9
1
ክርስቶስካ ዳንቴ ጎንዼና እጌያይ፣ እንታ ፖግምማሞ፤ እሳ ዎይላምኖ ባርያሳ ኡስንካ ሃማንቴ ማኚ ማታንቴ እናንቴ ጌይቴና ኮዶ።
2
እልሊ ጃይንቶ ጌጲቤ ቃቦ ቱንሲ ቆልማቤ እሳ ዎይላምሮ ዳይዲና።
3
ኤና እሳ ኤዳና ኣባ ናናናንቴ ሃማንቴ እንታ ኤዲ ኣሻዻዳ፣ ክርስቶስካላ ቡላንቴ ዻባዻዳ ዳናንቴ ዛግቴና እዶ፤
4
ኬ እስራኤል ዛርሲና፤ ናሶ ዳዻይኖቤ፣ባርያሳ ጎሺንቤ፣ ባርያ ኣሽንሻንቴ ኣፓ ክጌያዳቤ፣ ዳምቢን ቻይንቶንቤ፣ ባርዮን ኦኖንሳ ግሎንቤ፣ ኣፓ ይንዛራ ቃሞን ቁንፃዻዳቤ ኬንቲና።
5
እምባናኻሞ ኬንቲና፣ ክርስቶስሳ ኣዽማን ብዛን ኮሳ ፓይዳዽድኖ ኬባራና፤ ኖኻሞ፣ ውልሳ ጳባራን ዳ ባርያ ላይን ጎሽንቴን ዳዻዳና
ኣሜን።
6
ኮዶን ኦጎኖ ባርያሳ ኣፖን ሽእሻዽዲና ትማሞ፤ እስራኤልና ግዶር ኤና ኣዻዻዳና ፓይላ እስራኤል ኤዲ ትማሞ።
7
ኣብራሃም ብዛሮኻ ኬዶንታኻ ኬ ፓይላ ኣብራሃም ናና ትማሞ፣ ይያማን “ቢዛን ሃሳ ይሳሃቅካና ግስንዻይ” ሃማንቴ ጌይዻዳግያና።
8
ኦጎኖ ኤና ባርያ ናና ሃማንቴ ግስንዻይና ኣብራሃም ዋንካ ይኣዻዻዳና ትማሞ፤ ኮዶን ኣብራሃም ናና ሃንዻይና ኣፓ ይንዛራ ቃሞን ቁንፃዻዳ ናናና።
9
“ዋዳስ ጌይዻዳኻ ማታቴ ናኣና እናኣይ፤ ሳራኻሞ ኣንጌ ናሶ ኣዻና ኮኣዻይ” ሃማያ ኣፖ ይንዛራ ቃሞ ቁንፃዻያ እማዻዶንታኻና።
10
ኣጋ ሶጎ ትማሞ ርብቃ ናናሳ እምባ ካላና፤ኖኻሞ ዎምባ ይሳቅና።
11
ናና ማንትናም ኣኻራ ኣዻዽማ፣ ዎይካሞ ዋድማ ፃልቤ ዛርቦቤ ኬኣሽክማ፣ ባርያ ቃባ ይንካ ይካማዳ ጎንዼ ክማቴኻናንቴ፣
12
ዋድማኻ ጋራንቴ ኤያ ባርያ ግስማዳባራ ኮዶንታኻ፣ “እሽማ ካናስናንቴ ዋድና ክዋድማይ’ ሃማንቴ ኮናንቴ ጌይዽዲና።
13
ኣጋኻሞ “ያዕቆብም እንታ ናሽዲና፣ ኮዶን ዔሳም እንታ ቶዛዽዲና” ሃማንቴ ኡካዻዳግያና።
14
ታ ናንሲ ሃር ዎያሜ? ባርያ ኤዲ ካላዛራ ዎዻው ክዎዻይ? ካላኻሞ ዎዽማሞ!
15
ባርያ ሙሴግያ፣
“ኤያ ይንናንቴ ፃላሞን እዻዋያናንቴ እሳ ፃላሞን ዻዋና እዻዋይ፤
ኤያ ይንናንቴ እቡርቃዻያናንቴኻሞ ቡርቃዻና እቡርቃዻይ” ክያማዶንታኻና።
16
ታ ናንሲ ኦጎኖ ኤና ይዛጋዳግያ ዎይካሞ ዋድማባራኻ ትማሞ፣ ባርያሳ ፃላሞንካ ሃማንቴና።
17
ባሪያሳ ዋርቃትኖ ፈርዖንግያ፣ “ካንታን እሳም ሃንካ ሃማንቴ ሃፓዼኻናንቴ፣ ናብን እሳም ፔሮ ጌይዼኻናንቴ ኣጋናንቴ እንታ ሃም ዻስዲና’ ና ኮያማይ።
18
ኣጋታኻ ባርያ ኤያ ይንናንቴ ፃላሞን ይሳም ዻዋናንቴ ይዛጋያናንቴ ዻዋና ክዻዋይ፤ ኤያ ይንሳ ዎይላምን ሹፓናንቴ ይዛጋያሳ ዎይላምን ሹፓና ክሹፓይ።
19
ዬግዶር ኤዲ ካላ፣ “ታ ኦጎንታ ክዳና፣ ካውል ባርያ ዎዛራ ሃርናንቴ ክዋጭሜ? ክሳ ቃቦን ማራናንቴ ኤድ ቻላያ ዳይዲው?” ኬዳ ኤድ ሃማያ ዳናክዳይ።
20
ኮዶን ባርያዛራ ኣፖ ማሳያ ያ ሃውቴ? “ዋድማኖ ኤያ ኮም ኣሽካግያ ‘ኮንታ ሃርናንቴ ኢም ሃኣሽካዴ?’ ሃማው ኮያማይ?”
21
ኤያ ዳን ኣሽካያ ዱኒንሣ ባኻላም ዬር ጎሻዻዳናንቴ ዋኒም ሱን ዬርናንቴ ኣሽካናንቴ ክሳ ጌዻሞ ቆላዮው?
22
ባርያ ይሳ ዋጭንቤ ካንታንካንቤም ዻዋናንቴ፣ ኤና ይንዛራ ዋጭሜኻናንቴ ዛግሳይናም፣ ካይዮናንቴ ዳናናንቴ ክዶንሻዳናይ!
23
ኣና ብርካ ኤና ጎሽንናንቴ ክካማዳና፣ ይሳ ፃላሞን ይንዛራ ይዻዋይናናንቴ ክሳ ጎሺንሳ ዎዲማሞ ዼሳዼኻናንቴ ኤ ኮም ሃይቴ ክዳናይ?
24
ኖ ክስማዶኖ ኣይሁድ ኤናም ሶጎትማሞ፤ ዎምካሞ ቶርስን ኤናም ካውልሞ ክግስማዶኖ?
25
ሆሴእ ዋቃትሮ ይንታ ሃማንቴ ክጌይዻዳግያ፦
“ዛርስን እኖን ዳድሞንም፣ ‘ዛርስኖ እኖ’ ሃማንቴ ግስማና እግስማይ፤
ናሻዻድሞንካሞ ‘ናሻዻዶኖ’ ሃማንቴ ግስማና እግስማይ።
26
ሃያንቴኻሞ፣ “ ‘ዬቲ ዛርሲ እንቲ’ ትማሞ፣
ሃማንቴ ኬናንቴ ራቃ ጌይዻዳ ኣጋሮ፣
‘ባርያ ላይን ዳሳ ናና’ ሃማንቴና
ኬም ግስንዻይ።
27
ኢስያስካሞ እስራኤል ኤናናንቴ ይንታ ሃማንቴ ክእላታይ፦
“እስራኤል ናና ሻምን ባይን ኣፖሮን ዶንግያ ጵፅ ኬዶንካሞ፤
ኬግዶር ኤና ዻቃይና ቄታ ሶጎና።
28
ኦጎኖኻሞ ጌጳ ፔንዛራ ብቶንም ካሎን
ቱንሢ ይሪካ ታኻና ክታኻይ።
29
ኣጎኖኻ ኣና ብራንቴ ኢሳያስ፤
“ዎታዳርናሳ ጌጳ እኒ ዎናንቴ ኤዲ ክሺእሻዲምና፤
እኒ ሶዶም ጋንታግያና ዎዳይ፤
ገሞራምና ዎታኻይ” ሃማንቴ ክጌያዳግያና።
30
ታ ናንሲ ሃር ዎያሜ? ጋዛሞን ጫጋዲምና ቶርስና ጋዛሞን ሃፕዲና፤ ጋዛሞኖ ኦጎኖ እምነትንካ ሃፓዻይኖና፣
31
ኮዶን ጋዛሞን ዳምብን ጫጋይና እስራኤልና ጋዛሞን ኮም ሃፓዲማሞ።
32
ኮኖ ይንታ ሃርናንቴ ኮያማዴ? እምነትንካ ጫጋዻን ጋራንቴ ዋዲማን ጎይንካ ኬጫጋዶንታኻና፤ ኬኻሞ “ሱና ጁንፓያዛራ” ጁንፕማንቴ ድንዲና።
33
ኣጋኻሞ፣
“ሼድማቴ፣ ኤና ኬጁምፕሜናንቴ ሃያያ ሱኒ፣
ኬዲኔኻናንቴ ሃያያ ላይታ፣
ፅዮን ግዶር ዎዳና እዎዳይ፤ ክንካ ኤያ ኣምናያ ቦክንማጲሞ”
ሃማንቴ ኡካዻዳግያና።