¹ Pada waktuk nganahtai, sampailah beritak tantang Yesus tai kedangaian Herodes, rajak wilayah. ² Dan, nyiak becakap ke barai ulun-ulunnyak, "Nganim Yohanes Pembabtis tai. Nyiak udah bangkit darik antarak urang matik dan keranak nganahlah semuak mukjizat nganih bekerajak di dalam-Nyak." ³ Sabab, Herodes udah menangkap Yohanes, mengabatnyak, dan memasukanyak ke penjarak keranak behubungan aman Herodias, binik Filipus, dulur Herodes. ⁴ Keranak Yohanes suah becakap ke nyiak, "Puang bulihak kalai meandak,ik Herodias." ⁵ Sebenarnyak Herodias andak membunuh Yohanes, tapik nyiak galaknyak keranak sadih menganggap Yohanes sebagai nabik. ⁶ Tapik, waktuk arik ulang taun Herodes datang, anak betinak Herodias menarik di adapan sadih, makaknyak membulah Herodes sukak, ⁷ sehinggak nyiak besumpah bakal mendumankan ngapakbai yang dipintak betinak darak nganah tai. ⁸ Makak, sekalik diasut umaknyak, biak darak tai becakap, "Dumankan ke akuk di nganim kepalak Yohanes Pembabtis di pucuk paran." ⁹ Biarbai atik rajak sadih, tapik keranak nyiak udah besumpah dan keranak barai urang yang makan sesamak aman nyiak, nyiakbai menyiuh agin hal nganah di dumankan. ¹⁰ Nyiak menyiuh agin menungkung kepalak Yohanes di penjarak. ¹¹ Laluk kepalak Yohanes diangkut di pucuk paran, didumankan ke betinak daraktim dan nyiak bai meangkutnyak ke umaknyak. ¹² Sekalik udahan, barai murid Yohanes datang, muntik bukangnyak, dan menguburkanyak. Laluk, bejalanlah sadih membarik tauk Yesus. ¹³ Sekalik Yesus mendangai hal nganih, nyiakbai menjauh bangkit di isan, menaik,ik perauknyak ke tampat yang sunyik sensuranganmah. Dan, waktuk barai urang mendangai hal nganih, sadihbai membasingik-Nyiak bejalan batis bangkit di kuta-kuta melaluik jalan darat. ¹⁴ Sekalik Yesus naik ke darat, Nyiak menampai gerumbulan urang paling banyak, makak atiknyak bai kasih menampai sadih, dan nyiak menyambuhkan sadih yang bajik. ¹⁵ Waktuk arik andak malamam, barai murid datang ke Yesus dan becakap, "Tampat nganih nih sunyik dan arik udah mulai malamam. Siuhdam gerumbulan urang banyaknah pulang ke kampung-kampung agin membalik pemakan untuk sadih surang." ¹⁶ Tapibai, Yesus becakap ke sadih, "Sadih puang peraluk pulangak. Kandih, dumanilah sadih pemakan." ¹⁷ Sadih becakap ke-Nyiak, "Di isinih puang bisik ngapak-ngapak,ak, angkah bisik 5 ruti aman 2 ikur ikanam." ¹⁸ Dan, Nyiak becakap, "Angkut,am ke nganih, ke-Akuk." ¹⁹ Udahan, Nyiak menyiuh sadih banyaktai duduk di rumput, dan Nyiak muntik 5 ruti aman 2 ikur ikantim, laluk sambil menengadah ke langit, Nyiak mengucap syukur dan memacak-macakan ruti tim. Sekalik udahan, Nyiak mendumankanyak ke barai muridnyak, dan di bagik-bagikan murid-murid-Nyak ke urang banyak tim. ²⁰ Dan sadih semuak makan sampai kanyang. Udahan sadih mengumpulkan sisak-sisak pemakantim, besisak duak blas cupak panuh. ²¹ Dan sadih yang makantai kirak-kirak 5.000 lelakik, balum temasuk betinak aman bebiak ak. ²² Udah nganahtai Yesus menyiuh barai murid-Nyak naik ke perauk menyiuh sadih duluk ke sebarang, sementarak nganahtai Nyiak menyiuh urang banyaktai pulang. ²³ Dan, sekalik udah Yesus menyiuh urang banyaktai pulang , Nyiak naik ke pucuk bukit sensuranganmah dan bedua. Sekalik andak malamam, Nyiak sensuranganmah di isun. ²⁴ Tapibai, perauk yang dinaikik barai murid tai udah jauham bangkit di darat, diumbang ambingkan gelumbang keranak belelawanan aman angin. ²⁵ Dan, kirak-kirak jam tigak malam, Yesus bai datangam ke sadih, bejalan di pucuk arai. ²⁶ Waktuk barai murid menampai-Nyak bejalan di pucuk arai, sadih kegenggalakan laluk becakap, "Nganah antuk!" Makak, sadihbai bekaung bejaritan kegenggalakan. ²⁷ Tapibai, Yesus lansung becakap ke sadih, kata-Nyak, "Kuatkanbah atik kandih! Nganih nih Akuk, jangan galak,am." ²⁸ Dan, Petrus becakap ke-Nyiak, "Tuhan, aman nganah Kalai, siuhan akuk bejalan mendatangik Kalai bejalan di pucuk arai. ²⁹ Yesus becakap, " Datangam!" Makak, Petrus bai turun bangkit di perauk, dan bejalan di pucuk arai, laluk mendatangik Yesus. ³⁰ Tapik, sekalik menampai agin, nyiak kegenggalakan laluk mulai tenggalam. Nyiak bekaungan, "Tuhan, selamatkan akuk!" ³¹ Yesus bai lansung meulurkan tangan-Nyak, menangkap Petrus, dan becakap, "Kandih yang puang pecayak ngapak kandih ragu-raguk?" ³² Waktuk sadih mansuk ke dalam perauk, angin bai begantik,am. ³³ Udahan, sadih yang di dalam perauktai menyambah Yesus dan becakap, "Sesungguhnyak, Kalai adalah Anak Allah!" ³⁴ Sekalik udah menyebarang, sadih datang di tanah Genesaret. ³⁵ Waktuk barai urang di tampat nganah menganali-Nyak, sadih memadahkannyak ke seluruh dairah nganam dan meangkut semuak urang yang bisik pembajik ke Yesus. ³⁶ Sadih memuhun ke Yesus agin bulih mencamah ujung bajuk-Nyak, dan semuak urang yang mencamah-Nyak lansung mansih.