¹ ዮራ ዩሪካ ሀማን ናንቴ ዳም ዩስ ዋድማን ኤና ናንቴ ኬጳዌሀ ናንቴ የሱስ ክርስቶስሳ ዮራ ቤሬ ብራ ዛራ ሀማንዳ ሀይማ አፓ ካና፣ የሱስ ካም ዩስ ኤርጎን ኤያም ዩሳ ዋድ ኤያ ዮሐንስ ናቴ ጳውድና፤ ² ኖሀሞ ባርያስ አፓን የሱስ ክርስቶስሳ አፓንቤ ዮርን ዩያፓዶን ፓይለ ጌይድና፡፡ ³ ሮሮኖ ዮስክድና፣ ታ ናንሲ አፓ ካ ቤሬ ብራ ዘራ ሀማንዳ ኤያ ናባባያ ኤያ ጎሽጰና ኤና ኤሳራይናቤ ዋርቃትን ጻፋጶን አፓንስ ዳይና ኤሸጰናና፡፡ ⁴ ጌሶቤ ጎሽቤ ዮሐንስባራ፣ ፔን እስያ ግዶር ዳና ናንቴ ፃርዩን ኦኖና ሶጳና ናንቴ፣ ዳቤ፣ ዳዳቤ ናአናንዳ ባርያሳ ጌጳሞን ቦኮቶንሳ ዎት ዳና ባርያሳ ኡስና ሶጳና ባራ፣ ⁵ ኘርካሞ ባርያሳ ጎንጳ ማኛ፣ ዴን ጵንባራ ብራንቴ ጳጳዳ ኤና ፔሮዳና ጌጵናስ ብታ ዳዳ የሱስ ክርስቶስ ባራ ኬልሾንቤ ፃላሞን ዮናንቴ ኮዴ፡፡ ዎም ናሻዳቤ ሴሶን ባራ ዎም ዞንጶን ሽያዳ፣ ⁶ ክስ ጌጳቤ አምባቤ ናንቴ ዎዋድሜሀ ዛረስ ጌጵቤ ዩናንቴ ዎም ሀያዳ፣ ክናንቴ ጎሽቤ ካንታቤ ላይህ ቱንሲ ቆልዛራ ኮደ! አሜን፡፡ ⁷ ታ ኖ ሉፕንካ ሀማንቴ ናአና ክናአይ፤ ኤና ኪም ቶዛጰና ፓይላ፣ ኤድስ አፒ ውል ፓይ ኪም ሀፓና ኮሀፓይ፣ ኤና ፔሮ ዳና ክንካ ሀማንቴ ዉ ዉ ይንታና ኬያማይ፡፡ ዩኒ! ዮሮ ኦጎኖ ፓይለ ጎንጴ ማታና ኮማታይ፣ አሜን፡፡ ⁸ "ዳቤ ዳዳቤ፣ ናአያሀሞ ዮር ውልም ቻላያ ጌጳ ባሪያ፣ ብራሮ ዳቤ ቱንስሮ ዳቤ እንታና" ዩንታና ክያማይ፡፡ ⁹ እንታ ዮንዳ ናሳ ዩሐንስ ዮማላ ክን የሱስ ማላ ክሳ ጋሎንቤ፣ ክሳ ጌጳሞን ሞሮን ናንቴ ጋሎን ደንሽቴዳ ባሪያሳ አፓን ናንቴቤ የሱስካ ማኝ ማታናንቴ ራቃ ፔያሳ ኑንቆን ግዶሮ ዳ ፍጥሞ ግዶርና እይ፡፡ ¹⁰ ሮራ ኡስን ቻጳያ ጋላ እንታ ባርያም ምሥክቴና እዶ፣ እሳ ዘሎ ባራ ዮር ጡረንቦ ግያ ሀማ ኤሳርምድና ¹¹ አፓ አጋ እግያ "ዮርን ሀሀፓይን ኦጎም ዋርቃት ግዶ ኡካንቴ ፔና ኦፌሶን፣ ሰርምኔስ፣ ጴርጋሞን፣ ትያጥሮን፣ ሰርዴስ፣ ፊላድልፍያ ቤ ሎዶቅያ ግዶ ዳና ባርዩን ኤና ናቴ ዩ እስማ" ሀምድና እግያ፡፡ ¹² እንታሀሞ አፓ እናንቴ ክጌያያም ሼዳናንቴ ሽር እያምና ወርቄንካ አሽካ ኖን ዩንግዶር ዩሮጳይና መቅረዝና ሶጵናም ሀፕድና እንተ፣ ¹³ መቅረዝና ኖን ጋይናሳ ግዶሮ "ኤድ ናሶም ታሀዳ" ኤያም እንታ ሀፕድና፣ ኖሀሞ ጳ ቻንቴ ቾ ራን ዛራ አፓላ ሉም አርሳዳና ዩሳ ሳዳሮሞ ወርቄን ካ ዳና ኖ፡፡ ¹⁴ ክስ ሜቴንቤ ስትንቤ እያቲስት ጫውሊ ግያ ሽክኒ ዶቦ ዶማዲ ግያና ኮዶ፣ አጥ ኖሀሞ ክሳ ኖ ሮጵና ግያና ኮደ፡፡ ¹⁵ ክሳ ራኖ ሀሞ ዛዊ ኖሮ ዎዳጳግና ኮዛዋይ፣ ክሳ ጴላቅኖሀሞ ሚሮሳ እርጎ ግያና ኮደ፡፡ ¹⁶ ዩሳ አና ዋር ካታባራ ኤዝን ጳጳ ዮዳንቴና ክዶ፣ ክሳ አፓን ባራ ሀልፓ ውል ባራ ጫርሻጳና ኡታይኖ ዎትኖክስ ፓይላ ሀዩ ግያና ኮሮጳይ፡፡ ¹⁷ እንታሀሞ ኪም ሀፓንቴ ጃዳግያ ማታንቴ ክሳ ራሮ አንታ ጳርዕድና፡፡ ኖሀሞ ዩሳ አና ዋርካታስም እዛራ ዎዳንቴ ዩንታና እግያ ክያማዶ፣ "ሀኩርትንጵናኖለ ብረሮ ዳሀሞ ቱንስሮ ዳሀሞ እንታና፣ ¹⁸ እንታ ላይህን ዳና ብራንቴ እንታ ጃይድና ታ እንታ ታ ቻንቴ ላይህ ቱንሲ ቆልማ ዛራ ላይህና እዶ ዴንጴንቤ ዴንጵ ኦሎንሳ ቁልፍኖ ቡላይ እሳ አንሮና ኮደ፡፡ ¹⁹ አጋታሀ ሀሀፓዶን ታ ሀማናቴ ደንቤ ቤሬ ብራ ዛራ ሀማናንቴ ዶንም ዋርቃት ግዶር አኩማ፡፡ ²⁰ እሳ አና ዋርካታ ግዶ ሀሀፓዳና ኤዝና ሶጳናቤ ዮራ መቅረዝና ሶጳና ወርቄን ጋይና ኖን ዩንዛራ ዮጳጳይናሳ ቱርምኖ ዩንታን ኤዝና ሶጳና ባርዮን ኦኖና ሶጳናሳ ባርያሳ ኤርጎን ኤናና እገግ፣ መቅረዝና ሶጳና ኖን ዩንዛራ ዮሳጳይና እግና ጥር ባርዩን ኦኖና ሶጰናና፡፡