Chapter 3

1 ಅನಾಕಾಜೆ ಉಜು ಖ್ಹಮಾಳಾನ ಕೋಹೋಯಿನಿ ಅಪ್ನೆ ಅಥೇನೆಮಾ. 2 ಏಕೇಲೋರವ್ಹಾನ ಅಚ್ಚುಕರಿ ಯೋಚನೆ ಕರಿ ತಮಾರ ಉಪ್ಪರ್ ಆಯುತೆ ಗಾಷಿ ಮಾ ಏಕ್ಬೀ ಚಂಚಲತಿ ನಾ ರನ್ಹೂಕರಿ ತುಮ್ನಾ ಬಲಪಡಿಸಾನ ತುಮಾರಿ ನಂಬಿಕೆ ಬಡಾವನ ಅಪ್ನು ಭೈಯೆದೇವ್ನೋ ಸೇವಕ ಹುಯಿರೋತೆ ತಿಮೋಥಿನಾ ತುಮಾರ ಕನಾ ಬೋಲಿಮೋಕ್ಲ್ಯಾ. 3 ಗಾಷಿ ಲೆವಾನಖ್ಹಾಜೆ ಹಮೆ ನೆಂಿಷಿಹುಯಿರಾಸ್ಕರಿ ತುಮೇಸ್ ಮಾಲುಮ್ ಕರಿರಾಖ್ಯಾಸ್ 4 ಹಮೇ ತುಮಾರಕನಾ ರವಾನಿಟೈಮ ಗಾಷಿ ಲೇನುಪಡಾಸ್ಕರಿ ಅಗಾಡೀಸ್ ಬೋವಿರಾಖ್ಯಾಸ್, ಇಮ್ಮಾಸ್ ಹುಯೂ, 5 ತುಮಾರಿ ಅನುಬವಮಾ ಆಯೂ ಇನಾಕಾಜ ಮೇ ಉಜೂ ತಡದ್ಯೋಕೋಯಿನಿತೆ ಏಕ್ ವಖ್ಹತ್ ಶೋದನೆವಾಳೋ ತುಮ್ನಾ ಶೋದಿಂಚಿನ್ ದೇಖ್ಯೂತೇಖ್ಹತರ್ ಹಮ್ಮಾ ಪ್ರಾಯಾಸ್ ವ್ಯರ್ತ ಹುಯಾಕಿ ಕಿಮ್ಕಿಕರಿ ತುಮಾರಿ ನಂಬಿಕೇನಿ ವಿಷಯಂಮ್ಮ ಮಾಲುಮ್ ಕರಾನಾ ಇನಾ ಬೋಳಿಮೋಕಲ್ಯೋಟ 6 ಕಿಮ್ಕಿ ತಿಮೋಥೇ ಹಂಕೇಸ್ ಹಮಾರಕನಾ ಆಯಿ ತುಮಾರಿ ವಿಶ್ವಾಸ ಪ್ರೀತಿನ ವಿಷಯಂ ಅಚ್ಚು ಸಮಾಚಾರ ಬೋಲಿ ತುಮೆ ಹಮ್ನಾ ಕೆದೇಬಿ ಅಚ್ಚಿತರ ಯಾದ್ಕರಿಲಿನ್ ಹಮೇ ತುಮ್ನಾ ಕಿಮ್ಕಿ ತ್ಮಿಮ್ಮಾಸ್ ತುಮೆ ಹಮ್ನಾ ದೇಖಾನಾ ಆಶಾಕರುಕರಾಸ್. 7 ಕರಿ ಬೋಲ್ಯು, ಭೈಯೇ ಅನಾ ಖ್ಹಂಜೀನ್ ಹಮಾರು ಖ್ಹಾರು ಕಮೀಮಾ, ಗಾಷಿ ಮಾ ತುಮಾರಿ ನಂಬಿಕೇನಿ ಜ್ಹರಿಯಾ ಹಮ್ನಾ ಸಮಾದಾನ ಹುಯೂ. 8 ತುಮೆ ದೇವ್ಮಾ ದ್ರಢಥೀ ಉಬಿರಾಯಾತೋ ಹಮ್ನಾ ಜಾನ್ಆವ್ಶೇ. 9 ತುಮಾರ ವಾಖ್ಹತೇ ಅಪ್ಣ ದೇವ್ನಾ ಖ್ಹಾಮ್ನೇ ಅಪ್ನ ಚ್ಹಾತೆ ಖ್ಹಾರಿ ಸಂತಷಾನ ಖ್ಹಾಜೆ ದೇವ್ನಾ ದೇನುತೆ ಸ್ತೋತ್ರ ಕರಾನು ಅಪ್ಮೇಥೀ ಕಿಮ್ ಉಷೇ 10 ತುಮಾರಾ ಶುರೂತ್ ದೇಖಾನ್ಕಾಜ್ ತುಮಾರಿ ನಮ್ಮಕಮ್ನಿ ಕಮಿಘಟಿನ್ ಜವಾನ್ಕಾಜ್ ಅಪ್ನ ಅನುಕೂಲ ಹುವಾದಕರಿ ಹಮೆ ರಾತ್ದನ್ ದೋವ್ನಾ ಕೆತಿರೇಕಿ ಬೇಡವಾಳ ಹುಯಿರಾಸ್. 11 ಹಮಾರೋ ಬಾ ಹುಯಿರೋತೆ ದೇವಬೀ ಹಮಾರೋ ಕರ್ತಹುಯಿರೋತೆ ಯೇಸು ಹಮ್ನಾ ತುಮಾರಕನಾ ಆವನಾ ವಾಟ್ ಕಾಡಾಧಾ. 12 ತುಮಾರಮಾ ಹಮಾರಿ ಪ್ರೀತಿ ಕಿಮಕಿ ತಿಮ್ಮಸ್ ತುಮಾರಿ ಪ್ರೀತಿಬಿ ಏಕ್ನಾ ಏಕಿಪರ್ ಖಾರಾ ಅದ್ಮಿನಾಪರ್ ಅಚ್ಹುಪಡಿ ಜ್ಹಾಖ್ಹರಿ ಜ್ಹಾಖ್ಹತ್ ಹುವಾದಕರಿ ,ಯೇಸು ಏನುಗ್ರಹ ಕರಾದ. 13 ಹಮಾರೋ ಕರ್ತಹುಯಿರೋತೇ ಯೇಸು ವಿಮಾರಿ ಹ್ರುದಾಯನ ದ್ರುಡಪಡಿಸಾಯನ್ ಇನೀ ಖ್ಹಾರೂ ಪರಿಶುದ್ದ ಪರಿವಾರ್ ಖ್ಹಾಮೇತ್ ಪ್ರತ್ಯೆಕ್ಷಹುವಾನಿ ದನ್ನೆ ಬಾ ಹುಯೋತೇ ದೇವ್ನಾ ಸಮೂಹಮ ತುಮೆ ಪರಿಶುದ್ದಥೀ, ನಿರ್ದೋಷಿತಿ ಹುವೀನಿಘೋಣೆ ಕರಾದೆ