¹ A gwan ta grai yɨgira Gayuums wʊn yotən da rə yəmbə nyammi. ² Wʊn yotən dai kə mən rʊwa nyini bərə nən mwe na ba nya dəgtang a kang a mʊra wʊni ji warigʊ, na bo rə bwiləmməngi nyəra kə we mʊ kagərə ləmmangəng. ³ Kən nəngnga fur da kwauwʊn deni bəraki bagi chətte ka be a sʊyəm a dʊra nəbbəntang a yəmbə nyam ba mʊm, n'kə mən fʊng yəmbə nyam gərəng. ⁴ Me rə ji a li nitangngnga a fur də kwauwʊni, nwi mo bətəm ba miyəm ka yo ləmmang a mʊra yəmbə nyam. ⁵ Wʊn yotən daai, kən nəngnga swiyer rə yəmtang kə nyang yɨgira gwa chətti na rə fʊbe, ⁶ ba nəbbən bʊtang ka buggəng a yodai ya mʊ a kak ka Ekkilisiyang. Ba nəngnga nyagʊ nəngngatən tʊgarang rə chimbə ləmmangəm bə nyam, a jʊwi a dautən wa Ekkilisiyai. ⁷ Bəraki bərarə dʊn dan de n'gədə hanjim a jɨregərəng a yəbə-gʊji a kang ka nəbbə wautən yəmməm. ⁸ Bərarə nyang ka dautən we nən yʊ nəb nyəra bambe, na nən chi chəttəta swiyeri nən hanjim a jiya yəmbə nyam. ⁹ Kən mʊla wang yɨgira gwa Ekkilisiyai, mənni Diyotariffisi, wa li fautangnga grati a mʊra jiyʊwi, a yəbbbən be. ¹⁰ Bərarə nyang, ya ki bən kəmmatən switətta nəngngai, na nyəra kə lʊktə bəmən dʊn gəra kak ka nəbbəng rə bwantətə bwirai. Jɨni yaiye a nəngngatən ba hangʊwi, a chi wʊ kwila yʊtangnga chətti. Mənni bo ka dang bə farəm gʊ tə nəngnga nyangngəm, ka yʊllo jiwa ka nəb gəra mʊra kanda rʊwanyiniyən. ¹¹ Wʊn yotan yodai, kari bən məssa swiyer də bwiran mənni swiyər də nyan. Wʊ nəngnga ji nyai warigʊwi wa Niyajiyʊwi, wʊ nəngnga jɨni bwiraiyʊ a yəmbə Niyajiyʊ. ¹² Dimitiriyasi karə bʊtangnga buk kə nyang a gwa nəb mwami na rə yəmbə nyam rə bwigo. Nən rə kəniyəng kənən buttən buk, kətə yəm to ji nən sʊra hangʊwi nən nyang. ¹³ Mən ka məne jɨni mwam ya dautən mʊlanənni mənni fabə mo mʊla nən rə fʊbən tən karma. ¹⁴ Mən ka mən ti fʊri mo bənən chiga me rə langtang, na bənən sʊga yəm kəmte rə kəmte. ¹⁵ Masi chim bə ləmmangngəm a chi nən mwe. Kagəm ba nənnəm kə nəngnga sʊrang, labə mən rə sʊrang ka nənnəng yɨgira gwa kagəm ba nənnəm rə dʊntətta jiwʊ.