1 የአይሁዲ ፋሲካ ባለፍ በሃምሳኛይ አያም ቢይትወገረል በጴንጤቆስጤ ባል ተማረሩኒ ሁልምኖም በድ አውደ ሆኑም በሃድ አውደ ጭም ቦሉም ኖሩ፡፡ 2 ታይታሰብ ሀዱ የሀንቡረዩሁም ያለ ንፋስ የመስላል ቃል ለሰማይ መጣ፤ የኖርቢሚ ጋር ሞላዩው፡፡ 3 ገለላ የምሱላል እረመት ተሪሙው፤ ተሶሶዱም በሁልምኖም ደር ዎዶቅቦሙው፤ 4 ሁልምኖም በመንፋስ ቅዱስ ተምሉ፤ መንፈስ ቅዱስሚቀ ያዋልሂያለሁም በቦሙይ ቻሉቺ ልክ በሊላምኖም አፍ የወወለህ ጂምሩ፡፡ 5 በዓለም ቦሊ ደብርቸ በሁልምኒ የምጡ ክርስቲያን አይሁደዱ በኢየሩሳሌም የኖቡር ናሮ፡፡ 6 ኢሂነሚ ቃል በሶሚይጊ ብዝ ሰብቸ ጭም ቦሉ፤ ብስ አፍምኖም ቲያዎሉህ ለሶሙሚይ ተዶኖቁ፡፡ 7 ቦገረምዋ ቦደነቅ ኢኩ ቦሉ፣ ‹‹ ኢናቹ እኩ ያወሉሃል እንኩ የገሊላ ሰብቸ? 8 አይኩንካ ኢኛ በጪኚነቢ ደብር አፍ ቲያወሉህ የሰሙኖማሌይ ? 9 በጰርቴ፣ በሜድ፣ በዔላም፣ በመስጴጦምያ በይሁደ፣ በቀጶደቅያ፣ በጰንጦስ፣ በኢሲያ፣ 10 በጵንፋልያ ፣ በግብፅ፣ በቃሬና፣ ለሚን ቦሊይ በሊቢያ አውረጀጁ የነብርነሎ፤ በሮማሚ የመጣን አይሁደዱ የአይሁድነትን ቲልገባን የትረሀብሎ፤ 11 ኢኩመ የቀርጤስወ የዓረብ ሰብቸ የትሮሆቢና፤ ዩህ ኢናቹ ሁልምኖም የእግዜርነተ ጊዲር በል ብሰ አፍኛይ ቲያወሉህ የሰምነሎ፣ 12 ለሃኔዩ ሁልምኖም ተጐሮሙምወ የብሊሚያል ቆቦጡም ‹‹ ኢሂይ ሥናን ምናን የሃን ›› ተቦቦኙ፡፡ 13 ሃደድኖም አህሚ ‹‹ ወይረን የወይኒ ሥኸር ሶቹም ሶሆር መሎ፣ ቲይቡል የቆሉድቦሙሎ፡፡ 14 ኡትነጊ ጴጥሮስ ተአሥረ ሃዲ ባድ ቀነነም ቃለኒ አገደረም ለእመቲይ እኩ ቲይብል አወለሆ፣ ‹‹ አቱም የይሁደ ደብር ሰብቸወ በኢየሩሳፀለም የኖቡረል ሁልምኖም ኢሂኔይ የሃኔይ ሥናን ሎቻል ወይሁወይ አቅኖቡ፤ 15 በቅላቲይ ገና ሼሽት ሰዓት ለሃኔዩ አቱም ያሰብሁሚይ ሁዴ ኢናቹ ሰብቻ አልሱሆሩ፡፡ 16 የሁን በቀረኒ ኢሂይ የሃኔዩ ነቢዩ ኢዩኤልተ ኢኩ ቲይብል ያወለሄዩ ቃል ሊይሃኑ፡፡ 17 እግዜር በመጨረሻይ አያም ኢኩን የሃነ የብልና፣መንፈሳይ በሰብ በሁልምኒ ደር የሁድናሁ፤ ኦባችወ፣ ጐልማሳሱሙምሄይ ረዕየን የሮሎ፣ ጀርሳሱሙሁሜይ ብርዝዘን የብሮዙዞሎ፡፡ 18 ኢኩመ ቢናቹ አያምቻ በኦባችወ በባልቱቸ አገልገያዩወይ ደር መንፈሳይ የሁደሁ፤ኢኖሙሚ ለቀደምን ያል ሥናን ያዎሉሆ፣ 19 ለደር በሰማይ ድንቀን ሥናንቸ ለወሰጥሚ በደቺ ታምረን ያረሁ፤ ደምወ ጄረ የተንሚ ትነት የትረሎ፡፡ 20 ጊደርወ የገርማል የእግዜር አያም ቦምጣትኒ ቀደም አሪት የጪልምነሎ፤ ጢርቃሚ ደመን የመሰለሎ፡፡ 21 የእግዜርነሚ ስም የጦረል የሶልጡኖሉ፡፡ 22 የእሥረኤል ሰብቸ፣ ኢሂኔይ ቃል አቅኖቡ፤ አቱም ተችሊማለሁም የናዝሬቲይ ኢየሱስ በእግዜር ለሚን ለሃቱም የትገለጥ መለኮታዊን ሥልጣን ያሌዩው፤ ኢሂሚ በውትት መህኛ እግዜር ታምርወ ድንቅ ሥናንቸ መልሀተሚ ሁለምኒ በሃቱም ቀደም ቦሳኒ ተርጋገጠማ፡፡ 23 ሰብ እግዜር አቀደመንም ባቀዴዩወ በቻሌዩ አሰራርኒ ፋለኪ ለሃቱም አለፋም ተወበማ፣ አቱም በአነጀጁ ኢንጂ ሊይትሰቀል ወ ሊይሙት ሳንሁሚው፡፡ 24 እግዜር አህሚ የምተን ኃይል አጠፋም በምት አነቄዩው፤ መህኛምኒ ምትዩ ሊይንዜይም ሊያት ቂሬይ አለቅተሎ፡፡ 25 ስለ ኡት ኡኩን የብላ፣ እግዜረን ሁለምጊ ለቀደምናይ የሬዩሎሁ፣ ቴያሚ ባድ ላሌዩይ አልትነወጡ፣ 26 ኢሂይ ለሃኔዩኒ ደለይ ተስ ባሌዩው፤ አፍሚያ በተስታ ተምላ፤ኢኩመ የሙታል በሠረይ በተዌሻት የነብረሎ፣ 27 መህኛምኒ ንፊሳይ በምት ዓለም አታድጌዩው፤ ቅዱስምሄይ በቀብር ሊፋርስም ሊይቀር አትስኔዩው፡፡ 28 የሕይወተሚ ኡንጋ አቻልሄኞ፤ ተኤያሚ በድ ቦሃንህ ተስታይ ፍፁመን የሃነሎ፡፡ 29 ‹‹ እናንቸይ፣ በቀደም አበቡኛይ ሃዲዩ የሃኔ ደዊት የሙቴዩሁምዋ የትቀበሬዩሁም፣ ቀብርምኒ አዉጂነኒ ድረስ ቢኞ ለሚን ያሌዩሁም በግልጥ ሊሊድኖሁም ያቀትልነነ፡፡ 30 በቀረኒ ደዊት ኢሂኔዩ የወለሄድ፣ ነቢይን ለናሬዩወ እግዜርሚ በዘሪሄይ ሃዴይ በዙፋንንህ ደር ያትጉቤዩሎሁ ቲይብል ቦማል ያወቤይ የተዌሻት ቃል የችል ለናሬዩው፣ 31 ቢሂይ መህኛ መሲህ በሲኦል ያይቀሬዩሁምዋ በሰርምኒ በቀብር ያይፋርሴዩሁም ዩንቅተኒ አወለሆ፡፡ 32 ኢሄኔይ ኢየሱስን እግዜር በምት ያነቄዩሁም፣ ኢኛ ሁልምኛይ ሊሂይ ሥናን ምስክርነኑ፡፡ 33 ቢሂቴይ ኡት በእግዜር ቀኝት በክብር ቦጐባትኒወ በአብሚ የትወቤዩ ተዌሻት መንፋስ ቅዱሰን ቦቄበለትኒ፣ ኢሂኔይ ተሪያለሁምወ ተሶሚያለሁም ሁዴዩው ፣ 34 ሰማይ የወጣይ ደዊት ላልሃኔዩ ደዊት ገግምኒ ኢኩ ቲይብል አወለሀማ፣ 35 እግዜር ጐይታይ (ለመሲሂይ) ጥለኛሄይ በሥልጣን ወስጠኒ ሊልስነሀጊ በቀኝታይ ተጐበ ባሌዩማ፡፡ 36 ‹‹ ዩካ ኢሂኔዩ አቱም የሰቀልሁሚይ ኢየሱስን እግዜር ጐይታወ መሲህ የሳኔዩሁም የእሥራኤል እመት ሁልኑ ቦገኒ የቻሉ ›› 37 ሰብቸሚ ኢሂኔዩ በሶሚዩጊ ደልኖም በሐዘን ተነካም ጴቅሮስንወ ሊለነኖም መልህተኛኙ ‹‹ እናንቸይ ፣ አሁ ምናን የሥንነል ? ቦሉሙው፡፡ 38 ኡኩ ባሎሙው፣ ‹‹ ንስሓ ጉቡ፣ ድርጐትሁሜይ የታደግኑሁማለሁም፣ ሁልሁሙም በኢየሱስ ክርስቶስ ሥም ተጦምቅ፤ የእግዜርነሚ ስጦት የሃኔዬ መንፈስ ቅዱሰን ተቂቦሉኖሁም፤ 39 መህኛምኒ የተዌሻት ቃል ለሃቱምወ ለቢያቻሁሜይ ጐይታኛወ አምላክኛ የውትን ሊይጠሮማል ቡሩቅሚ ሎሊይ ለሁልምኖሚው፡፡ 40 በብዝ ቃል ቲይምሰክር ‹‹ ቢሂይ ጠማማ ትውልድ ደር ቢይመጣሌይ ቅጣት ገገሁም አሰሉጥ ›› በቡኝት መሐሮሙው፡፡ 41 ብዝኖም ቃለኒ ሶሙም ተጦምቁ፤ በውት አያም ሼሸት ሺ የሆናል አማኞኙ ተዶቦሉ፡፡ 42 ኢኖሙሚ የመለህተኛኙኒ ትምርት ቦስምት፣ በእነቺ ባድ ቦንበር፣ ጣቤታሚ ቦቅረስወ እግዜረን በጡቂሻ የጦቡቅ ናሮ፡፡ 43 በውትጊ በመልህተኛኙይ ኢንጂ ብዝ ታምርወ የደንቃል ሥናን የሱን ለናሬዩው፤ በሁልምኖም ደር ዮፋርት አንደረቦሙው፡፡ 44 አማኛኙሚ ሁልምኖም በሃድን አውድ የኖቡር ናሮ፣ ያለሙሚ ሥናን ሁልምኒ በድን አውደ ናሮ፡፡ 45 ደቺኖምዋ ንብረትኖም ቲዩጩጉር ቀርሺ ለሁልምኒ ያትፋጮማለሁም የሱድ ናሮ፡፡ 46 ብስ አያምኒ በቤተ መቅደሰን ባድ ጭም የቡል ናሮ፣ በጋርምኖም ጣቤታ ቲይቆሩስ በተሰተወ በቤይዛ የቦሉ ናሮ 47 እግዜርነሚ ያምሰጉኑን ናሮ፤ ሰብሚ ሁልምኒ ያሀብዶሙን ናሮ፤ እግዜርሚ የሶሎጢይ ሰብቸ ብሰ አያምኒ የማበረኖሚ የደብል ናሮ፡፡