Kili Taashi mɓǝtlǝŋ tliiti mɓǝtlǝŋ

1 ''Gya kunda tǝ gya daawopm, sǝǝn kǝǝm a wul vuumghǝnatn ɗaŋ ma fuuki ɗaŋngǝnni.'' 2 Ɗa zarshes tǝ wum Bulus a wulshi vi tǝ vik Ibraniyawa, tǝ fii kyalak. A wul tu, 3 ''Minǝ mǝn Yahuda ɓwaghǝn ŋaa yatl Tarwasa kaɓ kǝ kilikiya, beɗ tǝ gi a vwak Gamaliya a yatlǝn ǝŋ tǝ ta kuɓarǝm. Tǝ ta giɗǝm ghai nyaŋ nyaŋ a laaɓkǝn datǝpm mborki kǝ mǝn ɓwaaghǝn wopm. mi tǝ kashi nǝ durghǝ laaɓkǝ Cogn ɗaŋ kyani kǝ yir ɗaŋ. 4 Ma fir forǝm a datǝpi gin hal nǝ kǝ mǝǝskǝn, ma naɗ mǝn monci tǝ guɗi mǝ ndǝr mǝ njyakshi giɓ jarum. 5 Ɗaŋ gyo ɗaŋ sǝŋwari vari tǝ ɓuruk mǝn varaŋsǝ tǝ tlyam zha mǝn. Mǝ ta kaɓ tagata ɓashi nǝ kundaktǝ ɗaŋ ci Dimasko, durghǝ tu mǝ tlǝn naɗshi mǝ sularɗi kaar Urshelima, ǝnnda tǝ buŋngarshi. 6 A ta maan tu ɗaŋ mǝ ta yi gha datǝpm, ɗaŋ mǝ ta naa mel tǝ Dimasko, a dlǝk dzaŋ swaaɗ she dǝllǝ wuɗ ta mbwaaɗi tsogn von man ngyirǝŋmi tǝ mbaghǝn. 7 mǝ ndaɗi yatl ǝnnda mǝ wum yer won wullǝm tu, ''Shawulu, Shawulu, ni ca kya firǝm forǝmme?'' 8 Mǝ ta suɗa, ''kyan kinǝ nuu, Daadǝnna?'' a wullǝm tu, ''Nǝ myani Yesu mǝn Nazareɗ gyo ɗaŋ kya firǝm forǝm.'' 9 Gya gyo ɗaŋ mǝta yi cimshi tǝ yel wuɗes, beɗ tǝ gi tǝ wum yer daswon ɗaŋ ata wullǝm vi hŋ. 10 Mǝ wul tǝ tu, ''ma fi wuri, Daadǝn? Daadǝn wullǝm tu, ''shishi a ndai giɓ Dimasko; ɗanni ghǝn ta fuughǝ ɓuruk ngǝtn yo ɗaŋ a ciɓ a fii.'' 11 Mǝ ta ɗya mǝ yel lǝǝɓ hŋ nǝ durghǝ mbaghǝ wuɗes, gya gyo ɗaŋ mǝ tayi cimshi tǝǝ ta ngaɓǝm tǝ ndari giɓ Dimasko. 12 Ɗanni mǝ ta tu murwon ɗaŋ sǝǝm wos tu Ananiya, murghǝ vǝrtǝ Cogn a te mborki, tǝ sǝǝm ndarani a kenghǝ Yahudawa won ɗaŋ tǝ ta yi ɗa ɗani. 13 A ta man ɓasǝm wul tu, ''kundaa Shawulu, kaɓ yaalghǝn wai! daɓak a kili ges mǝ ta yaali. 14 Ǝŋnnda a ta wul tu, ''Daadǝn kǝ mǝn ɓwaaghǝn mǝn bwaaghǝn wopm a yisǝŋ suughǝn raawoshi, a yel zarghǝ zaari, a ndǝr wum yer won ɗaŋ ca nyolɗi a viwos. 15 Nǝ duryo tu ka naa nǝ murghǝ tlyaghǝn zhawos a zarsǝ ɓuruk a dulgam ngǝtn yo ɗaŋ kǝ yelli kǝ ndǝr kǝ wummi. 16 Ɗaŋngǝnin kya ɓuɓnǝ ni? Shishi tǝ fighǝ baɓtisma mǝn, tǝ coɓkǝ kusǝŋsǝ ngǝtn waan mǝni a yi cimmǝn sǝǝmwos.'' 17 Ɗa kaari ɗaŋ mǝ ta sum Urshelima, ɗaŋ mǝ ta yigha karaghǝn Cogn giɓ vin ladi, she mǝ ta kaɓ yelghǝn ngǝtnngǝ jaan. 18 Mǝ yel tǝ a wullǝm tu, ''motlak nyol a gaa Urshelimai, duryo tu taa kaɓ tlyaghǝn zha wa a dulgaman hŋ.'' 19 Mǝ ta wul tu, ''Daadǝn, yaŋshi ngǝtn wasǝŋ taa yisǝŋ tu, ma ta shinshi giɓ jarum, mǝ ndǝr mǝ voɗ gya gyo ɗaŋ tǝ caa raa ɓaskǝ a ko viin ladi Yahudawa gyo. 20 Ɗaŋ tǝ ta ya paaskǝn voraŋ murghǝ tlyaghǝn zhawa Istafanus, mǝ ta yi a dlǝǝrghǝn ɗaɗan migha, naɗkǝn kaari, migha yaalghǝn nǝ lǝŋsǝ gya gyo ɗaŋ tǝ ta ɗuutǝ.' 21 Beɗ tǝ gi a ta wullǝm tu, 'tlǝ duryo tu ma shin ghǝ ɗoŋngai a mǝn ɗǝgn.'' 22 Tǝ ta sǝǝtǝ kǝǝm hal she ɗaŋ a ta kon ginnin ǝŋnda tǝ ta gǝm vii tǝ wul tu, ''Nyolarǝn murin ni a ɗǝgn duryo tu a ndara tǝ naɗa gwaam hŋ.'' 23 Ɗaŋ tǝ ta yigha gǝmghǝn vii, tǝ tǝ yi kuur lǝŋsǝ wasǝŋ tǝ ndǝr tǝ shisher guɗ guɗ, 24 munvar mǝn manndes a ta caa tǝ lǝǝr Bulus ɗi ɗa giɓ dǝnni. A ta ca tǝ ceɗtǝ tǝ voɗkǝnni, duryo tu yaan ngǝtnwos tǝ yisǝŋ dyek yo ɗaŋ yo ɗaŋ caa ca mya gǝǝm vii tǝ gaaghǝn gǝǝɓ tǝ yan. 25 Ɗaŋ tǝ ta naɗtii tǝ tǝrǝŋ, Bulus ta wul munvar mǝn mandes ɗaŋ a ta dlǝǝr laŋsǝ ɓastǝ tu, ''yighǝmǝn nǝ waari a voɗ mǝn Romawa gya gyo ɗaŋ taa maal hŋaa?'' 26 Ɗaŋ munvar mǝn manndes ta wum cik, a ta tlii a kamshi munvar mǝn manndǝ gon wul tǝ tu, ''nighǝn kya suu a fiye?'' duryo tu murin nǝ ŋaa yatl Romawa.'' 27 munvar mǝn manndes ta man wul tǝ tu, ''fum, kinǝ kun mǝn Romawa? Bulus wul tu, ''Eh.'' 28 Munvar mǝn manndes ta suɗa tu, ''Tǝ wurɓa monnda ǝŋ mǝ ta ɗiɓ tagarta naghǝn nǝ ŋaa yatl. ''beɗ tǝ gi Bulus wul tu, ''tǝ ɓwaam nǝ ŋaaghǝ yatl Roma.'' 29 She zarsǝ yo ɗaŋ taa taman tǝ ndatǝ ɗa tǝǝ gaati swaaɗ. munvar mǝn manndes yan beɗ vǝrta ta ngaɓti, ɗaŋ a ta yisǝŋǝi tu Bulus kun mǝn Roma, duryo tu a ta naɗti.