1 አሁ አሚ አቱም ድመምቸ ! ኖሙ ሱሙ የሠቅቃል መከረ ሊይመጠፑመሌይ ኡ ቲትቡል ቡቹ፡፡ 2 ንብረቱም ሁሉምኒ ብሰበሰንም ተብለሺመ፤ ልበሸሙሜይ ብልን በሌይመ፡፡ 3 ወርቅሁሜይዋ ቀርሺሜይ ዘጋመ፣ ዝጋትሚ ምስከረን ዬሀንበሁማ፤ በሣረምሁም የጂረኒሁም ዬበሌይሎ፤ ሊነቹ የመጨረሸ ቀኒ ብዝ ንብረት ድለደልሁመማ፡፡ 4 ዬሁን በቀር ብርሰቱም ቲይኖጉ ለዎሊይ ብለተኛኙ ዋጋኖሚ ለልክፈልሁሜይ ዮህ ዩቀዋም ኡተ የሰማ፤ ማኸሬይ ዬስቦሶቡሜያሌይ አቶ ኃይሌ እግዜር ሰመመ፡፡ 5 ቦህሜቸትዋ በታስታ ቦንበር ሰብነቺሁሜይ ሎጐረት ዮቆሮቢ ስንጋ አዙሪሁማመ፤ 6 ጽድቄይ በዎርዴ ፈረቱመቢው፤ ቀቺውማ ኡትሚ አይትቀዋሞሁሞ፡፡ 7 ኡናንፑያያዎ ! ኢኩ በሀን ዬጉይተን ዩምጠት በፍረክ ቄሮ፤ አረሺ ዬቀደሜይዋ ያንጩይ ዝናብ ሊያገኝጊ ቲይፈርክ መልከመይ ዬደቺይ ፍሪ ዬቅረሎ፡፡ 8 አቱሙሚ ኢኩም ፉሮክ ፤ ዬጐይተኛይ ዮምጣት ጊዜ ለህቀረቤይ በተዌሸት ቆኑን፡፡ 9 ኡናንቸያይዋ በሃቱም ደር ያይትፈረዴይሁም ጋግ በጋግሁም አትጭቆጨቅ፤ ዩህ ፈረጂይ ዬመጠቢያሌይ ጊዜ ጂጂማ፡፡ 10 ኡናንቸያይ ! በጐይታ ስም ያዎሎሂይ ነቢያት መከረን ቦፍረክ ቦቄበለት ምሶሌ ዮሐናኖም ቾል፡፡ 11 አሚ ቦፍረክ ዮቆኖኒይ ‹‹ ዬትቦሮኩኖ ›› የብሉኖማ፤ ኢዩብ ኤይኩ ዬፈረኬያህም ለምሁመጣ፡፡ እግዜርሚ በመጨረሸ ዮሰነኒይ መልከመ ስናን ኢህመማ፤ ቤይሂሚ እግዜር ዬምረልዋ ደለልም ዮሐነኒ ኢሪህመማ፡፡ 12 ኡናንፑያይዋ ! በሁሉምኒ ቀደም በሰማይ ዎይም በደቺ ዎይም በሊለ በሀድም ስናን አትሞል፤ ወይሁሜይ ኦ ለሀን በብክሚ ኦ ዬሁኑ አይሀኑ ለሀን በብክሚ አይሀኑ ዬሁኑ፤ ኢኩ በልሀን አሚ ዬትፈረድ ፑመማ፡፡ 13 በሀቱመ ግት ችግር ዬጂጂቢ ሰብ ቢይነብር ዬጦቅሱ፤ ታስ ዩበሌይ ቢይነብር እግዜረን ቦወምስገን ዬዘምሩ፡፡ 14 በሀቱም ግት ዬቲደብ ሰብ ቢይነብር የቤተ ክርስቲያኒ ጀርሰሱ የጋገኒ ዬጥሩ፤ ኡኖሙሚ ዬቲደበሌይ በጐይታ ስም ዘይት ዩቅቢም ዩጦቁሱኒው፡፡ 15 ኢኮሌቸይ ዐይነት በእምነት ዬህምሠረት ጡቂሸ ህደበቴኛይ ያቲያል፤ ጐይተሚ በእደበትኒ የሰልጤይሎ፤ ዬሠሬይ ድርጐትሚ ቢይነብር ዬታደግኒነሎ፡፡ 16 ኢሂይ ለሀኔይ ሊቶዩ ድርጐቶሁም ገግ በጋግሁም ተኖዞዝ፤ ሀዲ ለዲ ዬጦቀሉ፤ የጸድቅ ሰብ ጡቂሸ ብዘን ውጤት የህጊኛል ጊደር ኃይል አሌው፡፡ 17 ኤያስ ይኛነሜይሁም ሰብ ነሮ፤ ዬሁኑ አሚ ዝናጭ ያይዘንቤይሁም በጡቀሴይ ጊዜ ለሼሸት ኢዱ ተደረት በደቺ ደር ሀደም ዝናብ አልዝነቦ፡፡ 18 አግረገበም በጠቀሴይጊ ሰማይ ዝናቤይ አቦ፣ ደቺሚ አግረገበም ፍሪ አቦ፡፡ 19 ኡናንፑያይ በሀቱም ሀቱም በብኪ ኡንጋ ቢዩጠምዎ ሊለይ የብክ ኡንጋ ቢያግረግቤይ፤ 20 ድርጐቴኛይ በሰሰቴይ ኡንጋ የግረግበል የድርጐቴኛይ ነፍስ በሞት ያሰልጤያሌይሁምዋ የብዝ ድርጐተምኒ እደጐት ያህጊኝኒ ያሌይሁም ዬቸሉ፡፡