¹ Nǝ durghǝ gi naan nǝ mǝn kuuɓkǝn tǝ Cogn, ɗaŋ mǝri wos naa suughǝnni. ² Riinǝn a suughǝn, ɗaŋ gi ɗaŋ nǝ Ɓorghǝnni suumi hal a vǝr gamas nǝ dur wopm ɓuruk, ngǝtnngǝ zhoŋngǝn dlǝrǝŋ dlǝrǝŋ a ken Cogn. ³ Tǝ kon mbǝllǝ tǝ ko naa ngǝtn nyaŋnyi gyo abdlei wan hŋ, duryo tu a ndara cik tǝ mǝǝn laaɓkǝn. ⁴ Tǝ wum vik nyaŋ ko vik ɗǝghǝr ko vik lyak ɗǝghǝr gya gyo ɗaŋ ɓuruk tǝ ndara hŋ a dlei wan hŋ, a bamvi gi mǝ naan nǝ mǝn nyarghǝn. ⁵ Duryo tu kaa yisǝŋǝi shaŋtaŋ tu, mǝn mbǝllǝ tǝ mǝni yo ɗaŋ ɓitalghǝn wasǝŋ yi kushi kushi, tǝ mǝn swaari tǝ mǝn mbuughǝn waar ɗaŋ tǝǝ yir duul a guŋndu ghǝ gi ɗaŋ nǝ Ɓorghǝnni tǝ Cogn hŋ. ⁶ Gon tǝ morki tǝ vik ɓenndǝmi hŋ, duryo tu nǝ durghǝ ngǝrshi gya ginngǝn loŋsǝ Cogn caa shighǝnɗi a gam mǝni yo ɗaŋ caa wum vi hŋ. ⁷ Nǝ gi aa kaŋ gam cimshi hŋ. ⁸ Nǝ duryo tu ka tayi a lǝǝɓ jii, beɗ tǝ gi ɗaŋngǝnin ki nǝ lǝǝɓ yaali a giɓi gi nǝ Ɓorghǝnni. She a riinǝn ɗaŋ mǝri lǝǝɓ yalli. ⁹ (Duryo tu ɓekmi ghǝ lǝǝɓ yaali nǝ mbuuni, ɓuruk tǝ ngǝtnngǝ zaari tǝ jom jomni) ¹⁰ Aa ŋal ngǝtn yo ɗaŋ wo pol Cogn ghai. ¹¹ Aa caa taas a laa ghǝ ɓenndǝmi tǝ laaghǝ lǝǝɓ jii hŋ, beɗ tǝ gi ɓǝllǝn shi wasǝŋǝi. ¹² Nǝ duryo tu nǝ ngǝtn dzuun tǝ kon ngǝtnyo ɗaŋ caa fi a lǝǝɓ jii. ¹³ Duryo tu ǝŋ ya zhiɗ ngǝtii a lǝǝɓ yaali, caa naai ɗ ɗǝki. ¹⁴ Nǝ duryo tu ngǝtn yo ɗaŋ yaa zhiɗ tii a dǝǝl a naai nǝ lǝǝɓ yaali. Nǝ gi ǝŋ tǝ wul tu, ''Yaali, kyan nurghǝ kuci, shishiɗi a mǝn mǝǝskǝn, gii nǝ Ɓorghǝnni wo mbaa a gamawa.'' ¹⁵ Ɗakghǝn ɗa nǝ tsǝtnngǝn wan, a tsǝtn ɗaŋ ɗǝghǝrsǝ hŋ, beɗ tǝ gi ɗaŋ mǝn saghaɗkǝn. ¹⁶ Ɗakghǝnɗa tǝ riighǝn wan, duryo tu mbuɗkǝnnes nǝ kusǝŋshi. ¹⁷ Nǝ gi aa naa nǝ ɗǝghǝrsǝ hŋ, she aa yisǝŋ ngǝtn yo ɗaŋ Cogn ca suu. ¹⁸ A tlyaa ɗuu tǝ ɗuki wani hŋ, duryo caa malar tsǝtnngǝn zaar. A bamvi gi yugnnii tǝ zhipti vaar. ¹⁹ Kii wul vi tǝ dlǝŋsǝ wan tǝ ngil zhipti, kii wa ngil Daadǝn mǝn tǝ raa wan ɓuruk. ²⁰ Ki nyar nǝ koni, a giɓ kǝ sǝǝmngǝ Daadǝn wopm Yesu ɗaŋ nǝ Ɓorghǝnni, tlǝghǝn a Daawopm Cogn. ²¹ Kii vǝr gamawan dlǝŋsǝ wan a luughǝn gi ɗaŋ nǝ Ɓorghǝnni. ²² Guɗi, mbutarǝn gamawan gya tuur wan mǝn ɗaŋ tu kyaa finǝ Daadǝn mǝn. ²³ Duryo tu tuuri ghǝn ci ganngǝ gǝɗi ɗaŋ gi ɗaŋ nǝ Ɓorghǝnni ghǝn cin gamngǝ Ikilisiya, gii nǝ ɓorghǝnni gamashi ghǝn cin murghǝ kaɓkǝn wos. ²⁴ Beɗ tǝ gi, ɗaŋ gii ɗaŋ Ikilisiya caa laaɓ gi ɗaŋ nǝ Ɓorghǝnni, cik a na ciɓ guɗi tǝ laaɓ gya tuur wasǝŋ a koni. ²⁵ Mǝn monci , suun guɗi wan ɗaŋ gi ɗaŋ nǝ Ɓorghǝnni a suu Ilkilisiya, hal a vǝr gamashi nǝ dur wos. ²⁶ Gii nǝ Ɓorghǝnni a vǝr gamashi nǝ Ikilisiya duryo tǝ sulartii ndzǝk ndzǝk, ɗaŋ aa coɓtii tǝ zha tǝ gǝgn, ²⁷ gi nǝ Ɓorghǝnni a coɓ Ikilisiyai tǝ ndzǝkni duryo tu tǝ tutǝ tǝ daduɗ wus ko mǝǝŋ ko ngǝtn won ɗaŋ gi hŋ. Duryo tu tǝ naa tǝ ndzǝkkǝn tǝ ngǝtnngǝ verghǝn hŋ. ²⁸ Cik ɗaŋ a ndara mǝn monci tǝ suu guɗi wasǝŋ ɗaŋ dlii wasǝŋ. Gyo ɗaŋbya suu gǝɗi wos a suu gamashi. ²⁹ Duryo tu gon a yi nyaŋngas dlii wos hŋ, beɗ tǝ gii, caa vǝr tǝ ngǝtn cighǝn.. num tǝ tǝ ɗakkǝn, ɗaŋ gi ɗaŋ gi nǝ Ɓorghǝnni a yaalɗa nǝ Ikilisiya. ³⁰ Duryo tu minǝ dlarnyi dlii wos. ³¹ ''Nǝ de gin ghǝn zaar wo gaa Daagos tǝ Naashi, liiɗi a gǝɗi wos, yanshi mbǝtlǝmi ta naai dlii namboŋ'' ³² Ngǝtnngǝn jom jomni gin nǝ vari, mya wul vii a dul gam gi nǝ Ɓorghǝnni tǝ Ikilisiya. ³³ Beɗ tǝ gi konu wan tǝ suu gǝɗi wos ɗaŋ gamashi, gǝɗes tǝ luu tuurwos.