የሉቃሲ ወንጌል ፉያት 22

1 ፋሲከ የትበኛል የቂጠይ በዓል ቀረቦ፡፡ 2 የክህነቲ አለቀቁም ጸሐፈፉይ አይኩ የጦፊያሌይሁም ዬፎጪ ነሮ፤ ሕዝበሚ የፎሩ ነሮ፡፡ 3 ሴይጣንሚ በአሥረ ሆይቲ ውስጥ በዲ በአስቆርቱ ይሁደ ቢይትበኛሌይ ገበቢው፤ 4 ሄዶም አይኩ የቲልፍም ዩቤያሌይሁም ተክህነቲ ተለቀቁኖ ተመቅደስ ቲይዙዛል በድ አወለሆ፡፡ 5 ኡኖሙሚ ተስ በሎሙ ቀርሺሚ ሊዮቢ ተዋዋሎ፡፡ 6 እሺ በሎ ሕዝብሚ በሊሰቢ አውደ ሊያቲልፍም ሊዮቦም ቶኮ ጊዜ የፈጭ ነሮ፡፡ 7 ቦውት ኢረኒ የፋሲከይ ጠይ የጉሩቢያሌ የቂጠ በዓል ጂጂ፡፡ 8 ጴጥሮስዋ ዩሐንስነሚ ፋሲከን የበልኔያሌይሁም ሁዱም አሞቾቹኑን በለም ለሆሙ፡፡ 9 ኡኖሙሚ በኚን ሊለምቻችነንህ ትፈጫህ ቦሊም ተሶሊው፡፡ 10 ኢየሱስሚ ኢኩ በሎሙ፣ ‹‹ ለቀደሙም በሌይ ከተማ የገበሁሚጊ ሀድ የማይ ጮፍቱ የጡር ሰብ ተጐኞሁም፤ ኦናሚ ተሄቶሎይም የገበቢያል ገር ሁዱ፡፡ 11 ዬገረሚ አቡ መምረህረችን ተተማረሩኒ በድ የፋሲካን አርበት የበልቢያሎሂይ ገር በኚን? የብለሀነ ቦሊ፡፡ 12 ሰብቲቻሚ በሰገነት ደር የሌይይ ተጩጩሞ የሚች ሰፊ አደረሽ ያሮሁማ በጂ አሜች፡፡ 13 ሆይት ተማረሩኒ ሂዱም ሁሉም ስናን ኢየሱስ ዬበሎሙይሁም ሀነም አጐኙ የፋሲከሚ እርበት በጂ አምቶቹ፡፡ 14 ይርበቲ ሰዓት የጂጂጊ ኢየሱስ ተሐወሪያት በድ በመድ ተጉቢ፡፡ 15 ኢኩሚ በሎሙ፤ ‹‹ መከረ ቦቄበለተይ ቀደም ተሐቱም በድ ኢሂኔይ የፋሲከን ዕርበት ሊልበል ቦገኒ በቀልበይ ፈጩሁም ነሮ፤ 16 ዬሂደ ብክ የሀን ዩሺም ዋይሁ ብግዜር መንግሥት ፍጹም የሀን ዬሺም ሊዩጠጊ በሁያንደ ኢሂይ የፋሲከይ ዕርበት በፍጹም አልበሉ ዬብሎማነሁ፡፡ 17 ቦውት ኢረኒ ኢየሱስ ጡዋይ አነቀም የምስጋና ጢቂሻ ሰኖ ኢኩሚ በሎ፡፡ ዩሑም ኢሂይይ ተሶድ፤ 18 በብክን የብሎሁማሁ በሁ ዬጂምርም ይግዜሪ መንግሥት ሊያመጠጊ ቤሂይ በወይን ፊሪ ዬጨመቄይ፣ አልሰቹ፡፡ 19 ዋይሁኒ አሂተለም ኢየሱስ ኀብስት አነቀም የምሥጋና ጡቂሸ ሰነም ቆረሰም ለተመረሩኒ ‹‹ ዩሑም ኢሂይ ለሀቱም የትበል በሣረው፤ኢሂነሚ፣ ኤያን ሊቲኩሰቢ ዬሁኑሁም በለም አቦሙ፡፡ 20 ኢኩም አሚ ብርበቲ ኢረኒ ጠዋሚ አነቀም አቦሙም ኢኩ በሎሙ፣ ኢሂይ ጡዋ ለሀቱሙት ሊይትሁደል ደማይ ቃል ዬገበነቢ ወይረ መሐለኛዩ፡፡ 21 ቢሀንሚ የቲልፍም ዮቤኛል ሰብ ኢንጂኒ ቴያማ በድ በማዕድ አለማ፡፡ 22 የሰብ በው ስለ ኡት ለቀደምም በትበኚ መሠረት ዩሞትኒ አይቀሩ፣ ገሩምኒ የሰበን በው የቲልፍም ሊዮበሌይ ሎወት ሰብ ዎዩ 23 ኡኖሙሚ ‹‹ ቢኛ ግት ኢሂኔይ የስናን አይቴይ በቡኝት ገግ በገግኖም ተሶሶሉ፡፡ 24 ቦውት ኢረኒ ኡኖሙ፡፡ በሁለምኛ የበልጠል ማኑ? ቲይቡልገግ በገግኖም ወክረከር ጂምሩ፡፡ 25 ኢየሱስም ኢኩ በሎሙ ዬሂይ ዓለም ነገሥታት በሕዝበ ደር ሥልጠን ኦሌይማ፤ የትንዶድርሚያሌይ ለሕዝበ ቶኮ ዬሱናል ዬትበኙኖሎ፤ 26 አቱም አሚ ዮኖሙኔይሁም ዮሐን አለፑም፤ ዬሁን በቀር በሀቱም ጊደር የሀን በግቱም ጋገኒ ጢት ዩሐንም የቲዘዘልዋ የግለግለል ዩሁኑ፡፡ 27 በማዕድ ተጉቢም ቢይበለሌይዋ ቢይቀንንም ቢያግለግለሌይ አይተኖም ጊደር ጊደር ዬትበኛል ኡንኩ በማዕደ ዬጉቢይ ኤያ አሚ በግቱም ያገልገይኒይሁሙ፡፡ 28 ቢሀሚ አቱም በመከረይ ይጊ ጠበቅሁማንም ቀነትሚኒኞ፡፡ 29 ኢሂይ ለሀኔይ አበያይ ኤያን ለመረጤኜይ ኤያ አሚ አቱሙን ዬመርጦሁማሁ፡፡ 30 በመንግሥትሚያይ በማዕድ ተጉቡም ቱቦሎሁም ቱሶቾሁም በዙፋንሚ ተጉቡም በአሥረ ሆይቲ በእስረኤል ነገዶች ቱሸሙም ቱፎሩዶሁም፡፡ 31 ቦውት አቲታለም ኢየሱስሚ ኢኩ በሎሙ ስምኦን ስምኦን ዩህ አረሺይ ስሬይ በገለበይ ዬለዬያሌሁም ኢነጉም ሴይጠንሚ አቱሙን ሊልያዩሁምዋ ሊይፈትኖሁም ጡቀሶ፤ 32 ዬሁን በቀር የሀቴይ እምነት የይጠፈይሁም ኤያ የጡቅሰሁ አተሚ እደግኒኝ ለበኸም ዬያን ኦገን በግረገብሄይጊ ኡነንቸነምሄይ አጥበብቆም በሌው፡፡ 33 ጴጥሮስም ጐይታያይ ልግደትሚ ሀን ለሞትሚ ቢሀን ተሀት በድ ሎሄድ ቁጩሁማ በሎ፡፡ 34 ኢየሱስሚ ጴጥሮስ አውጂ ህንተቅ ተይነቅ አልችሌው ትብልንም ሼሽተጊ ትክዴኛሆ ዬብለሀነሁ በሌው፡፡ 35 ቦውት ኢረኒ ኢየሱስ ተማረሩኒ የቀርሺ ቦርሳ ከረጢት ጫማሚ ተቲንዙ በለሁሁሜይጊ ዬቀበሎሁመ ስናን ነረን በሎሙ፡፡ ኡኖሙሚ ሀድሙ የቀበለን ስናን አልነሮ ቦሉም አግሮጐቡኒው፡፡ 36 ኢየሱስሚ ኢኩ በሎሙ ‹‹ አሁ አሚ የቀርሺሚ ቦርሳ ሀኔ ከረጢት የሌይ ዬንዘ ሴይፍም የሊሌይይ ልበሸኒ የጩግርም ሴይፍ ዬወሃቡ፡፡ 37 ተደለ ጠበቁ በድ ቲለቆ ዬትበኚ የመጽሐፊ ቃል ቤያ ደር ይሐን አለቢው ለበሎሆም ማሓኛምኒ ሌያ ሌሂቀደም ዬፀፌይ ሁሉምኒ ዮሐን አለቢው፡፡ 38 ተማረሩምኒ ጐይተኛይ ዩህ ቢጂ ሆይትን ሴይፍ አለማ ቦሊው ፡፡ 39 ኢየሱስሚ በከተማይ ለቀደምም ዬሰኔያሌይሁም ደብረዘይት ሄደ፤ ተማረሩሚ ተሂቶሊም ሂዱ፡፡ 40 የጂሚ በጂጂይጊ ኢየሱስሚ ዬፈተና ውስጥ ያህጐቢይ ሁም እግዜረን ጦቁስ በሎሙ፡፡ 41 ቦውት ኢረኒ ኡሙን ዬወሮውሪያሌያህ ቡኖም ደር ረቀም አሱመዶ፤ ቡንጉልቢሸትኒ ገበም ኢኩ ቲይብል ጡቀሶ 42 አበያይ ፈቀቴይ ፍቃድ በቀር ዬያይ ፈቀድ አይሁን፡፡ 43 ኡናምጊ የጠብቄያሌይ መለአክ ለሰማይ መጠም ታሪው፡፡ 44 ደልምኒ በጣም ተጨነቀም በኃይል ዬጡቅስ ነሮ ፉውሩምኒ የደሜይሁም በደቺ ጠብጠብ ዬብል ነሮ፡፡ 45 በጡቂሺሚ ነቀም የተመረሩኒ መጣም ቦውዘኖም የነቃ ኡኙም ተለ አገኚሙም ኢኩ በሎሙ ለምን ቱኞሁም? 46 የፈተና ውስጥ የህጐቢይሁም ኑቁመ ጦቁስ በሎሙ፡፡ 47 ኢየሱስም ኢኔይ ቲያወልህ ተለ ብዝ ሰብቻ ሞጡ ማሪምኖም በአሥረ ሆይት በተማረሩኒ ውስጥ ይሁደት ነሮ ይሁደሚ ሊይስሜይ ይያሱሰን ቀረቦ፡፡ 48 ኢየሱስሚ ይሁደ የሰበን በው በሰምን ተቲልፍም ቱበህ? በሌው፡፡ 49 ቲያሱስሚ በድ ዬኖሪይ ተመረሩኒ ቲሀን አለመሌይ ስናን ኡሩም ጐይተያይ በሴይፍ ለምጥኖም? ቦሉ፡፡ 50 ጴጥሮስሚ ቡኖም ውስጥ የሊቃ ክህኔይ አገልጋይ በሴይፍ መጠም የቀኝቴይ እዝን ቁጩ፡፡ 51 ኢየሱስ አሚ ኢሂይ ደጉ አያትፈጩ እደግ በሎ፤ የሰብቲቻሚ እዝን እንሸሺም በውደኒ አግረገቤው፡፡ 52 ቦውት ኢረኒ ኢየሱስን ሊይዙ የምጢ የክህነት አለቀቁዋ በቤተ መቅደስ ይዙዘሌይዋ የደብር ጀርሰሱሚ ኢኩ በሎሙ ኤያን ዩንበዴንሁም ሊቲዚኝ ሴይፍ ዱላ ኢንዙሁማም መጠሁም? 53 ቢሰጋይስ ተሀቱመ በቤተ መቅደስ በገርሂይጊ አልይዙሁሚኛም አልነሮ አሁ አሚ የሀቱም ጊዜዋ የጩልማይ ሥልጣን ጊዜው፡፡ 54 ቦውቱሚ ኢረኒ ሰብቻይ ኢየሱስን ኢንዘም ወሶዲም የሊቀ ክህነቴይ ገር አሞጢው፤ ጴጥሮስሚ ቦውት ረቀንም ዬህቲታሌይ ነሮ፡፡ 55 ሰብቻሚ በግቢይ ውስጥ ጂረ አቲንዘዙም በድ አውደ ተጉቡም ነሮ ፤ ጴጥሮስም መጣም ቱኖም በድ ተጉቢ፡፡ 56 ጴጥሮስሚ በጂረይሚን ተጉቢም ተለ ሀድ ገረድ ኤሪቴው የውቱነሚ ኦገን አጠረርትም ኢሪቴይም ‹‹ ኢሂሾ የሱስተ በድ ነሮ ›› ቦቴው፡፡ 57 ጴጥሮስሚ ‹‹ አሺ ሴት ኤየ አልችሌው ›› ቲይብል ከዴው፡፡ 58 ጢት በደለስ አሚ ሀድ ሊለ ሰብ አሚ ጴጥሮስን ኤሪይም አተሸ ቡኖም ውስጥ ሀዲኒው በሌው፡፡ ጴጥሮስ አሚ አተ ሰብ አንኩ ኤያው በሌው፡፡ 59 ያድ የሰዓተህ ደለሰም ሀድሚ ሊለ ሰብ ጴጥሮስን ኢሂይ ሰብ ገሊለዊኑ የምንቢነሁ፡፡ ቶውቱት በድ ነሮ በበኝት አጠበቃም አዋለሆ፡፡ 60 ጴጥሮስ አሚ አተ ሰብ ትብሌያለሄይ ሰብ አልችሌው በሎ፡፡ ኢሂኔይ ቲያወልህ ተለ ኡነምጊ ህንተቁይ ነቆ፡፡ 61 ኡናምጊ ጐይተያይ ኢየሱስ ተሸዋረም ጴጥሮስን ኢሪው፣ ጴጥሮስሚ ‹‹ አውጂ ህንተቅ ተይነቅ ሼሽተጊ ትክዴኛሆ በቡኝት ጐይታያይ ኢየሱስ የበሌይ ቃል ኢከሶ፡፡ 62 ዲደ ወጣም አመረረም በቺ፡፡ 63 ቦውትሚጊ ኢየሱስን ኢንዘም የኖሪይ ሰብቻ ዬቆሎድቢዋ ዬቅጦቅጢሚ ነሮ፡፡ 64 ኢፊተምኒ ቲሾፋኒ ማኑ የመጠሄይ? ነቢይ ለሀንህ ኢንዲ ቻል ዬብሊ ነሮ፡፡ 65 ብዝ ስናን ቲያዋሉህ ዬሶድቢ ነሮ፡፡ 66 በዚኚሚ የደብሪ ጀርሰሱም የክህነት አለቀቁዋ የሙሴይ የሕግ አሰተማረሩ በድ አውደ ተሰቦሶቡም ኢየሱስነሚ ዬሸንጉኖሚ አሞጢወ፡፡ 67 ኢኩሚ ቦሊው ኢንዲ ኤደን አተ መሲህ ነህ? 68 ኡትሚ አሚ ኢኩ በሎሙ፣ ቢሊዶሁም አቶሙኑ ጥያቄሚ ቢልትሰሎሁም አተጉሮጉቡኒኞ፣ 69 ዬሀን በቀር በሁ ዬጂምርም የሰብ በው በሁምነኒ ብግዜር ቀኝት ዬዝቦሎ፡፡ 70 ሁለምኖም በድ አውደ ‹‹ እሺ አተ ይግዜርነህ በው? ቦሊም ተሶሊው፡፡ ኡትሚ ኦ አቱሙም ዬበሚኜይሁም በሎሙ፡፡ 71 ኡኖሙሚ ‹‹ቤሂይ ያንደል ምን ምስክር የትፈጨነል? ዩህ በአፍኒ ዩጠይ ቃል ኢኛ ጋግምኛ ሰምነመ ቦሉ፡፡