1 ኢሂይ የእግዜር በዩ፡ የኢየሱስ ክርስቶስ የምስራች ቃል ጅምርቱ፡- 2 ኢሂሚ በነቢዩ በኢሣያሲ፡- ‹‹ ዩህ አንጋናይ የንሥሳል መልህተኛይ ለቀደምሄይ ያቀድምም የልሃሁ፡- 3 ኡትሚ፡- ‹‹ የጐይታናይ ኡንጋ አዝጐጁ፡- ቅደሚ አቅኑ›› ቲይብል በበረሓ ኡ የብላል ሰብ ቃል›› ተበኚም የትፃፌዩሁሙ፡፡ 4 ኢሂቴይ ለሃኒዩ አስጥማቂይ ዩሐንስ ‹‹ የድርጐተን እደጐት ተሮሁቢያለሁም ንስሓ ጉቡም ተጦሞቅ›› በቡኝት በበረሓ ቲያውጅ መጣ፡፡ 5 የይሁዳ ደብር ሰብቸወ በኢየሩሣሌም የኖቡረል ሁልምኖም የጡትን ይምጡ ናሮ፣ ኡርጐተምኖም ቲይዱ በዮርዳኖስ ቆሮ በውት እንጂ የጦምቅ ናሮ፡፡ 6 ዮሐንስሚ በጋላን የትሠራ ልባሻ የለብስ ናሮ፤ በጭንምኒ ጠፍረን ያጣድ ናሮ፣ የባሌዩሚያሌ አንበጣው የበረሓን ጥገይ ናሮ፡፡ 7 እኩሚ የብል ናሮ፣ ‹‹ ወስጥ ሊልብልም የአሽነኒ ያግድቢያል ሉፍትት ደጉ ያልሃን በኤያ የበልጣል ለኤያ ኃንጪ የመጣሎ፤ 8 ኤያ በመዶን የጠምቆሁማ፣ ኡት አህሚ በመንፈስ ቅዱስን ያጠምቆሁማ፡፡›› 9 በውትጊ ኢየሱስ በገሊላ ደብር ቢይትረሀባል በናዝሬት ከተመ መጣም በዮርዳኖስ ቆሮ በዮሐንስ እንጂ ተጠመቆ፡፡ 10 አየሱስሚ በመዬይ የወጣዩሁም ኡትነምጊ ሰማይ ቲይትከፋትወ መንፈስ ቅዱስ በአንደሪ መልክ ሃነም በውት ዳር ቱዩርድ እሪ፡፡ 11 በውትጊ ‹‹ አተ የትወደድህነህ በዩወዩ፣በሃት ተሰን የብለኛ›› የብላል ቃል ለሰማይ መጣ፡፡ 12 ኡትነመጊ የበረሓ የሱምዴያለሁም መንፈስ ቅዱስ አንቃቂዬ 13 በውትም በበረሓ በሰይጣን ቲይትፋተን አርብ አያም ደለሶ፤ ተአውሪሚ ባድ ናሮ፤ መለአካኩሚ አግሎጐሊው፡፡ 14 ዩሐንስሚ ቲንዘም የእግዶት ጋር በገብ ኢራኒ ኢየሱስ የእግዚረን የምሥራች ቃል ቲዩድ ገሊላ መጣ፡፡ 15 ቲይድሚ ‹‹ ጊዜይ ጄጂ፤ የእግዜር መንግሥት ቀረባማ ንስሓ ገቡ፤ ቢሂሚ በምሥራች ቃል ኡምን›› የብል ኖሮ፡፡ 16 ቢሂይ እንዳል ኢየሱስ ለገሊላን መይ ሚን ያልፍ ነሮ፤ ስምዖንዋ ኢኖኒ እንደርያስ ቱሉም ዩንዙ ለነሬዩይ መረበኖም የመይ ቲይጠል እሪም፡፡ 17 ኢየሱስሚ ‹‹ኖሙ ተሔቴሎዩኝ፤ ኤየ ሰበን ተንዚያሎሁም የስኖሁማ ሁ.›› በሎም፡፡ 18 ኢኖሙሚ ኡትነምጊ መረበኖም ኦደጉም ተሂቶሊ፡፡ 19 ለጂም ጢት ያለወይሁም ሊለ ሆይት እነንቻ እር፤ ኢኖሙሚ የዘብዴዎስተ በየቻ ያዕቆብዋ ዮሐንስ ኖሩ፤ ኢኖሙሚ በጀልባን ደር ሆኑም መረበኖም የሚቹ ነሮ፤ 20 ኢየሱስ ኡትነምጊ ጠሮም፤ ኢኖሙሢ ኢየሱስን ሊቴቴለት አበነኖም ዘብዴዎስን ተብለቴኛኙይ በድ በጀልባይ ዳር ኦደጊም ሄዱ፡፡ 21 ኦሎፉሙም የቅፍርናሆመን ከተማ ጂጁ፤ ሲይመጠሚያሌይ ሰምት ኢየሱስ የአይሁድ የጡቂሸ ገር የሀኔዩይ የሙክረበን ገበም ዮወትመር ጂመር፡፡ 22 ኢየሱስ፣ የሙሴ የሕግ አስተማረሩ የትሙሪያልሁም ታይሃን የበለ ሥልጠነንሁም የትምሮም ነሮ፤ ሊሂሜይ የሰሚይ ሁሉምኖም በትምህርትኒይ ተደኖቅ፡፡ 23 በምኩራብኖም በዱ መንፈስ የንዳረቢን ሰብ ነሮ፤ ኡት ኢኩ ቲይብል ኡብል፣ 24 ‹‹የናዝሬቲ ኢየሱስ! እኛ ተሀት በድ በምነን የግነኝነል? ሊታጠፋነን መጣህ? አተማየሀንሄይሁም ኤየ የሽልነሁ፤ ኣተሸ ይግዜርን ቅዱሱ፡፡ ›› 25 ኢየሱስሚ በዱይ መንፈስ ‹‹ ሰም በል! በውት ውጥ!›› በለም ተሺነኔይ፡፡ 26 በዱይ መንፈስ ሰቢቻይ ጠለም በንፍረፈሬይ ለንጪ ቃለኒ አገደረም ኡቲይ ብል ቦውት ወጥ፡፡ 27 ሰቢ ሁልምኒ ተደነቀም ‹‹ ኢሂይ ሰነን ምነን? በዱይ መነፍሸ በሥልጠንን ዩዝዘ፤ ኢኖሙሚ የቲዞዙኒና፤ ኢሂይ እንኩ አዲሲ ትምህርት?›› ቲይቡል ገግበገግኖም ተሶስል፡፡ 28 ኢትነምጊ የየሱሲ ዝነ ቢሰአውዳኒ በገሊላ አውደሁልኒ ተሰም፡፡ 29 ኡትነምጊ ኢየሱስ በምኩረብ ወጣም ተየዕቆብዋ ተዮሐንስ በድ የስምዖንንዋ የእንድሪያስን ገር ገብ፡፡ 30 በገርሚ ውስጥ የስምዖን አማትኒ በንዳዳት እደብቲይነዳ እኚትም ነር፤ የይትሚይ እደበት ኢዲ፡፡ 31 ኢየሱስሚ የይትንከ ቀረበም ኢንጂነ ኢንዘም አነቃ፤ ንዳዳትሚ ይኡትነም ገፈረ፤ ነቅተም አስትነገቶም፡፡ 32 ኦሪት ጠለቀም በማሻግ ሰብ እዳባተኘኙዋ በጋኔል የቅንዙይ ሁለምን የእየሱስን ወምጠትና ጅምር፡፡ 33 የከተማሲ ሰብቻ ሁሉምኖም በግፍጪን ተሰብሶቡም ናሮ፡፡ 34 ኢየሱስ በትለየሲ እዳባት ይሱቆየለይ ብዝ ሰብቻ ኣትዩ፣ ብዘ ጋኔላም አወጥ ጋኔልም ኡት ማን የሃኔይሁም ይችልን ናሮ፣ ይሃን በቀር የዎሉኋላሁም አልፍቃደነም፡፡ 35 ልይዘይኝ ትይበል ኢየሱስ በቅላት ነቀም ወጣም፣ እግዜራን ልይጡቅሶ ሀድ ሰብ የልለራ አውዳ ሂድ፡፡ 36 ስምዖንዋ ቁባቢቻን ተህቶልም ኡትን ልለፎጬ ሂዱ፡፡ 37 በጎኝምግ ‹‹ ሰብ ሁልምን ይፋጭሃነቻ›› ቦል፡፡ 38 ኢየሱስም ‹‹ አያ የምጠህይ ለመስተማር ለሃኔይን ያትምሬሜያለሁም ባቀሩቢ ዮሊይ ምንደረሩ ለኒጽኖ›› በሏም፡፡ 39 ብህም በሰም ኩረባቢቻኖም ቅያትምማ ጋኔሌይ ትየወጣ፣በገሊላይ ሁለምን እግረገብ ናሮ፡፡ 40 ሀጽ ለምጠም የኢየሱስን ሀጽ መጠም በእግርን ሥር ተደፋም ‹‹ ፍቃድህ ለሃነግ ልተናጣኝ ትችልነሁ›› ትይብል ጡቀሰይ፡፡ 41 ኢየሱስም እዘነንም እንጅን ዝራገም እንዘዜይም ‹‹ ፍቃዱሁማ ነጥ›› በለይ፡፡ 42 ስብቻም በለምጥን ኡህነምግ ነጥ፡፡ 43 ኢየሱስ ትየትሰንብቴይ ኡኩ በለም አጠበቀም እዘዜይ፡- 44 ‹‹ እህኔይ ሰነን ለሀድምን የተወልሂይሁም ገገህ ቅር፣ የሃን በቀር ሂድም ገገህ ለካህን አጌ፤ ለሕዝብም ምስክር ይሃነሏሁም ሉዩ ትህ ሙሴ ይዘዜይ መሥዋዕቴይ አቅርብ፡፡›› 45 የሃን በቀር ሰብቻይ በጅ ወጣም ይህኔይ ሰነን ለሰብ ሁልን ወዳት ኛ ነር፡፡ በህም ማህኛ ኢየሱስ የሀዳኖም ከተማ ደጉ በጉልጣ መግባታን አልቻለም፡፡ ለሃነምግ በከተማይ አዲ ሰብ በልላብ አውዳ ይነብር ናሮ፤ ሰብቻም ብሰአውዳን ዮውትን ሀድ ይመጡን ናሮ፡፡