¹ Duwa shimi na Bulush na bo jaglah ma kirishti Yeshu duwa kamai angaugi , ² ɓa mondin kɨ kang wutau ma yashik mɨ Puroguru shi ɓona daa kamai. ³ Na ɓulo me ko woma apɨk mɨ wun apɨna ko tuka tuka gire na ɓula kalla la bila likarkat. ⁴ Shakam mɨ akɨ yinge ɓuloi me,akɨ ɗɨm ɓɨn wom la ki daa tuka tuka jire ko Kirishti. ⁵ Jaman ninni woi wun apuwau, ko ambo ma mi'yau Ge ɓanje a auweni kang la lɨm ko ana tupi gɨn ana wouyo. ⁶ Woma tuka tuka jire me shimi ma angaugin ɓanje wun apomu la ɗuko ma dimbiyik wun apomu kɨma la ana tika ma ɗoɗowa ko ɓala ma Kirishti Yeshu ko ɓalam neri. ⁷ Daa shimi na duwana kwarak ma yashik mɨ Puroguru ɓondɨna da gɨddɨng bo wutau mani. ⁸ Puroguru a ɓono woi me ko bam,dai gɨn ɗunghono lo tashi la moi darɨmawu nap ko Puroguru.Da woyi shimi na yiwu ɓala ko angaugin ɓala mɨ neri me ma Kirishti. ⁹ Bila na ɓɨr kumo min'ya dai ko wom Puroguru shi tuka .Wom bo tukunjei me a ɗuwoni duduk,dumbo Puroguru shi ɓanga ,Shim mɨ ɓirma la pani dai. ¹⁰ A ɗuwoni kishimi tana ɗa ko Yikilishiya,amnagin gɨn ana joko joko ma moi la puro au do ɓɨnmai kamo bo shen shen ɗang ɗang mɨ Puroguru shi gɨn shi. ¹¹ Woyi me an do yima ki mi shi ɗika an yima yi Kirishti Yeshu na gɨpekomu.̈ ¹² Ko ɗuko mamu la Kirishti mɨ yapomu nging ɗɨm mɨn gɨddɨng ko ɓoi jire mamu yini. ¹³ Kɨduwa shimi na kumbu mamai bo ku ɓale akɨ ma gɨn biu, da kindi mɨ na kanghai duwa kamai.Yimani ɗat da darma mamai. ¹⁴ Da shimi na tɨmana ali gɨn bo bɨirɨmno yi bonghu. ¹⁵ Mum dai binye min'ya moi la pani gɨn puro,wun porawa la yimni . ¹⁶ Na kumbu mani,bɨla ɓomai kunduk ma darma mani bɨla kɨ ɗuwoku gɨddɨng la lɨm mani mɨ dimbimai. ¹⁷ Na kumbe ɓa Kirishti ɗuwoni la awomai da ɓoi jire mamai.Na kumbe kɨ yapoku ngɨng bo jinda apomai kamo mani , ¹⁸ kɨ ɗuwoku ana jinda boi kɨduwa kɨ bɨni apomai ana boi jirei,anya ɗinga ɗinga bopni ,gambeni ,rungni,juɗuk jinda boi ma Kirishti. ¹⁹ Na kumbe bɨla kɨ bɨn dɨgɨm jinda boi ma Kirishti mɨ gowa binen dai.Ki gɨmi kamo ɗuko shimi ko Puroguru.̈ ²⁰ Banje dai mum an dɨmmai bɨla ye mani gowe shimi dai wom mɨn kumba gɨn mɨ mɨn shenmai la barka mani mɨ shi ɓoma yimu. ²¹ Darma mani bɨla ɗuwoni gin darma la Yikilishiya gɨn Kirishti Yeshu da blo kirau jaman pa bada.Amin.