1 .ሰንበር ደኮሰነኻ ማርያም መግደላዊትዲ ማርያም ያዕቆብር ገናዲ ሰሎሜዲ፡ፈርኖ ኒግናደትሲ ሸመትድኖ ይኖ ዕጥር ጅቢኒዅ። 2 .ጉራብኖኻ ጃበራ ግርጋ እውናርዲትል፡ኳራ ፍሩ አርብል ፈርኑዅ። 3 ፈሩኑኻ ናሹር ናሹ “እንክርጘሳ እን ጎቊ አብልድ አውኒ ያዕይሮልና” ይስትጙኑ እርግኑዅ። 4 እንክርጛኻ እምንድክ በሄር እርጉዅ። 5 .ፈጠንኖ መኸልትኖሰናኻ እን ክርጛ ገለበስቶ ህንባዅሲ ቋልኑዅ። 6 .ኤርብል ትውኖሰናኻ ቊራ መንደላይ ታኲን ብልታውረው ሰራዅ ኒላው ገፍድ ከፍዮ፡ህንባዅሲ ቋልኑዅ፡እማ በኸኽርኑዅ። 7 .ኒኻ “አርጋ በኸኽርጋ እንትን እን፡የሱስ ናዝሬትሩዅ ከርከርሳዅሲ ጀረብደናኽር ግን እማ ነት እላኒ፡ጒዅ እነሐን እን ኒ ደብተ እርጋ አካንሲ ቋላ።ፈርድኖ ኒታለይቶትዲ ቤጥሮስዲት ገሊላትል፡በደርዶኩም ግን ኒል እን ኒዮኩም እርጋዅድሰና፡ቋልትኖሉ ግን፡ይድኖ ድዋ” ይኹለን። 8 .ናዋ ታንቲነኽር በኸኽርኖኽር ወለይድኖ ፍኖ እግርኑዅ።ጓቊትኖ እርግነዲጛ ላዅድ፡ድዊኒ። 9 ኢየሱስ ጐ ገሪውድ ቋልስተት ኢየሱሳ ጐሰና ጃበሪ ግርጋ እውናርዲትል በደሮ፡እንለጘታ መጃኒን፡ፍዶላ እርገሪት ማርያም መግደላዊርሲ ቋልስቱዅ። 10 .ንርኻ ፈርዶ እን ኒዲ እርገው ቊርቊርተውድኽር፡ስረውድኽር፡ድዊቲሎም። 11 ናዋ ጐትር ንርድ ቋልስተትላኽር እምንኒላ። 12 .ንድ ደምቢ ለጛ ናልድ ኮል አኽታሲክ ፈሩኑ ጉግሊ አሪ ገሽድ ቋልስትዅሎም። 13 .ነጛ ደንቢራ ወንተርኖ እንደድ ድዊኒዅሎም።ናዋ ነስር እምንኒሎም። 14 .ደንጎበድ እንሽካ ላዅድ ምድሊ ዓገልኖ ዋኑኑ ቋልስትዅሎም፡እማ እን ጌ ቋልንዅንሉ የውድሰና አምና ብነድ ናለፈካ ተብድ ዋኺትኹሎም። ታለይቶትሲ እንሻቀትሎም 15 .ንድ ደምቢ ኢየሱስ ፈራ ብርጃርልክ ናትክ መሃርዳ ወንጌልሲ በሸርዳ። 16 .እን እምናዅዲ ጠመቅሳዅዲ ደኤንዶ ግን።እን እምንጋዃ ድድሮ ግን። 17 .እን እምነውድ እና አምራት ነን ተለይሮሎም ግን፡ይስጙድ ሸዋጢንሲ ፍድኖ ግን ሓዳይስ ጋብድ ጋቢድኖ ግን፡ምራውሲ ሻኽድኖ ግን፡ 18 .ይኸ ሕምጥ ጀኤነጝር ላሪ አደየለሎም።ሽዅሽተውሊ ናንትትሲ ናዳግ ገምዲነክ እቢስድኖሎም ግን ይኹሎም። 19 .ይና አደራ ኢየሱስ ነዋ ዮ ጋበሎም ደምቢ ዓስተርሊ ፌ ጃር ላውል፡ጣፍሑዅ።ናዋ ኒልድ ፍኖ ኒልክ ሰበክሉዅ። 20 .ይና አደራኻ ናዲ አኾ ናጋበት አምራትድ ተብዱሎም ሰጘኲ።