1 ኦገን በቶኮ በጂጂን ኢረኒ ዬጂጂነቢይ ደሲት ማልታ የትበኛል ዩሐነኒ ቸልኖ፡፡ 2 ቤይሂይ በደሲት ዬኖቡረሌይ የሰደንቅናል ቶክነች ሶኑኖ ቦውትን ዝናቢ ለዘነቤይዋ ብርድ ለሀኔይ ጂረ ኦኖዶዱም ተቂቦሉኖ፤ 3 ጰውሎስ ቀጠጡ ሰበሰበም ዬጂረይ ኦገን ቲይጥል በሙቂቲ የነቅ ሀድ ጀዌ ወጠም ቢይንጂኒ ደር ተለጠፈም ተንዙረሮ፤ 4 የማልታይ ሰብቻ ጆዌ በጰውሎሲ ኢንጂ ተንዙረረም በሪይጊ ‹‹ ኢሂይ ሰብ በብክማ ነፍሰ ገደይኑ ማሓኛምኒ በባሕሪ ማዕበል በቶኮሚሁም ቢዩጥ በፍርዲ አምለክ አለምለጠም በነፍስ ሊይነበር አለቅተሎ ተቦቦኙ፡፡ 5 ጰውሎስሚ አሚ ጀዌይ ዬጀረይ ኦገን አረገፌይም ጠሌይምዋ ሀሀድ ጉደት ተያጂጂቢ ቀሪ፡፡ 6 ሰብቸሚ መቺማ ነፈኒ የብጠል ዋይም በድንገት ዬሙትም ዩድቀል በቡኝት ዬቁር ነሮ፡፡ ዬሁን አሚ ብዘጊ ተቆሩም ሀሀድ ጉደት ያልጂጂይቢይሁም በሪይጊ አሰበኖም ሺጐሩም ‹‹ ኢሂይ አምለክኑ ›› ቦሉ፡፡ 7 በነርነቢይ አውደ ለሚኑ የደሲቲ አስተደደሪ ዬፑፐልዩስተ ደቺ ነሮ፤ ኢሂይ ሰብ በጋርኒ ተቂበለናም ሼሽት ቀኒ በቶኮ ሁም አስተነገደኖ፡፡ 8 ቦውትጊ ዬፑፐልዩስ አበኒ ንደደትዋ ሸተን ኢንዜይም ቲደበም ኢኚም ነሮ፤ ጰውሎስ ዩውቱን ገበም እግዜረን ጡቀሰኒም ኢንጂኒ ጠነቢም አሰለጤው፡፡ 9 ኢሂይ በሀን ኢረኒ በደሲቲ ዬኖቡረሌይ ሊለምኖም ዬቲዶበል ሞጡም ሶሎጡ፡፡ 10 ሰብቻሚ ብዝ ስናን አሞጡኑነም ቦዋቡት ሀበጀኖሚ አሩኖ፤ በመርከቢ ሎሄደት በነቅኔይጊ የትፈጨነል ሁለምኒ በመርከቢ ደር ጦኑኖ፡፡ 11 ሼሸት ወር በማልታ በደለስኔይጊ ሕርሜይ በደሲቲ በቲለፌይ በእስክንድርያው መርከብ ተሰፈረነም ነቅኖ መርከቢ ዲዩስቆሮስ ዬትበኜይ የለኩይ አማልክት አርማ ነረቢው፡፡ 12 የሰረኩስ ከተማ ኦገን በጂጂኔይጊ በጂ ሼሽት ቀኒ ተጉቢኖ 13 ኢረኒ በባሕሪ ሒድናም ሬጊዩም ኦገን ጀጀኖ፤ በጂሚ ሀድ ቀኒ በቲለፍን ኢረኒ ዬገማይ ንፈሰ ለነፈሴይ በሆይቴኛይ ቀኒ ፐቲዩሉስ ሂድኖ፡፡ 14 ዩሞን ሰብቸ አገኚነምዋ ተኖም በድ ሰብት ቀኒ ሊልትጉብን ጡቆስኖ፤ ቦውቱሚ ኢረኒ ሮም ኦገን ሂድኖ፡፡ 15 በሮሚ ኦሉማል ዩሞን ሰብቸ ስለ ኢኛ በሶማይጊ እስከ ኦፍዩስ ገበያዋ ‹‹ ሼሽት ዩንድርቢያል ›› እስከሊይትበኛሌይ አውደ ድረስ ሊይቲቂቦሉን ሞጡ፤ ጰውሎስ ኡኖሙን በሪይጊ እግዜረን ቲያምስግን ተጥበበቆ፡፡ 16 ሮም ኦገን በገበኔይጊ ጰውሎስ ሀድ ዬቅሬያል ወተደር ተዋቤይምዋ አዴኒ ሊይነብር ተፈቀደኒው፡፡ 17 በሼሸት ቀኒ ኢረኒ ጰውሎስ በሮም ዬኖቡረሌይ የአይሁደዱይ ጊዲዲረ ሰብቸ አጢሮ፤ በሶቦሶቢይጊ ኢኩ በሎሙ፣ ‹‹ ኡነንቸያይ ›› በእሰረኤል ሕዝብ ደርዋ በአበቡኛይ ሥርዓት ደር ዬሰንሂ ሀድም በደል ኢሎ፤ ዬሁን በቀር ቢየሩሰሌም ተገድሁም ለሮማውያነኑ ተዋቡሁ፡፡ 18 ሮማዉያነኑይ በምሮሞሩሪኝ ኢረኒ በሞት ያቂጤኛል ማሓኛ ለለግኙቢኝ በነጸ ሊይጐፍሪኝ ኦሶቡም ነሮ፡፡ 19 አይሁደውያነኑይ አሚ ዬያኒይ በነጸ ዩገፈር በቆዋሚይጊ የቄሰር ኦገን ይግበኝ ለቡኝት ግድ ሀነቢኞ፤ ቢይሀሚ ሕዝባይ ዬከላላብያሎህ ስናን አልነሬኞ፡፡ 20 አሚ የጢሩሁሁሜይ ዬሪሁሚይሁምዋ ኢሂነቴይ ሊሊዶሁም ኤያ ቤይሂይ በሰንሰለት ዬተገቱቢይ ለእሰረኤል ለትዋቤይ ተዌሻት ማሓኛዉ፡፡ 21 ኡኖሙሚ ኢኩ ቲይቡል አግሮጐብኒው፣ በይሁድ ደብር ስለሀት ጉደይ ዬጸፍ ደብደቤ አልጂጂኖ፤ ይጂ በሞጢይ ሀድምኒ ስለሀት በድ የዋር ዋይም ያወለህ ኢሎ፡፡ 22 አተ ቲቲታለለሄይ የሃይማኖት ክፍል ቢሳ አውደ አውደ ሰብቸቹ ዬቆዎሚያሌይሁም ዬችልነና፤ ኢሂይ ለሀኔይ የሀቴ ሐሰብ ምን ዬሀኔይሁም ዩስምተን ዬፈጭና፡፡ 23 ቀኒ በቆጦርኒ ኢረኒ ብዝ ሆኑም ዬነብርቢያሌይ ገር ሞጡ፤ ኡትሚ በቅለት እስከ ሚሺት ስለ እግዜር መንግሥት ቦምስከር ሀሰበኒ ገለጠኖሙ፤ በሙሴሚ ሕገዋ በነቢያቲ መጸሕፍት ቲይጠቅስኖም ስለ ኢየሱስሚ ኢዶሙ፡፡ 24 የወለሄይይ ቃል ኦሞኑ፤ ሊለኖም አማ አሉሞኑ፡፡ 25 ገግበገግኖም ተይትስሞሙ ተቢቶኑ፡፡ ጰውሎስ በመጨረሸይጉ ቲያወልህ ኢኩ በሎ፡፡ ‹‹ መንፈስ ቅዱስ በነቢዩ በኢሰያሲ ኦገን ለአበቡኛይ የወለሄይይ ልክነሮ፤ 26 የዋለሄይሚ ቃል ኢቴው ይሂኔይ ሕዝብ ህድም ዩስምቴይ ቱሶሙኖሁም ዬሁን በቀር በቀልብ አቲንዙ፤ ዩረቲይ ቱሩኖሞ ዬሁን በቀር በደልሁም አትምሎሆቱ በሎሙ፡፡ 27 ማሓኛምኒ ይነቹን የሰብቸ በደል ጠበቀማ፤ እዝምኖም ተደፈነማ፤ ኢንምኖም ተጊሺማ፤ ኢኩ በይሀኒ ቢኖም ዬሩኑም ብዝኖም ዬሶሙኑም በደልኖም ይንዙኑም ዬያን ኦገን ቦግረገብኖም ያሰልጦም ነርሁ፡፡ 28 በሀን ይግዜሪ ዬቶክነቺኒ መለሂት ለአረማውያን ዬትለሄይሁም ችል፤ ኡኖሙሚ ዬሁን ዬቡሉም ዬቂቦሊሎ፤ 29 30 ጰውሎስ በክረይ ገር ሆይተን ኢዱ ሙሊ ተጉቢ፤ ዩውቱን ኦገን ዬሞጠሌይ ሰብቸ ሁልምኖም ዬቂቦሉን ነሮ፤ 31 መንግሥት ቦስበክ ስለ ጐይተኛይ ኢየሱስ ክርስቶስ ሀድምኒ ታይሀትሬይ ተይፈር ያትምር ነሮ፡፡