¹ Yakʊbʊ, bwira Niyajiyʊwi na Ni jəgriyʊ Yesʊ Kristi, yɨgira nyabi tə kwʊ a jɨr təsʊ bə ka mʊrte dəndangngəm: Sʊrte. ² A yullo bəmən jiya bwiləmriyʊ, chətətamiyʊ, a jiwʊ mən no kʊnang dəndangngi. ³ Yəm mo mən bɨngo kumnita mʊ a nəbbəntang ka yəmbə nyamməm wʊ berə rə tautangnga fʊriyʊ. ⁴ Masi tautangnga fʊri a ri swiyer da gən, na ba tə gra tə ri bwi, kari bətə bʊna gʊji. ⁵ Kə ka rə gʊ wa jɨnʊ wʊ farə bərsən ki a chəlla a gwa Niyajiyʊwi, wʊ nəbbən na nətti me a bwiramən a wʊnə wʊ chəlla ka nere. ⁶ Mənni, Masi hangʊ a chəlla rə nəbbəntang ka yəmbə nyamməng, kari ba nəngnga jʊgər da gʊjiyən. Nən wʊnə ni wa nəngnga jʊgəri ka chi nyəra rə gərmatəta a wimangngi tə səmba wʊlga rə nyəng ka chʊrə sərəng. ⁷ Wai nihi kari ba nəngnga kəmmarang da ba nya gʊji a gwa Nigrai. ⁸ Wai nihi wʊrə furni təsʊwi, a kabə bʊr a jɨni warigʊ kwong yə nəngngari. ⁹ Masi chiyamiyʊ wʊ merə gʊjiyʊ a wer dʊr rə grate tə grai tə ka gəri, ¹⁰ Mənni ni rə jɨna kanniyʊ wʊ gratətang gʊ a yarmənni bəraki ba sʊ nyəra rə filən da yirən a səi. ¹¹ Ko jɨre ki, kwewiyangngʊ ka dəg rə yir a kʊse. Ki filən ka tʊggamən bwi, nyiyar dagən ka kiya. Nəng nyang bo, rə nii wʊ rə jɨniya kanniyʊ, ba kʊse jʊwi a jʊgər da yommən. ¹² Wʊ dəgtən kangngi gən ni wa mida rə bɨngʊrangngi. A bukka yammən na bɨngʊrangəng, ba yʊ gʊrmong ka yuumumməng, kə nəngnga tən bʊtang ka yəmməng a ba yotən daa Niyajiyʊwʊm. ¹³ Kari gʊ ba sʊwe go a jiwʊ gə dɨgiya bɨngorangngi ''Niyajiyʊ ga dəggən a bɨngorang, ''Bəraki Niyajiyʊ me bə bɨngo bəne rə ji bwira, bo hangʊ rə bwigo me bə bɨngo gʊ. ¹⁴ Mənni wʊnə ni bə yar a bɨngorang bəra ri jəllən da bwiyən, wa wʊ na bʊwa hangʊwi. ¹⁵ A bukkə jəllən a dəb fʊriyəng, ka bʊ ji bwira, a bʊkkə ji bwira a gərang, ki ka bʊ bwiyate. ¹⁶ Kari bən jʊllagən chətttəta miyʊ ta daai. ¹⁷ Kənə nəbbəntang ka nyan rə kəni nəbbəntang ka ri-riyəng bə fiye wa ji. Bə diye a gwa teh kwetərai. A gwa-giyʊ me wʊlgatang we me kɨngləng we bərarə wʊlgatang. ¹⁸ Niyajiyʊ a sabbəmən go na gə nəbbən buwong a gwa bwanda yəmbə nyammən, na ba nən yəllo buwong kə rə jigʊwʊng a mʊra jɨni hangʊ a nəngnga warigʊwi. ¹⁹ Kə tə yəm yai jɨniye chəttəta miyʊ ta daai: Masi wʊnə ni a kaa daa a nwitang, na kari ba kaa daa a sʊtang, na bo kari ba kaa daa a nəngngatang a jwagər. ²⁰ Mo jwagər da niyən me bə təm swiyer də nyan da Niyajiyʊwʊn. ²¹ Bərarə nyang kwisəre jɨni sərimmi warigʊ na dʊwe jɨni bwirai. A mʊra səgtəngnga a dʊr yuumu yəmbə wauwʊm wʊ ba yiya yuumum ba jɨnəməm. ²² Tə yullo nəbbə təm yəmməm, me bə nwirəm bwigi tə jʊlla bwitan jɨnʊ. ²³ Mənni a yullo ni ba nwi yəm həmmi bo me ba təm ki, ba yullo nyəra rə ni wa jəgga kak ka gəng a nyʊ wʊ jəgga wʊllo kagi gəri. ²⁴ A jəgga kak ka gəng ka di a gwa chu rə sərri rə kwa-rəkwang ka tammən nyəngkə ka gərəng. ²⁵ Mənni nii wa nəngnga jəgatang kə nyangngi a sori wa rii-rii bwiyʊ wa gəriyʊ na jaukag təmri, a chi bə wʊ nwi ri rə bwigo na tamməni wai ni bən dəgtang a kang a jɨni ya təmmiyʊ. ²⁶ Ki ka gʊ nii wʊ kəmmarə da kəgə rii fʊngtang deniyʊ ki, na mənni a dəmmən bə nyəngkə ba tau langngər da gən nəng, ka jʊlla rəngsa gʊ, bo fʊngtang ka gəng kə rə kʊnnəng. ²⁷ Fʊngtang kə nyang kə me ji bwirawʊng a kak ka Niyajiyʊ na Te nənʊwʊng a chi tʊga bətəm bʊnəm na yʊgiyonəm a jiwʊ ba hanjim a dəgi a kʊnangngi, na ki a tau dʊr da gən a mʊra gʊsəte me jiya kəbarri we.