəb bəbe nən wʊlgatang. Hanjim ba gʊsətəm, mənni merə We. ²⁰ Mənni bo, n'jɨn nəbba yodaiyəm, tə mʊ dutətta jɨnʊ a mʊra yʊtang ka yəmbə nyaməm ba li warigʊwʊng, bo tə rʊwa nyini a mʊra We Yʊlgoi. ²¹ Tə tau duttəta jɨnnʊ a mʊra yodai a Niyajiyʊwi, tə yamərə nwitang ka bʊmta Nigra nənnʊ Yesʊ Kristi wa be rə yuumum bə kʊrəkwangəmi. ²² Tə nwi bʊmta nəbbə nəngnga jʊgərəmi. ²³ Tə jəg bagi a gwa səməntang a kərangngi. A bagi tə nwi bʊmta jiyʊ rə tate. Tə kwilatang ki nannʊ duttəttan jiyʊ tə bwi a lʊgtə ki. ²⁴ Kʊ yɨgira gwa wʊri kʊmni tə ba dangən rə nəngngatang a ji bwirai, na bo dəggən tə si a kakka gən a gwa l̄i grati, me rə ji kəbari, na bo bwiləmri mwami, 24 Kʊ yɨgira gwa wʊri kʊmni tə ba dangən rə nəngngatang a ji bwirai, na bo dəggən tə si a kakka gən a gwa l̄i grati, me rə ji kəbari, na bo bwiləmri mwami, ²⁵ yɨgira gwa Niyajiyʊwi gən kwanni, Ni jəgri ya nənnʊ a gwa Yesʊ Kristiyʊ, Nigra nənnʊ, grate, dʊʊte, na kʊmni, ki məna chi fʊlla warigʊ, kʊ, na tən kʊrəkwang. Amin.