¹ A gwan Ta grai yɨgira gwa nyʊi wʊn samən-sauwiyʊ tən bətəm ba giyəm, bən yotən da a mʊra yəm bə nyaməm, me məmən kwan, mənni bo warigʊ, na ba yəm yəmbə nyaməm. ² Bərarə yəmbə nyam bə ka mʊra nəniyəm a chi nənnən yɨgira mwatənte. ³ Masi nəttə tən dautən bʊwi, rə bʊmtəta Niyajiyʊwi, rə datangnga fʊri a chi nən nən a gwa Niyajiyʊ wʊ Tei na Yesʊ Krisiti, Yəlla Tei a mʊra yəmbə nyam tən yodai. ⁴ Kən nəngnga fur də kwauwʊn n'deni, bəraki kən nya bagi bətəm ba mʊm yoyom a mʊra yəmbə nyaməm, nyəra kənnən yʊ sori gərəng a gwa Teiyəng. ⁵ Mən ka mən chəllane, nyʊi- me mo mən nən sori fi, mənni bo gən wʊnən nya a jii wʊreri, mo nən yogodata bwite. ⁶ Waiwe gən yodai, mo tənən yoyom a jiya soriyang gʊ. Waiwe gən sori hi, nyəra kə tə nwi gərə rə jigʊwʊng, mo tə yo giya mʊri. ⁷ Nəb mwam bə jʊlla nəbbəm ka jɨre wa gʊsəte, ba ngabə go Yesʊ ka be a mʊra bwiyəm. Waiwe gən ni jʊlla nəbbi, ni ya kakgiyang Kristiyʊ. ⁸ Tə jəga dutəttan jɨnnʊ, kari bə tə bʊnna jɨni warigʊ tənən nəngnga swiyer a jiyʊ, na bə tə yʊ jangemmi a jɨnnʊ a rii rii. ⁹ Mənni warigʊ wa lʊgən na me wa mʊra məssarang ka Krisitiyəngngi merə Niyajiyʊ. Mənni wa chiya mʊra məssarangngi, karə Te tən Yəlli warigʊ. ¹⁰ Wʊnə wa ben jɨniyʊ, na merə məssarang kang ki, kari bətə yʊ a mʊra kainan jɨnnʊ, kari bətə nəngnga tən sʊrang. ¹¹ Wʊnə wa nəngngatən sʊrangngi ka dəg kang a mʊra swiyer də bwiran da gən. ¹² Mən kamənə jɨni mwam bən mʊla nənni, mənni bo memən farə mo mən mʊla rə fʊbən tən wang. A nyangngi bo mən ti fʊri mo bən ya gwa mwiyʊ, nan sʊnnən yəm kag rə kag, nan ba fur də kwauwʊn da nənnən a ri bwi. ¹³ Bətəmba wʊ chʊwiya mʊwʊm samənsawiyəm kə nəngnga nən sʊrang.