¹ ኢየሱስ እህኔይ ይትምሶክቢያለይ ትዕዘዝቻ ለአሥረ ሆይት ተማረሩን በወብ እረን ኡትን አውደ ገፋረም በቁሩቢ ባየሊይዋ ብይትሮሁቢየለይ ከተማሙ ሊይሰብክዋ ሊያስተምር ሂድ፡፡ ² የጠሚቃለለይ ዮሐንስ በእግደት ገር ተል የክርስቶስ ነይ ብል ሳም፤ ብህም የጋጋን ተማረሩ መላተኘኙን የኢየሱስን ሀድ ለህ፡፡ ³ ይመጣናል የትባለንን መሲሕ አተት ወይ ልላ ለቅርን? በለም ኢየሱስን እሶሊያለሁም ሰን፡፡ ⁴ ኢየሱስ ኡኩ ትይብል አገረገባኖሙ ‹‹ሁዱሙ የሪሁማንዋ የሰሙምን ሁለምን ለዮሐንስ ኤደ፡፡ ⁵ ዩካ ኢኖም የይሪይ ዩሩኖ እንግርን ስንኩል ቀጥን ይብልም ይሂዶሎ፤ ለምጠጡይ ይዋፅኖ የያሶሚ ይሰሙዋ የሙት ይነቅና፤ ለድሀሁይ የምሥራች ቃል ይትሂድና፤ ⁶ ቤየ የይትሰነከል የትማሰገነኑ፡፡ ⁷ የዮሐንስ መለተኘች በሂዱ እረን ኢየሱስ ዮሐንስን እመሶላል ኡኩ ትይብል ወዋለህይ ጅማር ብህምካ ምነን ሎረት የበረይ ወጣሁም? በንፋስን ይትለወሰለይ ቀንበረ ሎረት? ⁸ አህም ምነን ሎረት ወጣሁም ቤይዛ የሐር ልባሻ የለሰን ሰብ ሎረት ቤይዛ የሐሬይ ልበሻ የሎቦሰ በነገሥተቱንይ ገር ይትሮሆቦ፡፡ ⁹ ምነካ ለምነን ወጣሁም ነቢያን ሎረት አዎ አኩም በነቢያሜይ የበለጥ ሎረቱ እብሏማነሁ፡፡ ¹⁰ ኡት ዩካ ለቀደም ቀደምህ ትይሂድ ኡንጋህ የሰነደል መለተኛዬ ለቀደምህ እልህነሁ የትበላም የፀፋንንዶ፡፡ ¹¹ ብከማ እብሏሁማሁ በደቺ ደር ተጭኙማለ በል ብየጠምቀለይ ዩሐንስ ይበልሐል ሀድ እሎ ለሃነምግ በማንግሥተ ሰማይ በሁልማን የንሰናል ይበልጥን፡፡ ¹² ብየጠምቀለይ በዮሐንስ ዘመን ጅማረም አውጅ ሊጅጅግ መንግሥተ ሰማይ ግድረን ተገፋማ ቦገሚን ልህይ እገፋለይ ይረቤይናሏ፡፡ ¹³ ሁለምን የነቢያት ትምህርትዋ የሙሴነይ ሕግ የጠምቀለይ ዩሐንስ ልጅጅግ ትያዎልህን ደለሰማ፡፡ ¹⁴ ብህም ኡኖሙ የዎሎህይ ልትቅቦል በፍቃድሁም የ ይመጣና የትበለይ ኤልያስ ዩካ እቴዩ ዮሐንስ ¹⁵ እኔይካ ይሰማለይ እዝን የለይ የሰሙ ¹⁶ ለሃነምግ የህኔይ ዘምን ሰብቻ በምነን የትረሮማህ? በሸንጉ የጉቡም ቀበቢቻዋም ትይጦሩ ኡኩ ይትበላለይ በየቻ ይምሰሎል፣ ¹⁷ የተስታይ መዝቃ አሳሚነኑ አቱሙ አህም አልሸበልሁም፤ የሐዘናም ሙሹ አሲሚነኑ አቱሙ አህም አልብችሁም፡፡ ¹⁸ አኩም የጠምቀለይ ዮሐንስ እህል ትይበልዋ የወይኔይ ጠጅ ትይሳች በመጥ እህይ ጋኔልን አለብ ቦል፤ ¹⁹ የሰብ በዩ አህም ትይበልጥ ትይሳች በመጥ ዩካ ይህይ ይቦልየልዋ ይሶችናል ዩዶድናላዩ፤ ግብሬይ ይሰበሰበለይዋ የዲርገተኘኙን ዋደጅ ቦል፡፡ ብህም ቻሉች ቦጋን በብልን ይትረል፡፡ ²⁰ አትታላም ኢየሱስ በልላቹ ከተማሙ ይበልጥ ብዝን ታምረት የሰነብይ ከተማሙ ንስሐ ለልጓቡን እኩ ትይብል ወወቀሴን ጅማር ²¹ ኡንባሸ ኮረዚን ኡንባሸ ቤተሰይዳ በሀቱሙ የሃኔይ ታምረት በጢሮስዋ በሲደና ቢይሃን በጅ ይኖቡር የነሬይ ሰብቻ የሐዘኔይ ልባሻ ይሉቡሱዋ በገግኖም ደር አመደይ ይኖስኑሱም ይቆዱሙም ንስሐ ይጓቡ ናሮ፡፡ ²² ብህም በፍርድ አያኮ በሃቱሙ ይልቅ ለጢሮስዋ ለሲደና ቅጠት ይቀሏሙና ²³ አቺም ቅፍርናሆም የሰማይ ደር ልጅጅግ ወጠሻም እል? አህምካ የሲኦለን ቡር ትርጄሾ፤ በሐቺ የሰኔይ ታምረት በሲደናም የሰን ቢይሃን፣ ኡት ከተማ አህም ተይጠፍ አውጅ ልጅጅግ ብይነብርን ናሮ፡፡ ²⁴ ልህም ብካን እብለሁ በፍርድ አያም በሐቱሙ ገድር ለስዶም ቅጠት ይቀልለና፡፡ ²⁵ በውትምግ ኢየሱስ ኡኩ በል የሰማይዋ የደቺይ ጎይታ የሃንሄይ አባዬ እህኔይ ሰነን በብላተኘኙዋ በቻየዩይ ሸሚሃም ለበየቻ የግለጥሄይን አምሰግነሃናሁ፤ ²⁶ ኦ አባዬ እህኔይ ሊሰን የሃታት ቤይዘ ፍቃድ ሃናማ፡፡ ²⁷ አባያ ሁለም ሰነን ወቤኛማ በአባያ በቀር ወልዴይ ይችለል ሀድን እሎ፡፡ አኩም በወልድ በቀር አባና ይችላል እሎ፤ ማንምን ወልድ ሊይትገለጥን በልትፍቃደን በቀር አባና ልችል አይቺሉ፡፡ ²⁸ ይጡሪያለይ የሃበደሁም አቱሙ የጭጥሁም ሁሉሁም የኤያን ኦጋን ኖሙ ኤያም የትፉዮማናሁ፡፡ ²⁹ ቀንበረ በረቅሁም ጡሩ፤ በኤየም ተምሩ ኤየም ደል ልምኖሁ ለነፍስምሁም ዮፍያተን ትሮሁቦሁም፡፡ ³⁰ ቀንበረ ይቀልና ይጡርምያለይ የኤየይ ይቀልና፡፡