1 Pada waktuk nganahtai, Yesus bejalan melaluik lakau gandum pada arik Mingguk, dan barai murid-Nyak kelaparan, dan sadih mulai muntik bigik-bigik gandum, laluk memakannyak. 2 Tapibai, waktuk barai urang Farisi menampainyak, sadih becakap ke Yesus, "Tampaiam, murid-murid Kalai melakukkan yang puang bujurak di arik Mingguk nah." 3 Tapik, Yesus becakap ke sadih, "Puang suahai kandih membacak ngapak yang dilakukkan Daud waktuk nyiak aman para pengikutnyak kelaparan, 4 macam ngapak nyiak mansuk ke Rumah Allah dan makan ruti persembahan yang puang bulihak untuk nyiak memakannyak, samak,am aman urang-urang yang bensamaan aman nyiak, kecualik angkah untuk para imam? 5 Atau, balum suahai kandih membacak dalam Ukum Taurat, bahwak pada arik Mingguk, para imam di Bait Allah melanggar arik Mingguk dan sadih puang besalahak? 6 Tapibai, Akuk mengatakkan ke kandih bahwak yang labih basar daripada Bait Allah bisik di isin. 7 Tapik, aman kandih udah mengetauik ratiknyak nganih: 'Akuk andak aman rasak kasih bukannyak persambahanak', kandih puang bakal meukum urang yang puang besalahak. 8 Sabab, Anak Mensiak adalah Tuhan darik arik Mingguk." 9 Sekalik udah bejalan bangkit di isun, Yesus datang di rumah ibadah sadih. 10 Tampaibah, bisik surang lelakik yang tangannyak lumpuh sebalah. Dan, sadih betanyak ke Yesus, katak sadih, "Bulihai meubatik urang pada arik Mingguk? agin sadih ulih menyalahkan Yesus. 11 Dan, nyiak becakap ke sadih, "Siapak di antarak kandih yang bisik sikur dumba, dan aman dumba nah labuh ke dalam lubang pada arik Mingguk, dak,ai nyiak bakal mengeluarkannyak? 12 Betapak labih benilainyak mensiak daripada seikur dumba! Makaknyak, dibulihkan berbuat baik pada arik Mingguk." 13 Udahan, Yesus becakap ke urang nganah tim, "Ulurkanam tangan kalainah." Urang nganahbai meulurkan tangannyak dan mansiham macam tangannyak yang sebalahnam. 14 Tapibai, barai urang Farisi meninggalkan sadih bangkit di isan dan besekungkul melawan Nyiak, macam ngapak sadih ulih membinasakkan-nyak. 15 Tapik, Yesus, waktuk mengetauik masalah nganih, menjauh bangkit di isan. Banyak yang membasing-Nyak dan Nyiak menyambuhkan semuak sadih, 16 dan memadahik sadih agin puang membulah dirik-nyak di ketauik. 17 Masalah nganih tejadik untuk melangkapik ngapak yang di padahkan melaluik Nabik Yesaya: 18 "Tampaibah, ulun-Kuk yang udah kupilih, yang kukasihik, yang kepada-Nyiak jiwak-Kuk bekanan. Akuk bakal menaruh Ruh-Kuk ke pucuk-Nyak, dan Nyiak bakal menyatakkan keadilan ke bangsak-bangsak lain. 19 Nyiak puang membantahak, atau beciakanak, dan cebisik,ak surangbai yang bakal mendangai suarak-Nyak di jalan-jalan. 20 Buluh yang patah puang bakal di putuskan-Nyiak,ak, dan sumbuk yang ampir matik bai puang bakal nyiak matikanak, sampai nyiak membulah keadilan manang, 21 dan dalam namak-Nyiak, bangsak-bangsak lain bakal bearap." 22 Sekalik udahan seurang yang kerasukan sitan,yang butak, yang bisuk, diangkut ke Yesus. Dan, Yesus menyambuhkannyak sehinggak urang butak aman bisuk nganahtai becakap dan menampai am. 23 Semuak urang menjadik hiran dan betanyak, " Mungkinai Nyiak nih anak Daud?" 24 Tapibai, waktuk barai urang Farisi mendangainyak sadih becakap, "Urang nganih nih puang mungkinak meusir sitan aman puang dangan Kepalak sitan, pemimpin sitan." 25 Yesus mengetauik pikiran sadih dan becakap ke sadih, "Setiap kerajaan yang tepacak-pacak pastik binasak. Dan, setiap kuta atau rumah yang tepacak-pacak puang bakal betahanak. 26 Dan, aman Iblis meusir Iblis, nyiak tepacak-pacak melawan diriknyak surang. Aman macam nganah, macam ngapak kerajaannyak bakal betahan? 27 Dan, aman Akuk, meusir sitan dangan Kepalak sitan, dangan kuasak siapak barai pengikut kandih meusir sadih? Keranak nganah, sadih bakal menjadik akim kandih. 28 Tapibai, aman dangan Ruh Allah, Akuk meusir sitan, Kerajaan Allah udah datang ke kandih. 29 Atau, macam ngapak seseurang ulih mansuk ke rumah urang yang kuat dan merampas hartak bandaknyak aman nyiak puang mengabat urang yang kuat nganah labih duluk? Udahan, nyiak baruk ulih merampuk rumah nganah. 30 Siapak jum yang puang bensamaan dangan Akuk, melawan Akuk. Dan, siapak jum yang puang mengumpulkan bensamaan dangan Akuk, nyiak mencarai-baraikan. 31 Keranak nganah, Akuk mengatakkan ke kandih bahwak setiap dusa aman sumpah seranah mensiak bakal diampunik. 32 Dan, siapakbai yang mengatakkan jejaluk yang melawan Anak Mensiak bakal diampunik, tapik siapakbai yang becakap melawan Ruh Kudus puang bakal diampuniak, baik waktuk nganih ataubai masak yang bakal datang." 33 "Aman kayuk nganah jangak, buahnyak bai bakal jangak. Atau, aman kayuk nganah puang jangak, buahnyak bai puang bakal jangak,ak. Sabab, kayuk yang dikanal bangkit dibuahnyak. 34 Ui, keturunan ular beludak, puang mungkinak kandih yang jat mengucapkan hal-hal yang jangak? Keranak bangkit di dalam atik, mulut becakap. 35 Urang yang baik mengeluarkan hal-hal yang baik bangkit kekayaannyak yang baik, dan urang yang jat mengeluarkan hal-hal yang jat bangkit kekayaannyak yang jat. 36 Tapik, Akuk mengatakkan ke kandih bahwak setiap katak yang siak-siak, yang dicakapkan urang , sadih bakal mempertanggung jawabkannyak pada arik pengakiman. 37 Keranak perkataan kandih, kandih bakal dibujurkan, dan keranak perkataan kandih, kandih bakal diukum. 38 Udahan, beberapak ahli Taurat aman urang Farisi becakap ke Yesus, "Guruk, kaik andak menampai tandak darik Kalai." 39 Tapik, Yesus menjawab dan becakap ke sadih, "Keturunan yang jat dan bezinah nganih menuntut suatuk tandak. Dan, tidak bakal bisik tandak yang bakal didumankan ke sadih, kecualik tandak Nabik Yunus. 40 Sabab, macam Yunus yang bisik dalam parut ikan basar selambat tigak arik tigak malam, macam nganahjum Anak Mensiak bakal bisik di dalam parut bumik selambat tigak arik tigak malam. 41 Barai urang Niniwe bakal betelanjung besensamaan dangan keturunan nganim pada arik pengakiman dan bakal meukumnyak sabab sadih betubat sekalik udah mendangai kutbah Yunus Dan, tampaiam, yang labih basar bangkit di Yunus bisik di isin. 42 Pada waktuk arik pengakiman, Ratuk bangkit di selatan bakal bangkit bensamaan aman keturunan nganim dan nyiak bakal meukumnyak keranak nyiak datang bangkit di ujung bumik untuk mendangaikan kebijaksanak,an Salomo. Dan, sesungguhnyak yang labih basar daripada Salomo bisik di isin. 43 "Waktuk sitan keluar bangkit di mensiak, nyiak melaluik tampat-tampat yang karing untuk meuyang tampat begantik, tapik nyiak puang betamuk tampat karingak. 44 Laluk, nyiak becakap, 'Akuk andak pulang ke rumahkuk yang udah kutinggalkan. 'Dan, waktuk datang, nyiak menampai rumahtai kusung , udah disapuk dan teratur. 45 Sekalik udahan, sitan nganah tai bejalan dan meangkut tujuh sitan yang lain yang labih jat darik nyiak bensamaan aman nyiak, dan sadih mansuk dan tinggal di isan. Akhirnyak, keadaan urang nganah menjadik labih buruk lagik daripada sebalumnyak. Macam nganah jum yang bakal tejadik dangan keturunan yang jat nih." 46 Sementarak Yesus agik becakap dangan urang banyak, tampai, umak aman barai pedulurannyak betelanjung di luar, berusahak andak becakap dangan-Nyak. 47 Bisik surang becakap ke-Nyiak, "Tampaibah, umak aman barai peduluran Kalai betelanjung di luar, berusahak andak becakap aman Kalai." 48 Tapik, Yesus menjawab urang yang membariktauk-Nyak dan becakap, "Siapakkah umak-Kuk dan siapakkah barai peduluran- Kuk?" 49 Dan, sambil menganjangkan tangannyak ke arah barai murid-Nyak, Yesus becakap, "Nganim umak-Kuk aman barai peduluran-Kuk! 50 Sabab siapakbai yang melakukkan keandak Bapa-Kuk yang bisik di serugak, nyiaklah dulur lelakik-Kuk, dulur betinak-Kuk, dan umak-Kuk."